هەولێر و ئەبو زەبی لە پشت کاڵین "باوگ ئیدریس" و "باوگ خالد" درەو کەن
دویای نیمەڕوو رووژ پەنجشەممەی گوزەشتە، نێچیروان بارزانی سەرۆک هەرێم کوردستان، روی وەرەو ئیمارات کرد، ئەرا جیوەجیکردن مکیسیگ فەرمی وەلایەن شێخ محمد بن زاید ئال نهەیان سەرۆک دەوڵەت ئیمارات.
ک ئەو دوو پیاوە، نێچیروان بارزانی و محمد بن زاید، رکدارن لەبان مەنین پەیوەندی ناوبەینیان، تەنانەت وەرجەیەگ سەرۆک ئیمارات لە پشت شێخ خەلیفە بن زاید ئال نهەیان پۆست سەرۆکایەتی وەربگرێد، ک شێخ خەلیفە ئەو مەوقە بیمار بوی، و شێخ محمد خوەی ئەرک سەرۆکایەتی داشت، تا شێخ خەلیفە لە ئایار ٢٠٢٢ دویاکووچی کرد، و محمد بن زاید وەفەرمی بویە سەرۆک.
نێچیروان بارزانی و محمد بن زاید دوو ریبەر کارکەرن، خاوەن نووڕینیگ تەمادار وە گەشەپیدان و رەوزکردن لە ناوچەیل خوەیانن، یەسە ک هیلێد یاکانگیربوینیان بوودە کاریگ بەرهەمدار و سووددار، و وەشیوەیگ گشتی، ئەو دیدارە دەرفەتیگە ئەرا قایمکردن پەیوەندیەیل دووانەکی و باسکردن را و ئەزموون و هویرەیل لەناوبەینیان، و توەنێد لە بانان بڕەسێدە هاوکارییگ زیاتر و گورجتر.
ئی سەردانە، دویای چەن رزوژیگ لە دانوسەنین باڵایگ وەلایەن سەرۆک هەرێم کوردستان وەگەرد وەزیر وەرگری ئەمریکا، و خانمە وەزیر دەرەوەی ئەڵمانیا، و ئەمیندار گشتی نەتەوە یەکگرتگەیل تیەێد.
پەیوەندی ناوبەین هەرێم کوردستان و ئیمارات وە پەیوەندییگ ریشەدار دانریەێد، و هەمیشە پووڕیاگە، و دی پایەی کاریگەر هەرێم کوردستان لەناوچەگە ئاشکراس، ک ئەوەیش خاسیەگەی وە شیوەیگ دیار چوودەو ئەرا باوگ ئیدریس، ک ئەو بنەڕەت ئی کارە دانا، چوینکە خوەی ئەندازیار ئاوەدانی و ئاشتیە، و خوەییش خاوەن نازناو سیاسەتمەدار خاوەن رەوشتە، هەمیش دەور ئیماراتیش نەشاریاسەو، ک بویە هیزیگ ک جەمسەرەیل جەهانی روی وەپی کەن.
یە زیاتر لە ١٠ ساڵە قونسوڵخانەی دەوڵەت ئیمارات لەناو هەولێر هەس، ک قویلی پەیوەندیەیل وەگەرد ئەبو زەبی و دوبەی نشان دەێد، و ئیمارات جویر هاوبەش بازرگانی چوارەم وە گەورەیی وەگەرد هەرێم کوردستان دانریەێد، ئەوەیش دویای تورکیا و ئیران و ڵات چین.
مەزەنەی ئابووری نشان دەن ک بڕ گواستەوەی بازرگانی ناوبەین هەرێم کوردستان و ئیمارات نزیکەی یەک ملیار دۆلار لە ساڵیگ، ئەراوە سەردان نێچیروان بارزانی لە چین جویلەی دەشتەکی هویرد تیەێد، وەوجویرەگ خزمەت بەرژەوەنی هەرێم کەێد، ک گرنگی جەهان وە سەرچەوەیل وزە لەوەر کاریگەری جەنگ رووسیا و ئۆکرانیا زیایەو بوود، لە وەختیگ هەرێم کوردستان خاوەن سەرچەوە و سامانەیل فرەیگە توانای سوودگرن لەلی هەس ئەرا ئارامگردن ئەو شیواشیوە لەناو بازاڕ وزەی جەهانی، دویای چارەکردن قەیران نەفت وەگەرد حکومەت بەغدا، و ئەرا زانیاری محمد شیاع سودانی سەرۆک وەزیرەیل عراق لە شوبات گوزەشتە میوانیگ فەرمی بوی لەلای محمد بن زاید.
بارزانی ک مکیس فەرمی لە محمد بن زاید (باوگ خالد) ئەرا سەردان ئیمارات لە دویادویای شوبات گوزەشتە وەرگرد، و لەبان هەژمار فەرمی خوەی لە تویتەر نویسان: خوەشهاڵ بویم وە دیدار برای ئازیز شێخ محمد بن زاید ئال نهەیان سەرۆک دەوڵەت ئیمارات، وە جیوەجیکردن مکیس رێزداری، وتیش: باس پەیوەندیەیل دووانی ناوبەین عراق وەتایبەت هەرێم کوردستان وەگەرد ئیمارات و شیوەیل بتەوکردنی و ئەوزەڵکردنی لە گشت ئاستەیل کردیمن، و هەمیش باس بڕیگ باوەت ک گرنگی لەلای هەردوگ لایەنەگە دیرن.
لەلای خوەییش؛ سەرۆکایەتی هەرێم کوردستان لە بەیاننامەیگ وت: گردەوبوین ناوبەین سەرۆک هەرێم کوردستان و سەرۆک دەوڵەت ئیمارات، باس پەیوەندیەیل عراق و هەرێم کوردستان وەگەرد ئیمارات کرد، و شیوەیل هاوکاری هاوبەش، و دویاترین نووەوبویەیل رەوشەیل لە ناوچەگە وەگەرد بڕیگ باوەت ک گرنگی لەلای هەردوگ لایەنەگە دیرن.
ئیمارات وە گەورەترین بەرهەمهاورەیل لە کەرت وزە لە هەرێم کوردستان دانریاگە، و نزیکەی ١٤٠ کۆمپانیای ئیماراتی هەس، لە جویراجویر کەرتەیل لەناو هەرێم کوردستان کار کەن، و بڕ بەرهەمهاوردنی رەسێدە زیاتر لە ٣ ملیار دۆلار، وەلێ چەودیاریکەرەیل ئویشن؛ گەورەترین نموونەی سەرکەفتن بەرهەمهاوردن ئیمارات کەفێدە لای کۆمپانیای "دانا غاز" ک وە گرنگترین کۆمپانیایل بەرهەمهاوردن لە کەرت گاز و نەفت دریەێدە قەڵەم، هەمیش چەن کۆمپانیایگ دیرێد ک ئویشێد وەگەرد ستراتیژیای هەرێم کوردستان لە هەمەڕەنگی ئابووری گونجیاگە.
لە ساڵ ٢٠٠٧، ئەو کۆمپانیای ئیماراتیە وەشان کۆمپانیای نەفت هیلال، وە رێککەفتنیگ بویە خاوەن ماف خوەی ئەرا نرخداناین و گەشەپیدان بەرهەم و فرووشتن پترۆڵ و گاز سرووشتی لە کێلگەیل خۆرمور و چەمچەماڵ لە هەرێم کوردستان، و حکومەت هەرێم کوردستان وەرانەوەر ئەوە، سوود لە رەسین گاز ئەرا وەکارهاوردنی لە بەرهەمکردن کارەبا لەناو هەرێم کوردستان گرد، ک رەسین وەردەوامی ئەو گازە سوتەمەنی ئەرا زیاتر لە 80% لە وزەی بەرهەمکردن کارەبا لە هەرێم کوردستان دابین کرد، و رەسانەی ئاستەیل بەرزیگ لە پشتدەسختن لە خەرج سوتەمەنی و ئاڵشتکردن دیزل، ک سوود فرەیگ هاوردە بان ژینگەی ئابووری ئەرا هەرێم کوردستان و عراق وەگشتی.
شایەت سەردان نێچیروان بارزانی دەسمیەتی لە گورجکردن هاوکاری ئابووری ناوبەین هەولێر و ئەبو زەبی بەێد، ک مەزەنە کریاگە کار لەبان ئەنجومەنیگ باڵا ئەرا خاوەن کارەبارەیل بەرهەمهاوردن لە هەرێم کوردستان بکریەێد، و لە ری ئەنجومەن ئابووری ئیماراتی کوردستانی.
لە ئەیلوول ساڵ ٢٠٢١، ئەو دوو پیاوە رکداربوین لەبان چەوپیکەفتن، وەڕی سەردان فەرمی نێچیروان بارزانی ئەرا لەندەن، هەناێ محمد بن زاید هیمان شازادەی ئەبو زەبی بوی، ک هەردگ ریبەر لەو مەوقە باس پەیوەندیەیل هەرێم کوردستان و ئیمارات کردن، وەگەرد باسکردن رەوش سیاسی لە عراق و هەڵوژاردن، و مەزەنەیل بانان عراق، و سەردان هەردوگیان ئەرا لەندەن و یەکانگیربوینیان و گفتوگۆیان وەگەرد بۆریس جۆنسن سەرۆک وەزیرەیل ئەو مەوقەی بەریتانیا، و باس دویاترین نووەوبویەیل و گەشەیل ناوچەگە وەشیوەی گشتی کریا، و بڕیگ باوەت خاوەن گرنگی لەلای هەردوگ لایەنەگە.
بن زاید و نێچیروان بارزانی دووپات لەبان قایمکردن بنمایەیل برادەری و پەیوەندیەیل لە گشت چینەیل کردن، و لەبان گرنگی تەقەلاداین و کار هاوبەش لە چوارچیوەی مقەیتیکردن ئارامی، و چارەسەرکردن ململانە و ژاوەژاو ناوچەگە، و رای خوەیان لەی باوەتەیلە وەیەک وتن.
