چە هیشت دەریاچەی ساوە بوودە بیاوان؟
شەفەق نیوز/ وەزارەت سامانەیل ئاو، ئمڕوو پەنجشەممە، وت: پێشێلکاری لە کەنین بیر هاپشت هشکەوبوین دەریاچەی ساوە لە پارێزگای موسەنا، و دیاری کرد ک وەرجەیە هوشداری لە بەرهەمهاوردن زەویەیل ناوچەگە وە پشتبەسان وە ئاو ژیرزەوی داگە.
راویژکار وەزارەتەگە عۆن زیاب ئەرا ئاژانس شەفەق نیوز وت: ئەوەگ وەسەر دەریاچەی ساوە هات نشانەی بەدیگە و هەمیش نشانەیگە ک عراق کەفتیەسە وەر هشکەساڵی سەختیگ، و دیاری کرد ک یە یەکەم جارە دەریاچەگە بەکفێدە هشکەوبوین وەشیوەیگ رەقاوی، ودویای ئەوە ک وەرجە نزیکەی دوو ساڵ نشانەیل داوەزین ئاست ئاوەگەی دەرکەفت.
وتیش: هەرچەن سوودەیل ئابووری دیرێد، باوجی ئاو دەریاچەگە فرە شوورە، تەنیا ماسیەیلیگ بۊچگ لەناوی ئەوزەڵ کەێد، و کەم لە باڵندەیل لەناوی هەس، و درەخت سرووشتی جۊر نەی و زەل لەناوی نییە، باوجی دەریاچەگە سرووشتیە چوینکە وەی شیوە هاناو بیاوان، ک ئەرزشیگ تایبەت دیرێد، و ئەرا شوینیگ گەشتوگوزاری خاسە، و هەمیش ئەرا ئەوانەگ پسپۆڕن لەی سیما.
هەمیش وت: هشکەوبوین ئی دەریاچە لەوەر وەکارهاوردن ئاو ژیرزەوی وەشیوەی دەسدرۊژی لە بیاوان سەماوە بوی، ک هیشت ئەمار ئاوەگە لەژیر زەوی ناوچەگە تەواو بوود، و دووپات کرد ک وەرجەیە وەزارەتەگە هووشداری کرد و هاواریگ لەبان بەرهەمهاوردن زەویەیل بیاوانی و کاڵین یەک مەلیۆن دۆنەم لەبان ئاو بیر نارەو، ک ئەنجامەیل رخبەریگە چوینکە کۆتایی وە ئاو ژیرزەوی ناوچەگە تیارێد.
دەریاچەی ساوە دەریاچەیگ بەسیاگە و شوورە کەفێدە پارێزگای موسەنا، نزیک چەم فورات، دەریاچەگە هویچ سەرچەوەیگ لە چەمەیل نەیرێد، و ئاویش لەلی وەرەو دەیشتی نیەچوود، باوجی ئاو لە ژیر زەوی بەێد ک لە ژیرەو لە چەم فورات ئەرای تیەێد.
لە ١٧ی نیسان ٢٠٢٢، وینەیل میدیایل راگەیانن عراقی ک نەمان دەریاچەی ساوە نشان دان.
ئی دەریاچەی سرووشتیە، دەریاچەیگ بیوەینە و دەگمەن بوی، ک تەنیا دەریاچەیگە لە ئاست زەوی دەورگردی بەرزترە، و کەفاو ئاوەگەی سەنگەیلیگ دەگمەن لە کنار دەریاچەگە دروس کردیان، و هەمیش هویچ ماسییگ لەناوی ئەوزەڵ نیەکەێد، بیجگە ئەو چین ماسی بویچگە ک لەناو خود دەریاچەگە هەس، لە خود وەختەگە، ماسیەیل ئەو دەریاچە لەناو هویچ ئاویگتر ئەوزەڵ نیەکەن.
بەشیگ لە وەرپرس و پسپۆڕەیل وتن، لەوەر ئەو زەویلەرزە ک لە ساڵەیل گوزەشتە دانە ناوچەگە، چەوەیل رەسین ئاوەگە ئەرا دەریاچەی ساوە بەسیان وکوورەو بوین، ئەراوە ئی دەریاچەی ناودیارە، بویە بیاوانیگ.
