گەنج عراقی تا لە گەرمی قورتار بوود لەناو چەم خنکێد
پەناگەی بی پەنا
شەهاب عەلی خەڵک پارێزگای بەسرە، ئەرا ئاژانس شەفەق نیوز ئویشێد: وەکورد بەرزەوبوین پلەی گەرمی، خەڵک شارەگە زیاتر وەرەو چەم (شەت عەرەب) روی کەن، وە مینەی ئاو سەردیگ ئەرا یەگ لەشیان هوونکەو بوود.
عەلی وتیش: هەمیشە پولیس ئاوی هووشداری وەپیمان دەێد کە لە کەنار چەمەگە بویمن و وەرەو قویلایی نەچیمن.
دیاری کرد کە چگنیان ئەرا چەمەیل وەخاتر وەسەربردن وەخت خوەشیگ لە شوینیگ واز و نیەچیمنە شوینە بەسیاگەیل، جویر مەلوانگەیل چوینکە مەرجەیل تەندروسی نەیرن، و حکومەت چەوی لەبانیان نییە.
شمارەی فەرمی نییە
عەقید مونتەسەر عبادی وەڕیەوبەر پولیس ئاوی لە پارێزگای بەسرە ئەرا ئاژانس شەفەق نیوز وت: ئاماریگ وە شمارە نەیریمن ئەرا ئەوانەگ پارەکە یا سەرەتای ئمساڵ لە چەم خنکیانە، چوینکە من وەی تووە هاتمەسە ئی پۆستە، و فەرمان دامە چەن دەوریەیگ لەبان چەمەگە بوود، و توەنستیمن ٥ کەس لە ماوەی دوو مانگ گوزەشتە لە خنکیان قورتار بکەیمن، و پەنج کەسیش گیانیان لەدەس دانە.
عبادی دووپات کرد کە سەختی وەخوەملن دوینیمن لە رەفتارکردن وەرد گەنجەیل هەناێ تەمەیان کەیمن لە رخەیل مەلەوانی لەناو چەم، و ئیمە پشتگیری راگەیانن خوازیمن لە لەبان ئی کارە زاڵەو بویمن کە گەنجەیلمان کوشێد.
شمارەیل فرەیگ لە بەسرە و میسان
سەرچەوەیگ ئاگادار لە پارێزگای بەسرە ئاشکرا کەێد کە پارێزگاگە لە سەرتای ئی ساڵە ٢٩ خنکیان لەناو چەمەیل توومار کردگە.
سەرچەوەگە ئەرا ئاژانس شەفەق نیوز وت: پارێزگاگە لە سەرەتای جەژن تا ئیسە خنکیان ١٩ کەس لە چەمەیل جیاجیا توومار کردگە، فەرەگەی لە شەت عەرەب، و ١٠ کەسیش وەرجە جەژن خنکیانە.
سەرچەوەگە دیاری کرد کە شمارەی مردنەیل رووژانە وەردەوامە لە بەرزەوبوین لەوەر بەرزەوبوین پلەی گەرمی.
لە پارێزگای میسان، سەرچەوەیگ ئەمنی ئاشکرا کرد کە پارەکە خنکیان ٤٠ کەس توومار کریاس.
سەرچەوەگە ئەرا ئاژانس شەفەق نیوز وت: لێکۆڵینەوەیل لە خنکیان ٤٠ کەس دیاری کردن کە تەنیا دوووانبان خنکیانە، و ئەو ٣٨ مردنەگە وە تاوان کوشتن یا خوەیکوشتن بویە
کورنیش ناتەواوە
لەی باوەتە حەیدەر توعمە قایمقام شەت عەرەب ئویشێد: پلەی گەرمی رەسیە ئاست بەرزیگ، کە ناچار فرەیگ لە گەنجەیل کرد بچنە ناو چەمەیل ئەرا مەلەوانی و هوونکردن خوەیان.
توعمە ئەرا ئاژانس شەفەق نیوز وت: پولیس ئاوی تەقەلای فرەیک دەێد وەخاتر مقیەتیکردن گیان گەنجەیل، لەڕی قەیەغەکردنیان لە چەمەگە، وتیش: وەرجەیە ئیدارەی قەزاگە یەک مەلەوانگا لەڕی بەرهەمهاوردن واز کرد، و یەکیگیش دیرێد تەواو بوود.
دیاری کرد کە ئیدارەی قەزاگە زیان لە ناتەواوی پڕۆژەی کورنیش شەت عەرەب دیرێد، تا بتوەنیمن مەلەوانگای وازیگ لەناو چەم شەت عەرەب دروس بکەیمن، و گەنجەیل بنوەنن مەلەوانییگ بیوەی بەو شوینەیلە بکەن.
لە نەجەف، چالاکوانەیل ئویشن؛ پارێزگاگە لە ساڵەیل گوزەشتە ساڵانە خنکیان زیاتر لە ٦٠ کەس توومار کردیاد.
ئەرا ئاژانس شەفەق نیوز وتن: دویای دەسکردن وە هەڵمەت (با بژیەیمن) ئەرا هووشیاریکردن گەنجەیل لە رخەیل مەلەوانی لەناو چەمەیل، و زوور لەبان حکومەت پارێزگاگە هاوریا تا مووڵەت بەێدە بەرهەمهاوردن ئەرا دروسکردن مەلەوانگا لە پارێزگاگە.
وتیش: تیمەگە توەنست وە زوورکردن وەبان حکومەت بیلێد نەجەف بوودە خاوەن ٧ شار ئاوی، و شمارەی خنکیان وە ریژەی ٩٧٪ کەمەو بوی، کە ئمساڵ تەنیا دوو خنکیان توومار کرد.
