کنار فەوتان عراق.. وەیادخستن هەڵمەتەگەی نێچیروان بارزانی
شەفەق نیوز/ پەیامانگای "دەوڵەتەیل خەلیج لە واشینتۆن" باس ئەو ململانە کرد لەناوبەین شیعە، جویر یەکیگ لە تیژترین قەیرانەیل لە عراق لە ٢٠١٤ تا ئیسە، و هەڕەشە وە وەردەوامی قەیران سیاسی لە وڵاتەگە دەێد، و باس ئەوە کرد ک نێچیروان بارزانی سەرۆک هەرێم کوردستان مکیس کرد ک هەولێر بوودە ناوجیکەریگ ئەرا کۆتاییهاوردن وەو قەیرانە لە بەغداد.
راپۆرتە ئەمریکیەگە ک ئاژانس شەفەق نیوز ئەڵگەردانی کرد باس سیمایل ئەو ململانە لە بەغداد کرد لەناوبەین لایەنگرەیل موقتەدا سەدر و هیزەیل چوارچیوەی هەماهەنگی، تا رەسێدە کاندیدکردن محمد شیاع سوودانی ئەرا سەرۆکایەتی وەزیرەیل، وجویلەی سەدر ئەرا پویچەڵکردن ئی گامە لەڕی گاڵداین لایەنگرەیلی تا بچنە ناو پەرلەمان عراق، ک بویە لانەیگ ئەرا ململانی لەبان دەسەڵات ناوبەین شیعە، ک هیلێد قەیران سیاسی وڵاتەگە وەردەوام بوود.
ململانەی شیعە و گلەوخواردن داعش
راپۆرتەگە وتیش: ئەو ململانە ناوبەین شیعە لە تیژترین ململانەیل عراقە لە ٢٠١٤ تا ئیسە، وتیش: مەترسیەیلیگ هەس ک شایەت وڵاتەگە لەناو جەنگ ناوخوەیی بتمنێد، وەگەرد کاردانەوەی رخبەریگ لەبان ئارامی و ئاسایش لە ناوچە فراوانترەگە.
دیاری کرد ک هاتێ ئەو ململانەی سەختە لە عراق هوچانیگ ئەرا ریخریاگ داعش و باڵەیل جیهادی پەیا بکەێد، تا دووارە رزەیلیان ڕێک بکەن و ئارامی وڵاتەگە خراو بکەن، و دووارە بڕیگتر پە پەنابەرەیل پەیا بوود، و لەوەر ئەوە، ئیران و ئیمارات و ئەمریکا و بەریتانیا، داوای گفتوگۆ وچارەکردن ئاشتەوایی کردن.
ناوجیکەر کورد
وەگەرد ئەوەیش، راپۆرتەگە وت ک سەرۆک نێچیروان ببارزای، هەرچەن پەیوەندی ناگونجیاییگ وەگەرد بەغداد هەس، مکیسیگ کرد ک هەولێر بوودە ناوجیکەریگ لە دانوسەنین ناوبەین هیزەیل شیعە.
راپۆرتەگە وتیش: کوردەیل فرە نیگەرانن لەوەگ ئی ململانی سیاسیە لە بەغداد بڕەسێدە تونەڕەوی، وتیش" نزیکەی دوو مەلیۆن ئاوارەی ناوخوەیی و دەیشتەکی لە عراق و سوریا هەس، ک زوور دارایی وکۆمەڵایەتی فرەیگ هاوردنەسە بان هەرێم کوردستان، و هەر تونوتیژییگ زیاتر هاتێ تەکان ئاوارەیل فرەیگ وەرەو هەرێم کوردستان بەێد. ڕاپۆرتەگە وتیش: داوای سەدر وە ئاڵشتکردن دەستوور و رمانن ڕژیم سیاسی ک لە ٢٠٠٣ سازیایە، خوەی هەڕەشەش لەبان دویارووژ هەرێم کوردستان جویر پیکاتەیگ فیدراڵی.
ڕاپۆرتەگە هوشداری دا ک وەردەوامی هشکەوبوین سیاسی عراق خستە کنار جەنگ سەختیگ، وتیش نەرمی داواکاری سەدر وەگەرد داوای دویرخستن هەر سەرکردایەتییگ ئەرا نووری مالیکی، هیشت پەیاکردن چارەیگ سیاسی سەختەو بوود.
پویچەڵکردن پەرلەمان و هەڵوژاردن وەرجەوەخت
دویای ئەوە ک ڕاپۆرتەگە باس داوای پویچەڵکردن پەرلەمان و ئەنجامدان هەڵوژاردن وەرجەوەخت لەلاین سەرد کرد، وت" سەدر لە خود وەختەگە داوا لە کەردم کەێد بانە ناو "شوڕشەگەی"، ک بەشیگ لە پسپوڕەیل ئویشن: ئەوە سیاسەتیگ ژیوەژیر ئەرا وینەیگ سیاسی وەرەو کنار رمیان نشان دەێد.
راپۆرتەگە هەمیش هوشداری ئەوە دا ک ئەگەر شیوەی نوویگ ئەرا نواگرد ژاوەژاو و وەڕیەوبردن ململانەگە پەیا نەکریەێد، خو رەوشەگە هەر وە ئامادە ئەرا تونوتیژی و نا ئارامی مینێدەی.
