كووچكردن بويهسه تهنيا ئارهزوو جايهڵهيل
![كووچكردن بويهسه تهنيا ئارهزوو جايهڵهيل](https://media.shafaq.com/media/archive/files/Archive.jpg)
ئمجا ههرچهنى رادهى كووچ وهجهم جايهڵ جوانهيل تازه نيهو ههرم له سهردهم جهنگ تايفى ساڵ 2006 و ههميش له ساڵهيل نهوهد سهدهى گوزهيشت له وجوود بوى، وهلى هويچكاميان جوور شهپۆلهگهى ئيجاره گهوراو پڕ هويردهكارى نيه.
بار خراو ئاسايشى و بيكارى و ويرانى خزمهتگوزارى، بويهسه سهرهكيترين ئهو هووكارهيله ك جايهڵ جوانهيل هان دانه ئهرا وهجيهيشتن وڵات، وهلى لهى دوياخره بارهگه ئاڵشتكارى فيشتر هاته بانى، تهنانهت ئهوانهيش ك خاوهن كار و ژيان خاسيگن ئهوانيش هوير له كووچكردن ئهكهن.
لهيرا جياوازى كووچكردنهگهى ئيجاره ئهوهسه لهڕى تووڕهيل كومهڵايهتى و وێبسايتهيلهو هوكارهى جايهڵهيل ئهكريهێد ك چوين وڵات بيلنهجى و روى له ئۆرپا بكهن، رينمايى وهپى ئهيهن لهباوهت چوينێتى وهكارهاوردن ريهێل ناياسايى.
رافع خهفاجى ك كۆليژ ئدارى و ئابوورى زانكۆ بهغدا تهمام كردگه، له لێدوانيگ ك(شهفهق نيوز)ئاگادارى بوى، وت: هويچ چشتيگ له عراق نهمهندگه وهكهڵك ژيان باێد و وه بوونهى نهوين خزمهتگوزارى و نائارامييشهو ژيان لهى وڵاته ستهم بويه.
رافع له كومپانيايگ بازرگانى كار ئهكا لهناوچهى عهرهسات له بهغداو ئويشێد: نۆ مانگه له كومپانياگه كار ئهكهم ئهرا ئهوهك پويل گردهو بكهم و ڕوى له ئۆرپا بكهم، گرينگ ئهوهسه قورتار بووم و گشت تهمهنم لهيرا وه تاڵان نهچێد.
ماوهيگيش وهرجه ئيسه لهناو عراقيهيل پارچه ڤيدێۆيگ بڵاوهو بوى ك جايهڵ جوانيگ لهتى دهركهفت وهناو "ئیریك" ك له هۆنكۆنگهو روى له بهغدا كردگهو لهبان يهكيگ له پيهڵهيل ئاو دجله وسياگهو ئويشێد: ئهرا ئهوه هاتمه تا راسيهيل بزانم، ئيسه خاس زانم ك كهم كهس ههن له دهيشتهو بانه ئيرا، بهڵكوو وهچهواشهوه فريهن ئهوانهگ ئيرا وهجيهيلن.
ئيريك قسه ئهرا عراقيهيل ئهكاو ئويشێد: تكا لهليدان ئهكهم ئهى خهڵك عراق وڵاتهگهدان مهيلنهجى، ئى جهنگه كووتايى وهپى ئهياد، بايهسه دهسميهت يهكترى بيهيم ئهرا ئاوهدانكردنهوهى شارهيلدان.
وهلى ئهو كۆمێنتهيله ك له تووڕهيل كومهڵايهتى لهبان ڤيديۆگه نويسرياگه ئهوه دهرئهخاد ك خهڵك ئى وڵاته چهنيگ ناڕهحهت و بى ئوميدن، بڕيگ لهليان قسهيل ئيريك وه نامهنتقى دوينێد و بهشيگيش لهليان ئويشن دى توانامان نهمهندگه لهيه فيشتر سهبر بكهيم و بڕيگيانيش چهنهها نوكته لهبان قسهيله دروس كردنه.
يهكيگ تر لهو گرتهيل ڤيديۆييه ك لهى ماوه بڵاوهو بويه، ڤيديۆى جايهڵيگ عراقيه ك سهركهفتگ نهويه له ڕهسين ئهرا ئهو وڵاته ك خوهى ئارهزووى كردگه، جايهڵهگه باس لهوه ئهكا ك دهسڵاتدارهيل يۆنانى دهسگيرى كردنهو دوياى وهرگرتن پهنجهموور لهڕى پهيوهنديكردن وه پۆليس توركياوه كليهوكردنه ئهرا عراق و ههرچى پويليش لهو ڕيه خهرجكردگه گشتى فهوتياگه.
ساڵهيل گوزهيشت جايهڵهيل بيكار و ئهوانهيش ك روى وهڕوى ههرهشه بويانهو له فيشترين ئهو كهسهيله بوين ك وڵات وهجى هيشتيان، وهلى لهى دوياخره ئهو جايهڵهيليشه ك كاريش ديرن و له شارهيل ئارام خوارگ عراق و كوردستانيش ژيهن بريار كووچكردن ئهيهن.
ئيسه بار عراق لهيوا وهپى هاتگه ئمڕوو جايهڵ جوانهيلى وهرجه گهردين لهشوون كار و هاوسهرگيرى هوير له كووچكردن ئهكهن، ئهويش وهبى ئهوهگ له خهياڵيان بوود ك ئايا ئهتويهنن له كومهڵگاى ئۆرپى بژيهن، يهيش لهوهختيگ ك دهيهها وهسهرهات لهى باوهتهو وجوود ديرێد و ئسپات ئهوه ئهكهن ك جايهڵهيل فريهيگ ئهرا ماوهى ساڵهيل دوير و دريژيگه له ئۆرپا ئهژيهن و تائيسهيش نه كار دهسيان كهفتگهو نهيش تويهنستنه بخوهنن، بهڵكوو تهنيا چهويان ها دهس حكومهت ئهرا ئهوهگ لهساى بژيهن.