كوشتن ره‌سيه "برنس ئنستگرام" عراقى و "فه‌يسبوك" هاته بان خه‌ت
شه‌فه‌ق نيوز/ له تازه‌ترين هه‌ڵقه له زنجيره تاوانه‌يل كوشتن و كوشتار له عراق، ته‌رم جايه‌ڵيگ دوينرياوه له ته‌مه‌ن 15 ساڵان و شوونه‌وار چه‌قوو وه لاشه‌يه‌و ديار بوێ، ك يه‌يش شه‌پۆليگ تويڕه‌يى له‌لى كه‌فته‌و.
حه‌مودى متێرى ك له‌ساڵ 2003 هاته‌سه دونيا، ژيان ئاسايى وه‌سه‌ر ئه‌وه‌ێد جوور باقى هاوته‌مه‌نه‌يلى له شار سه‌در له خوه‌رهه‌ڵات به‌غداى پايته‌خت، وه‌لێ كه‌سه‌يليگ نه‌ناسرياێ بڕيار كووتاييهاوردن وه ژيانى كردن وه چه‌قوو، ئه‌ويش وه مه‌هانه‌ى ئه‌وه‌گ گومان وه مه‌يلدارى سيكسى له‌لى كردنه.
وه گووره‌ى سه‌رچه‌وه‌يل ئه‌منى، حه‌مود ك ناسناوى "برنس- مير- ئنستگرام" بوێ، دوياى رفاننى وه چه‌قوو كوشيا.
وه‌لێ سه‌رچه‌وه‌يل ئه‌وه ره‌ته‌و كردن حه‌مودى ئه‌و جايه‌ڵ بدێ ك له‌گرته ڤيديۆيه‌گه‌ى ده‌رچێ له‌بان ماڵپه‌ڕه‌يل كۆمه‌ڵايه‌تى و وه‌چه‌قوو كوشياوێد.
ماڵپه‌ڕ "فه‌يسبوك"يش وه هه‌ڵه‌په‌ڵه تێبينييگ دا و ئاماژه وه مردن ئه‌و جايه‌ڵ جوان عراقيه كرد له لاپه‌ڕه‌گه‌ێ و له تێبينيه‌گه ئويشێد: ئوميده‌واريم ئه‌و كه‌سه‌يله ك دووس حه‌مودى ديرن سه‌ردان مه‌له‌فه شه‌خسيه‌گه‌ى بكه‌ن تا ژيانى بارنه ياد.
يه‌كيگ له قه‌ومه‌يل حه‌مودى له فه‌يسبوك سه‌ره‌خوه‌شييگ نويساگه‌و له‌تى ئويشێد: هووز ئه‌لبومحه‌مه‌د - ئه‌شره‌ت ئه‌لبومتێر پرسه‌و سه‌ره‌خوه‌شى وه مردن حه‌مودى متێرى جايه‌ڵ جوان ئه‌كه‌ن و نويساگيشه: تا كه‌ى ئه‌ى عراق.
له لاپه‌ڕه‌گه هيمان دويا ته‌عليقيگ ك حه‌مودى له فه‌يسبوك بڵاويه‌و كردگه له سه‌ره‌تاى ئى مانگه نويساگه: گشت غياباتيگ جوور له‌هويره‌و بردنه و مه‌كه‌فنه شوون مه‌هانه‌ى باردوخ.
له ماڵپه‌ڕ "تويته‌ر"يش ئه‌را كوشتن ئى جايه‌ڵ جوان عراقيه ئدانه‌ێ فريه‌يگ كه‌فێده وه‌رچه‌و، يه‌كيگ له‌وانه وتگه: دونيا شيتيگه‌و ئنسانيه‌ت له‌ده‌سداگه‌و ئيمه‌يش له‌تى ژيه‌ێم. يه‌كيگ تر ئويشێد: وه چ گوهانيگ ئه‌وانه ئه‌كوژيه‌ن، يه‌يش له‌وه‌ختيگه ك وێنه‌يگ متێرى و وێنه‌يگ تاره فاس و نمايشكار خستنه‌سه‌ڕوێ ك له سبته‌مبه‌ر گوزه‌يشت كوشيا.
عراق له‌ى هه‌فته‌يل دوياخره زنجيره تاوانه‌يليگ رخه‌وبه‌ر له‌تى روێداو له‌تى ئافره‌ته‌يل و چالاكوانه‌يل كوشيان، له سبته‌مبه‌ر گوزه‌يشت تاره فارس نمايشكار كوشيا له‌وه‌خت رانين سه‌ياره له ناوڕاس به‌غدا.
هه‌ر له هه‌مان مانگ سوعاد ئه‌لعه‌لى چالاكوان كوشيا وه گوله‌و دوياى ئه‌وه‌يش ده‌سميه‌تده‌ر پزيشكيگ له شار به‌سره له‌وه‌خت ده‌رچگنى له نه‌خوه‌شخانه ك له‌لايه‌ن كاميرايه‌يل چه‌وديرێه‌و تاوانه‌گه تۆمار كريا.
له مانگ ئاب گوزه‌يشتيش هه‌ردوگ شاره‌زاى جوانكارى، ره‌شا ئه‌لحه‌سه‌ن و ره‌فيف ياسرى كوشيان.
وه‌ل ئه‌وه‌يشا كلكرياگ نه‌ته‌وه‌يل يه‌كگرتگ ئه‌را ده‌سميه‌ت عراق(يونامى)گشت كاره‌يل تون وتيژى ئدانه كرد، له‌وانه‌يش كوشتن و هه‌ڕه‌شه و رخه‌وبردن، ئه‌ويش له‌وه‌ر ئه‌وه‌گ كاره‌يليگن جى قه‌بول نيه له‌هويچ وه‌ختيگ.
