كورد له سوريا.. گه‌وراترين زه‌ره‌دمه‌ن له بڕيار ئه‌مريكا
شه‌فه‌ق نيوز/ كورده‌يل دوياى ئه‌وه‌گ له‌ناونى گه‌وراترين سوودمه‌نه‌يل بوين له جه‌نگ سوورى، بوونه گه‌وراترين زه‌ره‌دمه‌نه‌يل له بڕيار وڵاته‌يل يه‌كگرتگ له‌باره‌ى كيشاننه‌وه‌ى هێزه‌يلى ك ده‌سميه‌تيان دا له جه‌نگ دژ تونڕه‌وه‌يل ريكخرياگ تيرۆريستى داعش و له جواودانه‌وه‌ێ ئه‌نقه‌ره‌و ديمه‌شق.
وه ده‌سميه‌ت وڵاته‌يل يه‌كگرتگ، هيزه‌يل سورياى ديموكرات زاڵ بوينه له‌بان روێوه‌ره‌يل فريه‌يگ له باكوور و خوه‌رهه‌ڵات سوريا له‌ژير ده‌سڵات داعش، وه‌لێ وشدارى دان له‌وه‌گ هيمان داعش مه‌ترسى ديرن ك هه‌رچه‌نى دۆناڵد ترامپ ئاشكراى واينيان كرد.
فره‌نساو ئه‌ڵمانياى هاوپه‌يمان واشنتۆن له ناتۆ هان وه‌ل ئه‌و باوه‌ڕه‌و ئويشن ئاڵشتكارێ له‌ناكاو له ريڕه‌و وڵاته‌يل يه‌كگرتگ وه‌رانوه‌ر سوريا روێ ئه‌ياد، ئه‌ويش له چوارچێوه‌ى وه‌فاى ترامپ له هه‌وڵ هه‌ڵوژاردن له‌ساڵ 2016، ك هه‌ڕه‌شه دژ داعش كرد.
بريار ترامپ نه هه‌ر ئه‌و خاكه‌يله ك هانه ژير ده‌سڵات هيزه‌يل سورياى ديموكرات ئه‌خاده مه‌ترسى داعش، به‌ڵكوو له ئه‌گه‌ره‌يل ئه‌وه‌يش زياێ ئه‌كا ك باكوور سوريايش ك ها ژير ده‌سڵات كورد تويش هه‌ڕه‌شه‌ى توركياو هاوپه‌يمانه‌يلى باێد.
جوور ئه‌وه‌گ مێژوو دوباره‌ێ خوه‌يه‌و ئه‌كا، كورد ملله‌تيگ بى ده‌وڵه‌ته‌و دابه‌ش بويه له‌بان سوريا و عراق و ئيران و توركيا، ك هيزه‌يل بيگانه ئاره‌زووه‌يليان له‌ناوبردن له‌ڕوێ نه‌ته‌وه‌ييه‌و، ك گه‌وراترين ملله‌ت بى ده‌وڵه‌ت بوين دوياى شكه‌ست ئمپراتۆريه‌ت عوسمانى ئه‌را نزيكه‌ى سه‌ده‌يگ.
بڕيگ له شيه‌وكه‌ره‌يل ئويشن، له‌وه‌ر ئه‌وه‌گ مه‌ردمان كورد له سوريا مقه‌يه‌تى له خوه‌يان بكه‌ن له توركيا، ئيشه ناچارن قاپى ديمه‌شق بكوتن و ريككه‌فتن وه‌ل به‌شار ئه‌سه‌د و رووسه‌يل هاوپه‌يمانى بكه‌ن ك مقه‌يه‌تى له‌ليان بكه‌ن وه‌رانوه‌ر وازهاوردن له خوه‌يموختارى.
هيزه‌يل سورياى ديموكرات و يه‌كينه‌يل پاسه‌وان ملله‌ت كورد هويچ وه‌ختيگ جه‌نگ ئه‌را رمانن ئه‌سه‌د نه‌كردن، به‌ڵكوو جارجاريگ هاوكارى وه‌ليا كردن دژ نه‌ياره‌يلى و زويتريش له ئمساڵ گفتگوو سياسى وه‌ل ديمه‌شق ئه‌نجام دان.
وه‌لێ ئه‌و گفتگووه‌يله هويچ ئه‌نجاميگ له‌لى نه‌كه‌فته‌و، ئمجا ئه‌سه‌د دژ باوه‌ڕه‌يل كورد بوێ ك مقه‌يه‌تى له حوكم زاتى هه‌رێمى بكه‌ن.
ئه‌سه‌د و هاوپه‌يمانه‌يلێ له رووسه‌يل و ئيرانيه‌يل، ك جوور سوومه‌ند ته‌ماشايان كريه‌ێد وه‌تايبه‌ت له خوه‌يكيشانه‌وه‌ى ئه‌مريكى، چه‌ويان ها هاوردنه‌وه‌ى ئه‌و خاكه‌يله ك هانه ژير ده‌سڵات هيزه‌يل سورياى ديموكرات ك نزيكه‌ى چواريه‌كى روێوه‌ر سورياس و ده‌وڵه‌مه‌نه وه خاكه‌يل كشتوكاڵى و نه‌فت و ئاو.
له‌و باوه‌ته‌و، وه‌رپرسيگ له هاوپه‌يمان هه‌رێمى ك له‌لايه‌ن ئيرانه‌و پشتگيرى ئه‌كريه‌ێد و پشتگيرى ئه‌سه‌د ئه‌كا ئه‌را روێته‌رز وت: حكومه‌ت سوورى هه‌وڵ هاوردنه‌وه‌ێ ناوچه‌يلى ئه‌ياد دوياى خوه‌يكيشانه‌وه‌ى وڵاته‌يل يه‌كگرتگ.
له ناوچه‌يل كوردنشين له باكوور سوريايش، بڕياره‌يل ترامپ مه‌ترسيه‌يل له په‌لاماره‌يل توركيا قويله‌و كرد، ك زاڵبوين كورد له‌بان باكوور وه مه‌ترسى تاريف ئه‌كا له‌بان ئه‌من و داواى كووتاييهاوردن پشتگيريه‌يل واشنتۆن ئه‌را ئه‌را هيزه‌يل سورياى ديموكرات.
به‌نگين سيدۆ(35 ساڵان)له‌شار ره‌ئسولعه‌ين، روێ له خوه‌ينيشانداين كرد دژ هه‌ر په‌لاماريگ توركى و وت: ئه‌وسا ك ئه‌مريكا وجوود داشت هويچ كه‌سيگ نه‌ترسياد، وه‌لێ ئيسه ترسيه‌يم له هه‌ڕه‌شه‌يل توركيا.
ئه‌حمه‌د سلێمان ك سياسى و له‌يه‌كه‌وده‌ريگ كورده، وت: بڕيار ترامپ هيزه‌يل سورياى ديموكرات خسته مه‌ترسى ك هه‌رچه‌نى نگه‌ران بويه و سياسه‌ت ئه‌مريكا وه‌رانوه‌ر سوريا وه نه‌زانرياگ زانست.
ئه‌حمه‌د سلێمان ئه‌را روێته‌رز وت: پشتبه‌سانن وه ئه‌مريكيه‌يل ئه‌زموون شكه‌شتيه وه‌نسبه‌ت ئه‌را كورد و ئيسه‌يش بژارده‌يل كورد فريه سه‌خته‌و بويه.
ئيسه‌يش مه‌ردمان فريه‌يگ هوير له‌وه ئه‌كه‌ن وڵاته‌يل يه‌كگرتگ چوين ئه‌و سه‌ربازه‌يليه ئه‌كيشێده‌و.
جوشوا لانديس ك شاره‌زايگه له كاروبار سوورى و وه‌ريه‌وبه‌ر ناوه‌ند خوه‌نينه‌وه‌يل خوه‌رهه‌ڵات ناوينه له زانكۆى ئۆكلاهۆما، وت: ئه‌گه‌ر ئه‌مريكيه‌يل وه هه‌ڵه‌په‌ڵه خوه‌يان كيشانه‌و، ئه‌وه ئاژاوه دروس ئه‌دێ، ئه‌گه‌ريش توركه‌يل بانه ناو، ئه‌وه خوين ئه‌ڕشيه‌ێد.
داهاته‌يل سروشتى له ناوچه‌يل كوردنشين، جوور كارتيگ ريككه‌فتن پته‌و ئه‌گه‌ره‌يل بوێ له هه‌ر دانيشتنيگ وه‌ل ديمه‌شق، وه‌لێ بڕيار ئه‌مريكا هه‌ڵويست كورد له هه‌ر دانيشتنه‌يليگ كزه‌و كرد.
دوياخريش جۆست هيتله‌رمان له كۆمه‌ڵه‌ێ قه‌يرانه‌يل ناوده‌وڵه‌تێ وت: هيمان ئاشكرا نه‌ويه كى سه‌رئه‌كه‌فێد، وه‌لێ ئاشكراس كێ زه‌ره‌دمه‌نه. يه‌كينه‌يل پاسه‌وان ملله‌ت و ملله‌ت كورد زه‌ره‌د ئه‌كه‌ن و هه‌ڵويست گفتگووه‌يليان وه ئاسانى بويه سفر.
