چیرۆک دڵداری نا ئاشکرایگ لەناوبەین فەلوجە و کوردستان

شەفەق نیوز/ لە وێنەی بینەزیریگ لەو عراق بڕ لە رووداوەیل زیاندارە، سیمایلیگ رووشن لەناوبەین شار فەلوجە و هەرێم کوردستان ک وەڕاسی باووش کردە هەزاران لە ئاوارەیل « شار مزگەفتەگان» و کوردەگان فرە لە یاد و دڵسوزی هیشتە ناخیان.

دویای میوانیکردنیان ئەرا نزیکەی سێ ساڵ لە شارەیل هەرێم کوردستان وەتایبەت لە سلێمانی و هەولێر و شار شەقڵاوە، ماوەی ئاوارییەگە کاریگەریەیلی لەبان خەڵک شار فەلوجە وەیەکجاری ئاشکراوە بوی لە تابلۆیل دوکانە بازرگانیەگان و خوەراکەگان و چەن پیشەیگ ک وەگەرد خوەیان لە شارەیل هەرێم بردن، وهەمیش ناوەیل پەیابویە نووگانیان جوور شوان و ئاسۆ و شەهین.

لە بنچینەی ٧٠٠ هەزار کەس، زیاتر لە نیم مەلیۆن ئاوارە لە خەڵک فەلوجە دانیشتنە شەقڵاوە و رانیا و حەریر و ناوچەیلیگ لە هەولێر و سلێمانی، و بەشیگیان ماڵ ئەرا خوەیان کردن و بەشیگ لەو کامپەیلە ک هەرێم و هاوکاری رێکخراوە ناودەوڵەتیەگان دروسی کرد.

خەڵک فەلوجە دووپات کەن ک هەرچەن ماوەیل ئاوارەییان تاڵی وزیان لەناوی بوی، بەڵکم فرە هەڵوێست مرۆیی بی شمارەیگ لە خەڵک هەرێم کوردستان دین، ک بویە یاد خوەشیگ وەگەرد خوەیان لە چگنەوەیان ئەرا فلوجە بردن.

محمد دلێمی ( ٤٩ ساڵان) ک خوەی ماموستاس لە خەڵک فەلوجە، لە دویای داگیرکردن فەلوجە لەلایەن داعش کۆچ ئەرا شار شەقڵاوە برد، ئەرا ئاژانس شەفەق نیوز ئووشێد: لەماوەی دوو ساڵ شوونەگەی چەن ماڵیگ لە شەقڵاوە ئاڵشت کرد، و برادەر کورد ئەرا خوەی و هاوسەرەگەی پەیا بوین، و تا ئیسە لە مۆبایل و لە پەیوەندیە کۆمەڵایەتیەگان پەیوەندی وەگەردی کەن، و مکیسیان ئەرا سەردان فەلوجە کرد، تا بەشیگ لە خاسیەگانیان بەێدەو.

دلێمی ئووشێد: هەست وە بیگانەیی نەکردیمن، ئەو شارە ک وە گشت چشتەگانی خوەشە، و هویر کەشوهەوایل زمسان و پیاوە پیرەکان کەم ک لە گەنجەگان خاستر عەرەوی زانن، و ئەرا دانیشتنەیل قورئان لە مزگەفتەگان و ئەو ژنەیلە ک گشت جمعەیگ نان تەنک کەن.

کارەگە تەنیا هەستەیل مرۆیی نەوی، ک محمد حەماد (٤٩ ساڵان)

ئەرا ئاژانس شەفەق نیوز ئووشێد: دویای هاتنەوەی، ناو دوکانەکەی ئاڵشت کردە «سەرچنار» جوور دڵسووزییگ ئەرا ئەو خاسیەیلە لەوەخت ئاوارییەگەی.

دەربارەی ئەو ناوچە، حەماد ئووشێد: رووژەیل خوەشیگ لە هەولێر کوزران کردیمن، هەرچەن زیان وەخوەمان دیایمن هەنای لە تەلەفزیۆن نووڕستیامنە ئەو ویرانیە ک رەسیەسە شارەگەمان، بەڵکم مەردم ئەولا جوور بیگانە وەگەردمان رەفتار نەکردیان، وە پێچەوانەی زیان ئاوەرەیل ئەو ناوچەگان، ئیمە دەسمیەتی لە گشتی دسمن، بەڵکم لە گشت چشتیگ لە ئاست توانایان بەشدارمان کردیان، کورد خاوەن خاسی کەورایگن لەبان خەڵک فەلوجە، و ئیمە ئەوە هیلیمنە هویرمان.

لەلای خوەییش قەحتان محسن ئەو هاووڵاتی فەلوجە ک دوکان چشتەیل ئاوەدانکردن دیرێد، ئووشێد: ناو «شەقڵاوە» بڕیمە باڵای دوکانەگەم، لە خوەشەویشتیم ئەرا ئەو خاوەن دوکانە ک لە هەولێر لەلای کار کردیام، ک خود ناوەگە دیرێد، محسن وتیش: قەت ئەوەگ لەوەخت ئاوارەییەگە ئەرام پێشکەش کردگە لە هویرەو نیەوەم، ئەو برای فرە خاسیگ بوی.

لەلاییگ تر، ئی میوانیکردن کوردە ئەرا برایلیان لە عەرەوەیل فەلوجە، بویە دروسکەر پەیوەندیەیل خیزانیبگ، ک پارێزەر عومەر خالید ئەرا ئاژانس شەفەق نیوز باس لە چەن هاوسەرگیرییگ لە هاووڵاتیەیل لە کوڕ و دوێەت خەڵک فەلووجە وەگەرد کوردەگان لە هەرێم بویە، ک یەکناسین خیزانی لە ماوەی ئاوارەییەگە بویە هووکار ژن و ژنخوازین.

خالید ئووشێد: ئەو ساڵەیلە ک خەڵک فەلوجە لە هەرێم گوزرانی کردن، وەخاسی هاتنەو، وەتایبەت ک دەور ٧٠ لە سەد لە خەڵک فەلوجە لە هەرێم نیشتەجی بوین، وەتایبەت لە هەولێر و سلێمانی.

چیرۆکیگ تر ک ئاژانس شەفەق نیوز لەلی ئاگادار بوی، پەیوەندی وە گەنجیگ دیرێد وەناو هونەر، ک ناسریاگە لەناو خەڵک هەولێر ، هاوسەرگیری وەگەرد دوێەتیگ خەڵک فەلوجە کرد، و دویای کۆنتڕۆڵکردن شار فەلوجە لەلایەن هێزە عراقیەگان و رزگارکردنی، وەگەرد هاوسەرەگەی چی ئەرا شارەگە و لەولا کار خاسیگ ئەرا خوەی پەیا کرد.

هونەر ئەرا ئاژانس شەفەق نیوز ئووشێد: مەردم فەلوجە وە سوپاس گەورایگ وەگەردم رەفتار کەن، و ئەوەیش جوور وەڵامیگ ئەرا رەفتارە خاسەگەمان دوینن ک ئیسە فرە برادەر عەرەو لە خەڵک فەلوجە دیرم.

ئی برایەتی مرۆییە لەناوبەین کورد و خەڵک فەلوجە وەشیوەیگ تریش گەشە کرد، ک عەلی دلێمی نوێنەر کۆمپانیای گەشتیاری کاکو  لە ئەنبار ئەرا ئاژانس شەفەق نیوز ئووشێد: فرە لەو گەشتیارەیل ک لە ئەنبار بەمە هەرێم کوردستان لە خەڵک فەلوجەن، و هەنای رەسنە هەرێم دەسکەنە سەردان برادەرە کوردەگانیان ک لەوەخت ئاوارەیی ناسینەیان.

و سەدان لە خەڵک پارێزگای ئەنبار ماڵەیل خوەیان فرووشتن و لە هەرێم ماڵ سەنن.

ئی چیرۆکەیل جووراجورە لەناوبەین کورد و عەرەو فەلوجە، واتەیل سومبلی رووشانیی فرەیگ هەڵگرن ، لە وڵاتیگ ک فرەجار خەورەگانی خەفەت و زیاندارن، وەتایبەت لەی پەیوەندیەیل مرۆییە ک دروس بوین، ک لە تاریکترین رەوشەگان هات ک هەرێم کوردستان و عراق وەپیا رەد بوون، لە وەردەم ئەو مردن فراوانە و دووچەوەکی ئاینی و نەتەوەیی و مەزهەوی ک چەتەیل داعش هاوردنەیان.