راپۆرتیگ بەریتانی گومان لە شکست داعش کەێد

2023-01-09T10:37:26.000000Z

شەفەق نیوز/ گۆڤار "سبيكتاتور" بەریتانی، لە راپۆرتیگ لە باوەت ریخریاگ داعش وت: هیمان شکست وە ریخریاگ داعش تەواو نەویە، و ئەگەر کار لە کۆتاییهاوردن و هویر ئەو ریخریاگە نەکریەێد، تایبەت لە عراق و سوريا، وەنە رخەگەی دووارە نووەو بوود.

گۆڤارە بەریتانیەگە لە راپۆرتەگەی وەناونشان «داعش و ئەو بومبە ک هاتێ لە هەر وەختیگ بتەقێدە روی خوەرئاوا» ک ئاژانس شەفەق نیوز ئەڵگەردانی کرد دووپات لەوە کرد ک داعش هیمان نەچیەسە ری، هەرچەن یە نزیکەی چوار ساڵە  جەهان ئاهەنگ شکستهاوردنی کرد، دویای ئەوە ک زیاتر لە ٣٠ هەزار گورز ئاسمانی لەبانی وەشیا، و دەیان هەزار لەلی کوشیا، دویای ئەوە ک ناوچەیگ وەئەندازەی بەریتانیا داگیر کردوێد.

 

جەنگەگە تەواو نەویە

ئەو راپۆرتە گومان لە کوتاییهاوردن وە داعش کرد ک وت: جەنگ لەبان داعش نەوسیایە، و سوپای ئەمریکا لەی دویاییە راگەیان ک پارەکە نزیکە ٧٠٠ جەنگاوەر لە داعش کوشتیە و ٤٠٠ تریش دەسوەسەر کردیە لە عراق و سوریا، لە وەختیگ ریخریایەگە زیاتر لە ٥٠٠ پەلامار لەبان زەوی عراق و سوریا جیوەجی کرد.

 راپۆرتەگە باس راگەیانن شکست داعش لە باغوز لە خوەرهوڵات سوریا لە ئادار ٢٠١٩  کرد، ک  ئەمریکا و هاوپەیمانەیلی دەسوەردان گورجیگ جیوەجی کردن، وە ئۆپراسیۆنەیلی وەگەرد سوپا لە عراق، و میلیشیایل دژوە داعش لە سوریا، و خستن قورسی جەنگکردن وەبان گەردن دانیشتگەیل لە وەختیگ وەلایەن ئیمە پاڵپشتی کریەن.

 باوجی راپۆرتەگە دیاری کرد ک وەرجە ئی شکست داعشە، ئەو ریخریاگ تیرۆریە دەسکردە کارەیلی ک لە «دەوڵەت» خوەی ئەرا  یاخیبوین ئاڵشت کرد، ئەراوە جەنگکردن وەگەردیان سەختترەو بوی، ک داعش دەسکردە کارکردن لە تاریکی، و وەڕی شانەیلیگ بویچگ پەلامار ناکاوی جیوەجی کەن، و زەوی خوەیان شارنەو،  و بەشیگ لە ئەندامەیلی هانە ناوچەیل داینشتگی، و فرەیان هانە ناوچەیل بیاوان و کوێە.

چزداین و رخبردن 

هەرچەن راپۆرتەگە وت: شمارەی پەلامارەیل داعش لە عراق و سوریا هیمان کەمە، باوجي وتيش؛ ئەو پەلامارەیلە ئاڵووز و بکوشن، ک ٢٥ کەس لە نیمەی دویەم کانون یەکەم لە عراق کوشیانە، ک هیشت محمد شیاع سودانی سەرۆک حکومەت باس شکست دیاریگ لەلایەن حکومەت و سوپا بکەێد.

 لە سوریا، راپۆرتەگە وت: داعش توەنست بچوودە ناو دامەزراوەیل سەربازی ناسک لە باکوور خوەرهەڵات وڵاتەگە، و نزیکەی ٢٠ کەس لە مانگ گوزەشتە کوشت.

سوپا راسیەگە هاناو زیندان

وەگەرد ئەوەیش، تاوانەیل چزداین و بردن سەرانە و رخبردن وەشیوەی گەورەیگ لە عراق و سوریا دووقاتەو بوی، لە وەختیگ پەنابردن داعش وە خوەیکوشەیل و ماشینەیل بومبی زیایەو بوی، ک توانای گەشەکەریگ دروس کەێد، ک پسپۆڕەیل دژەتیرۆر نووڕن یە نیشانەی ئەوزەڵکردن یاخیبوینە، و داعش لە وەرگری هاتە پەلامار.

هەرلیوا، راپۆرتەگە «دانیشتن لەناو زیندان» وە توانایگ ئەرا داعش دادە قەڵەم، ک وت: نزیکەی ٣٠ هەزار جەنگاوەر هاتە ناو زیندانەیل عراق و سوریا، ک وەگورەی سوپای ئەمریکا یانە سوپا راسیەگەی داعشن.

ئەو جەنگاوەرەیلە لەناو زیندانەیل، لە دەیان دەوڵەت هاتنە، و حکومەتەیل وڵاتەیلیان نیەخوازن گلەو بخوەن، و میژوو داعش پڕە لە کارەیل وایین لە زیندان، و ئیجویر کاریگ دویر نییە بوودە شۆڕش گەپیگ، و باس ئەوە کرد ک لە کانون دویەم ٢٠٢٢ بوی، ک ئەو وایین فرە لە زیندان حەسەکە و ئەو تەقە و جەنگە ک رەسیە کوشتن ٤٢٠ ئەندام لە داعش و ١٢٠ لە جەنگاوەرەیل سوریا.

 وەگەرد ئی کەسەیلە، هەمیش نزیکەی ٦٠ هەزار ژن و مناڵ هانە ناو کەمپەیل گیرهاوردن لە باکوور خوەرهەڵات سوریا، و نیمەیان تەمەنیان ها خوار ١٢ ساڵان، لە وەختیگ سوپای ئەمریکا هوشداری کەێد ک بوونە نەوەی نوویگ لە داعش، وتیش: داعش یانە خەێدە ناو هەڵمەت پرۆپاگەندە ئەرا ئازادکردنیان.

دویای ئەوە ک راپۆرتەگە وت: یە لە سێ چارەک ٦٠ هەزارەگە لە عراق و سوریان، وتیش: تەقەلای گلەوداینیان فرە یەواشە، و تەنیا چوار هەزار لە ٢٧ هەزار عراقی لە ساڵ ٢٠٢٢ گلەو دریان، و سوریەگان گلەوخواردن لەناویان نییە.

 لە باوەت نزیکەی ١٠ هەزار لە نزیکەی ٦٠ دەوڵەت هاتنە، سەختیەیل سیاسی و یاسایی و لۆجیکی فرەیگ لەنوای گلەوخواردنیان هەس.

دیاری کرد ک لە ساڵ ٢٠٢٢، هەرچەن پشتگیریکردن ناودەوڵەتی ئەرا گلەوداینیان ئەرا میلکانیان هەس، باوجی تەنیا ٥٣٧ لەلیان گلەو دریانە، و وەرەوە گلەوداین مناڵەیل ئەرا نیشتمانیان زیاتر لە ٣٠ ساڵ خوازێد، و ئەو زاڕووەیلە گشت مناڵییان لەناو ئەو کەمپەیلە گوزەران کەن، و لەبان خوەسەهاتن ئەو وەرپرسەیلە گەورە بوون ک لەی شوینە گیریان هاوردنە.

زایین مناڵەیلگ باوگ نەناسیاگ 

تا کارەگە زیاتر بەدەو بەود، راپۆرتەگە وت: سوپای ئەمریکا دووپات کەێد ک هەر مانگیگ نزیکەی ٨٠ زایین لەناو کەمپەیل هەس، هەرچەن ٩٥٪ لە دانیشتگەیل کەمپەیل ژن و مناڵن، وتیش: لەسای هەسی ٣٠ هەزار زیندانی لە نیر، و ٦٠ هەزار ژن و مناڵ، قەیران دەسگیرکریایل داعش رخ گەورەیگ دروس کەێد.

 هەرچەن راپۆرتەگە وت: رخبەرترین ئۆپراسیۆنیل ئیسەی داعش کەفتیەسە ئەفریقا، جویر مالی و نەیجیریا، باوجی وتیش: بڕواکردن وە تیرۆرستەیل لە کۆتایی تەنیا لە سەرکردەیل داعش لە عراق و  سوریا تیەێد.

راپۆرتەگە لە کۆتایی هوشداری کرد ک تەقەلایل ئیسە ئەرا نواگردن ریخریاگ داعش پەیوەندی وەوە دیرێد داعش بگیریەێدە قەرە، وتیش: شکستهاوردنی شیوەیگ جیاواز لە جەنگ ساڵ ٢٠١٩ خوازێد، هەمیش داهاتەیل فرەتر خوازێد، وتیش: ئەگەر لەیە شکست هاوردیمن، ئەو باس کۆنە، جار لە شوین جار، بوودە باس نوویگ.

ئەڵگەردان: ئاژانس شەفەق نیوز.

Shafaq Live
Shafaq Live