خاوەن دوو وەهار گوڵی نێمینێد

شەفەق نیوز/ سێ ساڵ لەبان رزگارکردن مووسڵ وەسەرچگ، وهیمان زەنگ کلیسەگان بی دەنگن، ودەرەیلیان بەسیانە تا خودا زانێد کەی، دەیان لەو کلیسەیلە کەفتنە وەر تاڵانکردن و ویرانی وەدەس چەتە تیرۆريستەگان، هەرچەن لە دەس تیرۆر قورتار بوینە، بەڵکم تا رووژ ئمڕوو، هیمان هانە پشتگوشخستن حکومەتی.

یا ئیسلام یا باج

هیمان لەناو هویرمان له‌ باوه‌ت مووسڵ ک وەپی ئووشن «خاوەن دوو وەهار» ئەو یادەیل سیا جیگر بوینە، هەنای چەتەیل داعش داگیر شارەگە کردن، و وەزوی چەویان نانە بان خیزانەیل و دارایی مەسیحیەگان لەناو ئی شارە، و نیشانەیلیگ کیشانە ماڵەیلیان، گوایە «دەوڵەت ئسلامی» بویە خاوەن ئی ماڵەیلە، دویای تەنیا مانگیگ لەو داگیرکردنە، بەیاننامەی تیرۆرستەگان ئەو مەسیحیەیلە خستە دەسپاچەی دوو پەسەن، یا بوونە ئیسلام، یا باج بیەن، یا وەیەکجاری لە مووسڵ دەربچن.

هەرلیوا، لە «ری جەلجەلە»ی نوویگ، دەیان هەزار لە مەسیحیەگان بان گردنە وەر، و لەشارەگە دەرچگن، وەرەو هەرێم کوردستان و هاماری نەینەوا، و دی نەچگنەو، و فرەیان دەرچگنە دەیشت عراق، بەڵکم هیمان میلکانەیل مووسڵ و کلیسەگانی هویر  خاوەن خوەیان کەن، وهیمان هاوسایل جارانییان لە بسەڵمانەیل، ئومید هاتنەوەیان دیرن، ک یەکیگ لە خەڵک شارەگان باسیان وە «گوڵەیل مووسڵ» کرد.

کلیسەگان بارەگا و زیندان بوین

ئەبولعەباس، یەکیگە لە دانیشتوەیل کویچەی مزگەفت نووری گەورا، ک تەنیا ١٠٠ مەتر لە کلیسەی ساعە دویرە، ئەرا ئاژانس شەفەق نیوز ئووشێد: تا سێ ساڵ کلیسەگە کریا بارەگا ئەرا ریخریاگ داعش و جوور زیندانیگ ئەرا بەندینکردن.

ودیاریکرد ک تیرۆرستەگان ژیر زمینەیل کلیسەگان ئەرا ئەوە وەکار هاوردیان، وهەمیش چوونکە ئەندامەیل ریخریایەگە مەزەنە کردیان ک هێزەیل هاوپەیمان ناودەوڵەتی ئی کلیسەیلە نێەکەنە ئامانج، چوونکە شوون پەرستگایین، و هەمیش چوونکە کەلتووری و ئاسەواریبن، و هەرلیوا کلیسەی تاهیڕە ک هەمیش بارەگای حیسبە بوی، و پیاوەگان لەناوی گیرهاوردیان وە توومەت ریش تاشین و وەمزگەفت نەچگن یا جگارە لەلایان بویە.

ئەبولعەباس هەمیش ئووشێد: یادەیل ژیانمان وەگەرد مەسیحیەگان جوور یەک خیزان بویمن، و لەلیان هەس پەیوەندی کەن و هەواڵ هاوساگان پرسن، و یاد ژیان ئارام جارانییان کەن ک وەبی جیوازی و ململانەیلیگ تایفەیی بویە.

وە هەناسەی بڕ لە خەفەتیگ، ئەبولعەباس پەنجە وەروو ماڵیگ دڕا کەێد ک ویران کریاگە، و ئووشێد؛ ئەوە ماڵ عاید ئاسۆ بوی بازیگەر تووپان لە یانەی مووسڵ، ک خوەی نزیکترین ماڵە لە مزگەفت نووری.

ئەبولعەباس وتیش؛ عاید لە خاسترین هاوساگان بوی، و تا ئمڕوو هیمان برادەریانە، وهەر ماوەی جاریگ هەنای سەردان عراق کەێد تیەێد ئەرا ناوچەگە، و پرسیار لە رەوش خەڵکەگەی و برادەرەیل هاوتەمەنی کەێد، بەڵکم دویای ئەوەگ لە دەیشت وڵاتەگە جینشین بوی، ئومید هاتنەوە نەیرێد، لەوەر ئەو نەهامەتیەیلە ک وە سەریان هات. ئەبولعەباس لە کۆتایی قسەگانی دەربارەی مەسیحیەیل مووسڵ وت: مەسیحیەگان گوڵەیل مووسڵن.

تەنیا پەنجا خیزان مەسیحی هاتەو

ئاب رائید عادل وەرپرس کلیسەیل سریان کاسۆلیکی لە مووسڵ ئەرا ئاژانس شەفەق نیوز ئووشێد: ژمارەی خیزانە مەسیحیەگان ک ئەرا شارەگە هاتنەسەو، رەسێدە تەنیا ٥٠ خیزان هانە هەردوگ لای شارەگە.

هەمیشە ئاماژە کرد ک تەنیا یەک نماز قوداس هەس، هەر رووژ یەکشەممەیگ لە کلیسەی بەشارە لە گەڕەک موهەندسین کریەێد، ک ئەو کلیسەیل شارەگە بەسیانە، و چەوەڕی  خاسەوکردنن.

وتیش؛ تەنیا کلیسەیگ هەس ک رێکخراو یونسکۆ کار لە خاسەوکردنی کەێد، ک خوەی کلیسەی تاهیڕە لە شارە کۆنەگە لە نزیک بازاڕ شەعارین، و ئەو کلیسەگان زەنگەیلیان بی دەنگن و دەرەیلیان بەسیانە، و کار فرەیگ خوازن تا بانەو.

لەباوەت هاتنەوەی مەسیحیەگان، ئاب رائید وت؛ باوەت هاتنەوەیان گریەبەسە وە هاتنەوەی ئارامی وەشیوەیگ گشتی ئەرا پارێزگاگە، و لە گشت چینەگان، و کارەگە گرنگی گەوراتر خوازێد، و هەرچەنی ئەوە دابین کریا، ژمارەی خیزانەگان ک تیەنەو فرەوە بوود.

دەربارەی کردەوەیل تیرۆرستەگان وە مەسیحیەگان، ئاب رائید ئووشێد؛ بسەڵمانەگان فرەتر زەرەدمەنن لە دەس تیرۆر، و نەباید نووڕستنەگە گشتگیری بوود، و ئەگەر چەکانن لە کۆمەڵگا بوود و هەست تایفەیی بوود، ئەوە ئامانج راسی تیرۆرە، و ری وە ئەنجامدانی نیەێمن.

جەژنەگان گردمانەو کەن

لە چگنەوە وەرەو کویچەیل شارە کۆنەگە، خاڵو ئەحمەد، ک یەکیگە لە دانیشتوەیل ناوچەی مەیدان لەبان چەم دیجلە، ئووشێد: جەژنەگان ئەوسا مەسیحیەگان و بسەڵمانەگان گردەو کردیاد، و لە گشت جەژنیگ قاوەیل شیرینی گەردیانە کویچەیل ناوچەگە لە ماڵ ئەرا ماڵ ئەرا پێروزبایی.

خاڵو ئەحمەد ئووشێد؛ لە جەژنەیل بسەڵمانەگان، مەسیحیەگان کولیچە خواردیان، وداڵگم کولیچە خاسەگان ئەرا هاوسا مەسیحیەگان پەسەن  کردیاد، و ئەوانیش لە جەژنەیلیان هەمیش شیرینی ئەرامان هاوردیان، وتیش؛ لە هویرم نیە رووژیگ مرافەیگ لەناوبەینمان بویە، و دەیان ساڵ جوور یەک خیزان گوزران کردیمن.

ئەحمەد دووپاتکرد ک زیانەیل تیرۆر ئەرا مەسیحیەگان مووسڵ لەدویای داگیرکردن عراق لە ٢٠٠٣ تا ساڵ ٢٠١٤ وەختا مووسڵ کەفتە دەس داعش، هەزاران لەلیان ناچار کۆچبردن کرد، و شارەگە بیلنەجی و تەنیا چەن کەسیگیان هاتنەو.

ئەحمەد هووشداری لە سیمای رخبەریگ کەێد، ک ئمڕوو لە دویای سێ ساڵ لە رزگارکرن شارەگە، بڕیگ لە دەسەڵاتدارەگان هەس، تەقەلا دەن دەس بنەننە بان ماڵەیلیان چوونکە لە وڵاتەگە دەرچگنە.