جه‌نراڵيگ "په‌شيمان" ئه‌مريكى باس له بريار كوشتن سلێمانى له عراق ئه‌كا
شه‌فه‌ق نيوز/ ستانلى ماكريستال جه‌نراڵ خانه‌نشين ئه‌مريكى، ك سه‌ركردايه‌تى فه‌رمانده‌يى هيزه‌يل ئه‌مريكاو هاوپه‌يمان ناتۆ له ئه‌فغانستان له ناونى ساڵه‌يل 2009 و 2010 وه‌ده‌سيه‌و بوێ، تاريف قاسم سلێمانى سه‌ركرده‌ى فه‌يله‌ق قودس سه‌ر وه پاسه‌وان شووڕش ئيرانى وه كه‌سيگ فريه مه‌ترسيدار كرد.
ماكريستال له باوه‌تيگ له گۆڤار فۆرين پۆليسى ئه‌مريكى خه‌ته‌رناكى قاسم سلێمانى بڵاو كرد ك وه‌هيزه‌و ناوى ده‌ركه‌فت له‌ى ماوه‌ى دوياخره وه‌تايبه‌ت له عراق و سوريا.
ماكريستال له باوه‌ته‌گه‌ێ په‌شيمانى خوه‌ێ ده‌رخستگه له‌وه‌ر ئه‌وه‌گ بڕيار يه‌كلاكه‌ر نه‌ياگه ئه‌را كوشتن سلێمانى له‌ساڵ 2007 و وت: سه‌ختترين هه‌ڵويستيگ ئه‌وه‌سه ك سه‌ركرده بڕيار گورج و يه‌كلاكه‌ر نه‌يه‌ێد هه‌ناى ك ده‌رفه‌ت ئه‌راێ هه‌ڵكه‌فێد.
ئى جه‌نراڵ ئه‌مريكيه باس له‌و هه‌ڵويسته ئه‌كا له‌ساڵ 2007 هه‌ناى ك كاروانيگ سه‌ياره له ئيرانه‌و هاتگه وه‌ره‌و باكوور عراق له‌وه‌خت كاره‌گه‌ێ جوور سه‌رۆك سه‌ركردايه‌تى فه‌رمانده‌يى تايبه‌ت سه‌ربازێ ئه‌مريكى هاوبه‌ش JSOCئه‌را ماوه‌ى چوار ساڵ له عراق له چوارچێوه‌ى هه‌وڵه‌يلى ئه‌را داناين مه‌رزێگ ئه‌را تيرۆر ك ناوچه‌گه ويران كرد.
ماكريستال باس له‌وه كرد ك تواسگه بڕيار يه‌كلاكه‌ر بيه‌ێدد له‌وه‌ختيگ سه‌خت، وه‌لێ بژارده له‌و شه‌وه له مانگ يه‌نايه‌ر جوور ئه‌وه‌گ خوه‌ى باس له‌لێ ئه‌كا فريه سه‌خت بويه چ ئه‌را په‌لامارداين يا ئارامگرتن و په‌لامار نه‌داين كاروانه‌گه ك قاسم سلێمانى سه‌ركرده‌ى فه‌يله‌ق قودس له‌تى بويه.
ئى جه‌نراڵه باس له‌وه‌يش ئه‌كا هووكاريگ له‌و وه‌خته‌يليشه بويه ئه‌را له‌ناوبردن سلێمانى، ك له‌و وه‌خته‌يله ته‌قينه‌وه‌يل له ده‌سكرد ئيرانى ك كنار جاده‌يل وه‌پى مينڕيژ كرديان هووكار بويه‌و له‌ژير فه‌رمان ئه‌و بويه‌و گيان سه‌ربازه‌يليگ فريه‌ى ئه‌مريكى له‌گشت عراق له‌ده‌سداگه.
ماكريستال هووكار نه‌داين بڕيار يه‌كلاكه‌ريش ده‌رخست و وت: نه‌وتواسگه جه‌نگ و كوشتار به‌رپا بكاو هه‌ڵويست سياسى و جى مشتومڕ له‌لى بكه‌فێده‌و.
دى ماكريستال بڕيار داگه چه‌ودێرى كاروانه‌گه بكريه‌ێد نه‌ك هه‌ڵه‌په‌ڵه په‌لامار بدريه‌ێد، ئمجا ئويشيد وه‌ختيگيش ك كاروانه‌گه ره‌سيه هه‌ولێر سلێمانى له‌ده‌س ده‌رچێ و خوه‌ێ شارده‌و.
وه‌ل ئه‌وه‌يشا باس كرد و وت: سلێمانى له‌و رووژه‌يله دوير له‌وه‌رچه‌و كار كردياد، وه‌لێ دوياخر له سه‌ركرده‌يگ سه‌ربازى نه‌ناسرياگه‌و ئالشت بوێ ئه‌را كه‌سيگ خويناوێ و كاريگه‌رى ئيرانى له ده‌وڵه‌يل هاوسا پته‌و كردياد.
له هه‌مان وه‌خت ماكريسال باس له‌وه‌يش كرد ك لێدوانه‌يل شماره‌يگ له وه‌رپرسه‌يل له وه‌زاره‌ت وه‌رگرى ئه‌مريكا(پنتاگۆن)ئه‌وه ده‌رخه‌ن ك سلێمانى وه ته‌نيا ئداره‌ى جه‌نگ ناوخوه‌يى سوورى كردگه له‌ڕێ وه‌كراگيرياگه‌يل ناوچه‌يى ئيرانى.
ئاماژه وه‌يه‌يش كرد ك سلێمانى له‌ساڵ 1979 له‌وه‌خت جايه‌ڵى چيه‌سه ناو شووڕش ئيرانى هه‌ناى ك 22 ساڵ ته‌مه‌نى بويه‌و دوياى شه‌ش مانگ له مه‌شق پله‌ى به‌رز بويه وه‌رجه ئه‌وه‌گ جه‌نگ وه‌چه‌و بوينێد له ژيانى له كه‌رت ئازه‌ربايجان خوه‌رئاوا له ئيران.
ئاشكراى يه‌يش كرد ك جه‌نگ ناونى عراق و ئيران سلێمانى ده‌رخستگه‌و وه ڕاسى كوڕ ئه‌و جه‌نگه‌سه ك دوياى ساڵيگ ده‌س وه‌پيكرد.
سلێمانى نه‌ك ته‌نيا سه‌ربازيگ، به‌ڵكوو بويه كه‌سيگ وه‌بى وچان كاركرد له‌وه‌ر خاتر دامه‌زرانن په‌يوه‌نديه‌يليگ هه‌ميشه‌يى ك هه‌ڵويست ئيران له ناوچه‌گه وه‌پى پته‌و بكا.
ته‌نانه‌ت هويچ كه‌سيگ تر جوور سلێمانى كار ئه‌نجام و ده‌سكه‌فت ئه‌نجام نه‌ياگه له پاڵپشتى و تواناداركردن هاوپه‌ويمانه‌يل شيعه‌ى ئيران له وڵات شام.
ماكريستال باوه‌ڕى ئه‌وه‌سه هووكاريگ تر گرنگ هه‌س ئه‌را پاڵپشتى له سلێمانى، ك ئه‌ويش ئه‌و ماوه‌ى دريژه بويه ك برده‌سه‌ى سه‌ر جوور سه‌ركرده‌ى فه‌يله‌ق قودس و له‌ساڵ 1998ه‌و ئه‌و پۆسته وه‌رگرتگه. سلێمانى ئازادى جموجويل داشت له‌ى ماوه‌ى دوير ودرژه يه‌يش وه‌گووره‌ى قسه‌يل جه‌نراڵه خانه‌نشينه ئه‌مريكيه‌گه.
دوياخريش ماكريستاڵ باوه‌ته‌گه‌ى وه خه‌ته‌رناكى سلێمانى كووتايى وه‌پى هاوردگه‌و جوور كه‌سيگ فريه خه‌ته‌رناك تاريفى كردگه.
