بلاسخارت مرجیگ دیاریکەێد ئەرا نەکەفتن عراق لە سەرەوخواری مەترسیداریگ ولێدوان دەێد لە دانوستانەگان بەغداد- هەولێر
شەفەق نیوز/ جینین بلاسخارت نۆێنەر تایبەت ئەمیندار گشتی نەتەوە یەکگرتووەکان لە عراق، وت؛ هەڵبژاردن زوینەی هاتگ لە عراق گرنگی گەورایگ دیرێد، وهەمیش ئاماژە کرد وە ئەنجامدانی وەشیوەی خاسیگ، ک شایەت مزگانی بیەێد وە ماوەیگ لە پێشکەفتن وڵاتەگە.
ئەویش لە چەوپیکەفتن ئاژانس شەفەق نیوز هات وەگەرد جینین بلاسخارت نۆێنەر تایبەت ئەمیندار گشتی نەتەوە یەکگرتووەکان لە عراق.
پرسیار لە بلاسخارت کریا لە سروشت هووشداریەگەی لە کەفتن عراق وە سەرەوخواری مەترسیداریگ، ئەویش دویای چەوپیکەفتنەگەی وەگەرد مەرجع سیستانی لە نەجەف، وەڵام دا: حکومەت عراق پەیماندا لە ئەنجامدان هەڵبژاردن زوینەی راستگو، و ئەیە وڵامیگە ئەرا داواکاری جەماوەری سەرەکی، ولە فرە وەخت وتیمن وهیمان دووپاتکەیمن؛ ک هەڵبژاردنەگە عراقیەگان سەرپەرشتیی کەن وعراقیەگان خاونیین، وفرە گرنگە چشتەگان لە شوون گونجیاگ خوەیان دانریەن، چوونکە هەڵبژاردن ئازاد وخاوەن راستگوی گرنگە ئەرا بنیادناین بڕوایی جەماوەرەگە، وبڕوایی جەماوەر گرنگە ئەرا وڵاتەگەیش، ئەرا وەرەونوا چگن لە بڕیگ لە باوەتەگان، یا خوەی گام گرنگیگە ئەرا چارەسەرکردن سەرقاڵی مەردم، ونۆێنەرایەتی جەماوەری ونووەوکردن ژیان دیموکراتی، ک خوەی مقەیەتی تەندروسیی و چالاکیی کەێد،ئەراوە هەڵبژاردن هاتگ گرنگی گەورایگ دیرێد، ئەگەر وەشیوەی خاسیگ ئەنجام دریا، شایەت مزگانی وە ماوەیگ لە پێشکەفتن بیەێد.
لەلاییگ تر، پرسیار لە بلاسخارت کریا لە دەور نەتەوە یەکگرتووەکان لە کەمەوکردن بووشاییەگە لە پەیوەندیەگان لەناوبەین بەغداد وهەرێم کوردستان، وئایا لە رییگ هەس ئەرا چارەسەرکردن ئەو گرفتەیلە وەشیوەیگ سەرەکی؟ وت: ئیمە هاندەیمن ئەرا وەردەوامی گفتوگۆەگان دەربارەی گشت باوەتە گیرهاتگەگان لەناوبەین بەغداد و هەولێر، ولە بنەمای دەستور عراق، وئی گفتوگۆەیلە وەردەوامن، وئیمە خوەشحاڵیمن وە هەست هاوکاری بەرز لەی ماوەی دویاییە.
وتیش؛ بەڵکم لە کۆتایی چارەسەریە هەمیشەییەگان داواکریانە، وئیمە گشتمان زانیمن ک بنەما گشتیەگان ک لە دەستور چەسپیانە میکانزم جیوەجیکردن خوازن، ولەوەخت نووسینگەی ئی میکانزمەیلە دیاری نەکریان، و وەداخەو، لە وەختیگ دەستور وەکارهاوریا لە ساڵ ٢٠٠٥ ، تەنیا پێشکەفتن کەمیگ - ئەگەر بوود- وەدەس هاورد لە رێککەفتنەگان ک وەئاشکرا دیاری کەن ماف وپابەندیەگان بەغداد وهەولێر ، ئیجا ووردە ووردە بتەوکردن سیستم فیدڕاڵی، و شاند یۆنامی هەمیشە ئامادەس ئەرا دەسمیەتی وە هەر شیوەیگ لە سەر داواکاری هەردوگ لایەنەگە.
