ئایندەیگ تاریک.. رویکردن فرەیگ لە عراقیەگان ئەرا پەیاکردن وڵاتیگ تر

شەفەق نیوز/ ئەحمەد، ئەو گەنجە ک خوازێد دویارووژ خاسیگ ئەڕا مناڵەیلی دابین بکەێد، زانێد ئەوە لە عراق وەدەس نیەکەفێد، تا ئی رەوشەیل سیاسی و ئابووریە وەردەوامن لە خراوی، هەرچەن خوەییش لە کەرت کورجیگ  جوور  «نەفت» کار کەێد.

خراوی رەوش ئابووری و سیاسی لە عراق هیلێد فرە لە گەنجەیل عراق بکەفنە مینەی شناسنامەی دەوڵەتیگ تر  و پاسپۆرتیک تر، دەرفەت ئومیدیگ بیەێدە خوەیان و مناڵەیان ئەرا ژیانیگ خاستر.

ئەحمەد حەسن، کوردە لە خەڵک هەولێر، لە یەکیگ لە دامەزراوەگان کار کەێد ک خزمەتگوزارییەیلیگ نەفتی پێشکەش کەێد، و پویل کەفێدە دەسی تا خوەی و خیزانەگەی گەشتیاری ئەرا دەوڵەتەیل جهان بکەن، بەڵکم پاسپورتە عراقیەگە بویەسە ریگریگ لە نوای ک ڤیزای دەوڵەتە ئۆڕوپیەگان و ئەمریکا و کەنەدا وە ئاسانی وەپی نێدریەێد، ئەوە ک هیشت ئەحمەد و فرەیگ تر، مینەی رییگ بکەن ئازادی گواستنەوە وەپیان بەێد لە هەر وەختیگ بخوازن.

ئەحمەد ئەرا ئاژانس شەفەق نیوز ئووشێد: لە وەرجە ساڵیگ زیاتر، مینەی شناسنامەیگ یا پاسپۆرتیک تر کەێد، دویای ئەوەگ لە ماڵپەڕە ئەلیکتڕۆنیەگان پرۆپاگەندە ئەرا ئیجوور چشتیگ دی، و لەماوەی یەک ساڵ تەقەلای ئی کارە دا، چوونکە رووژانە نووڕێد ک رەوشەگان خراوترەو بوون.

ئەحمەد نووڕێد ک   ئەگەر مناڵەگانی خوەنستن زانکۆیان لە دەیشت عراق تەواو بکەن دویارووژیان رووشنترەو بوود، چوونکە ئاست زانکۆەگان لە وڵاتەگە خراوەو بوین، بیجگە خراوبوین ئابووری و سیاسی.

لە عراق چەن کۆمپانیایگ بڵاوبوین ک کار لە وەرگردن شناسنامەیگ تر کەن، لە ری پڕۆژەی بەرهەمهاوردن لەو شناسنامە ک چەن دەوڵەتیگ راگەیانن وەتایبەت دەوڵەتە ئۆڕوپیەگان.

رانیا عەواد خانمە وەڕێۆبەر هەرێمی کۆمپانیای بلومینا ک بارەگاگەی هالە کوردستان، ئووشێد: داواکەرەیل شناسنامە و پاسپۆرتیگ تر فرەن ک هیشت نووسینگەیگ تر لە هەرێم بکەنەوە، و دیاریکرد ک دوو نووسینگەگە داواکاریەگان لە گشت شارەیل عراق وەرگرن.

عەواد خان دیاریکرد ک فرەترین ئەو دەوڵەتەیلە ک شناسنامە و پاسپۆرتی دوویەم دەن جوور؛ مولودۆفا، ماڵتا، قوبرس، ئیسپانیا ، پورتوگال، یونان لە ئۆڕوپا، و دەوڵەتەیل کاریبی جوور سانت کیتی و نیڤیس و دومینیکان و. ئەنتیگوا و بەربودا و دەوڵەت گرینادا و سانت لوسیا، و هەمیش بەرنامەیل نیشتەجیبوین و پاسپۆرت دوویەم لە تورکیا، و بەرنامەی EB-50 لە ئەمریکا.

وەڕێۆبەر هەرێمی کومپانیای بلومینا هەمیش ئووشێد؛ عراقیەگان روی کەنە بەرنامەی نیشتەجیبوین هەمیشەیی و شناسنامەی دوویەم، وەتایبەت لەبان دوو دەوڵەت سانت کیتی و نیڤیس ک هاتە ناوچەی دەریای کاریبی، و دەوڵەت ماڵتای ئۆڕوپایی، ئەرا ئەو سوودەیلە م ئەو کەسەیلەگ نیشتەجیبوین و پاسپۆرتیان وەرگرن، هەمیش لەوەر خەرجە گونجایایەگان، و ئاماژە کرد ک فەرەترین ئەو پارێزگایل عراقیە ک روی کەنە شناسنامە خوەیان؛ هەولێر، سلێمانی، بەغداد.

دەربارەی ماوەی دەرچگن شناسنامە یا پاسپۆرت دوویەم، عەواد ئووشێد؛  هەر دەوڵەتیگ و هەر بەرنامەیگ ماوەی دەرچگن شناسنامەگەی جیوازە، وەلی وەشیوەیگ گشتی ماوەگە هالە ناونی ٣ تا ٩ مانگ لە وەخت داواکاریەگە تا رەزامەنیەگە لە دەوڵەتەگە دەرچوود تا قاقەزەگان رەوانە کریەن.

عەواد ئاماژە کەێد لە هەسی رەتکردن لە بەشیگ لە داواکاریەگان، ک ئەگەر رەتکردن بوود ئەوە کەفێدە رابردوو ئەو کەسەگ داواگە خستیەسە وەردەس، چوونکە دەوڵەتەگە ووردبینی و لێکۆڵینەوەی فراوانیگ لە باوەتەگەی کەێد.

هەمیشە ئەو دەوڵەتە ک شناسنامەگە دەێد، لەڕی پۆلیس ئەنتەرپۆڵ ناودەوڵەتی راپۆرتەگان وەرگرێد، و لە باوەت خەرج وەرگردن شناسنامە یا پاسپۆرتەگە، و ئایا بایەدە هاووڵاتییەگە بڕەسێدە ئەو وڵاتە یا پاسپۆرت و شناسنامەگەس رەسێدە عراق، وەڕێوبەر کۆمپانیاگە ئووشێد؛ خەرج بەرنامەی شناسنامەی دەوڵەتەیل ناوچەی کاریبی لە ١٠٠ هەزار دۆلار دەسکەێدە پی، و خەرج بەشیگ لە بەرنامەیل دەوڵەتەیل  ئۆڕوپا رەسێدە ٢ مەلیۆن یۆرۆ.

دەربارەی مەرج گەشتکردن ئەرا دەوڵەتەگە، و رەسین پاسپورتەگە ئەرا عراق، عەواد خان ئووشێد، بەڵی، پاسپورتەگە رەسێدە خاوەنەگەی لە شوینەگەی خوەی، و دەوڵەتەیلیگ هەس مەرج رەسین ئەرا ناویان دانەن و قەسەم خواردن و پەنجەموور کردن ئەرا دەرکردن پاسپۆرتەگە و دەوڵەتەیلیگ هەس ئی مەرجەیلە نەیرن.