ئایا کامپ جەدعە جوێ کامپ هۆلە ؟

شەفەق نیوز/ چەن ساعەتیگ لە رەسین کاروان کامپ هۆل سوری نەچگ، هەنای نزیکەی ١٠٠ خیزان لە ئەندامەیل ریخریاگ داعش تیرۆرست بار کرد، تا لە کامپ جەدعە لە پارێزگای نەینەوا جیگر بوود، تا خەوەرەیلیگ دەرچگ وە دزەکردن بڕیگ لەو خیزانەیلە لە کامپەگە، وەگورەی بەیاننامەی پەرلەمانتار وەرین ڤیان دەخیل، باوجی حکومەتەگە  راییگ تر لەی باوەتە دیرێد.

سەرچەوەیگ ئەمنی لە پارێزگای نەینەوا ئەرا ئاژانس شەفەق نیوز وت: ئەو کاروان ١٠ پاسە رەسیە کامپ جەدعە لە باشوور مووسڵ، و لایەنە وەرپرسەگە لە دابەشکرن خیزانەیل لەبان ئەو چادرەیلە ک وەرجەیە ئامادە کریانە، لە کامپ جەدعە ک رێکخراو IOM سەرپەرشتیاریی کەێد و وەگەرد وەزارەت کۆچ و کۆچبەران.

ئاژانس شەفەق نیوز زانیاریلیگ لە سەرچەوەیلیگ وەرپرس لەی باوەتە کەفتە دەسی دووپات کەن ک کامپ جەدعە لە پلەی سەرەکی کامپیگ نیە، واتە ئی خیزانەیلە تا بانگوازیگ تر لەناوی مینن، بەڵکم خوەی جوور ویستگەیگە ئەرا دووارە شایستەکردن  بەشیگ لەی خیزانەیلە ک شایەت بتوێەنن دووارە  وەگەرد کۆمەڵگاگە تیکڵا بکریەن، دویای دووپاتکردن لەوە ک هویر توندڕەوەی هەڵنەگردنە.

هەرلیوا، سەرچەوەیگ چەودیر لە فەرمانگەی کۆچ و کۆچبەریل ئویشێد: ئەو خیزانەیلە ک لەناو کامپ هۆل مەننەسە جی ژمارەی تاکەیلیان رەسێدە ٣٠ هەزار کەس.

سەرچەوەیگ ئەمنی ئەرا ئاژانس شەفەق نیوز ئاشکرا کرد ک دەزگایگ ئەمنی هاوبەش وەگەرد گشت دەزگایل ئەمنی دەوڵەتەگە لەلیان ئاسایش نیشتمانی و زانیاری هەواڵگری و هەواڵگری سەربازی، بەیاننامەیل تەواویگ دیرن و وەوردی  نووڕنە ناوەیل گشت چینیگ هاوریەێد تا دیاری بکەن ئەو کەسەیلە ک لە خیزانەیل کیین هانە لایەنگری داعش و هەمیش مینەی ئەو ژنەیلە بکەن ک نشانەیلیگ ئەمنی هالە بانیان، و ئەگەر ئەو نشانەیلە دەرکەفتن زیندان بوودە چارەنووسیان نەگ کامپەگە.

دەربارەی ئەو رخەیلە سەرچەوەگە دیاری کەێد ک دەزگایه‌یل  ئەمنی پارێزگاگە (نەینەوا) رخەگەیان هالە وەکارهاوردن ئی خیزانەیل ومناڵەیلە لەلایەن داعش و دروسکردن نەوەی سێەمیگ لە تیرۆر، دویای قاعیدە و خوەشکەیلی و داعش، و ئەگەر حکومەت عراق رکدار بوی ئی خیزانەیلە دووارە وەگەرد کۆمەڵگاگە تیکڵا بکەێد، و مەزەنە ئی کارە بایەتە بوود، خو بوودە ئەرک گەورەیگ لەبان شان دەزگایه‌یل  ئەمنی، ک خوەی چەودیریکردن ئی خیزانەیلەسە ک ئەوەسا جوێ یەخ لەناو مەردمەگە تاویەنەو.

لە چوارچیوەی باسەگە لە رەتکردن کۆمەڵایەتی، چالاکوان سیاسی سەعەد وەزان ئەرا ئاژانس شەفەق نیوز وت: ئیمە ئمڕوو هایمنە وەردەم قۆناغ چارەنووس سازێگ وەرد تیرۆڕ، و بایەتە حکومەت عراق رەوشەیل گونجیاگ دابین بکەێد و وەڕاسی ئەرا نواگردن شانە خەفتگەیل بگرن تا دووارە ئی خیزانەیلە وەکار نارن و بایەتە حکومەت عراق دووارە پەروەردەی ئی خیزانەیلە بیەێد تا تیکڵای مەردم بوون و مقەیەتی لە خاوەنەیل هویر توندڕەوەی بوود، چوینکە ئەوانە بومبەیلیگن و هەر هەڵەیگ لە رەفتارکردن وەگەردیان شایەت بوودە کارەساتیگ.

هەرلیوا، سیروان دوبردانی پەرلەمانتار لە پارێزگای نەینەوا ئەرا ئاژانس شەفەق نیوز ئویشێد: هاوردن ئی خیزانەیلە وەبی میکانزم ئاشکرایگ ئەرا دیاریکردن چارەنووسیان، ئایا ئی خیزانەیلە لەناو کامپەیل مینن، ودویای ساڵیگ یا دوو ساڵ نەوەی توندڕەوەیگ ئەرامان دەرچوود، یا تیکڵایان کریەێدە ناو کۆمەڵگا و شايەت بوونە تویەم نوویگ ئەگەر ریخریاگ داعش دووارە وەکاریان بارێد، وەتایبەت ئەوانەگ هیمان باوەڕ تەواوەتی وە هویر توندڕەوەی دیرن.

وتیش؛ ئمڕوو ئی کارە بویە راسییگ و حکومەت عراق وەبی هیچ میکانیزمیگ ئاشکرا چەسپانەی، ئەوەسە ک هیلێد نیگەران بویمن و هاوردنی خیزانەیل و دروسکردن چاپیگ عراقی لە کامپ هۆل ناخوازیمن.

دوبردانی لە قسەیلی دەربارەی چینیگ تر ئەوەسا لەی رووژەیلە رەسێد و پاسەیلە وەرجە دوو رووژ رەسینە خاک سوریا تا چینە نووەگە بارن، ک ژمارەیان رەسێدە ٩٧ خیزان.

وتیش؛ حکومەتەگە لە هاوردن خیزانەیل لە چینەیل لە شوون یەک وەردەوامە، تا ژمارەگە لە یەکەم چینەگە رەسێدە ٥٠٠ خیزان، و نشان دا ک مووڵەت فەرمی ئەرا هاوردن ئی خیزانەیلە ئەرا عراق دەرکریاگە.

وەرجەیە، نەجم جبوری پارێزگار نەینەوا لە کۆنگرەیگ رۆژنامەوانی وت: ئی چینە لە خیزانەیل داعش نیین، بەڵکم خیزانەیلیگ بوین لەوەر جەنگەگە وەرەو خاک سوریا کۆچ بردن، تا کەفتنە ناو کامپ هۆل.