ئاشکراکردن پلانیگ ئەرا بانان "سەوز" لە عراق

شەفەق نیوز/ بەرنامەی ئەوزەڵکردن نەتەوە یەکگرتگەیل، دەسکردن وە ستراتیژی نیشتمانی ئەرا مقیەتیکردن و خاسەوکردن ژینگە لە عراق راگەیان، کە وت؛ بوودە کاریگ یەکلاییکردن لە تەقەلا و ئامانجەیل عراق ئەرا نواگیریکردن سەختیەیل ژینگە.

راپۆرتەگە کە ئاژانس شەفەق نیوز ئەڵگەردانی کرد باس دەسکردن وە ستراتیژی ساڵەیل 2024 تا 2030 کرد، کە وە هاوکاری وەرد وەزارەت زینگەی عراق و ئاژانس (يو ئێس ئید) ئەمریکی ناودەوڵەتی دەسوەپی کریا، و لەڕی هەڵسەنگاندن گشتگیر رەوشەیل ژینگەیی ئیسە لە عراق ئامادە کریا، کە نەخشەی رییگە ئەرا چارەکردن ئەو کارەیل گرنگە، جویر زیایبوین شمارەی نیشتەجییوین، و وەکارخاوردن داهاتەیل ناوەردەوام، و سەختیەیل وەڕیەوبردن ئاو.

ئەو راپۆرت نەتەوەییە وت: ئی کارەیلە هیشتن ژینگە بڕەسێدە ئی خراوی گەورە، جویر بیاوانی، و لەدەسدان هەمەڕەنگی بایۆلۆژی، و لەدەسدان سامانەیل ئاوی، وتیش؛ ئی ستراتیژی نووە، خوازێد ئی زوورەیلە سووکەو بکەێد، و پشت چینە لاوازەیل بگرێد، ئەرا قایمکردن توانای کۆمەڵایەتی و ژینگەی عراق. 

راپۆرتەگە لە زوان نیزار ئامێدی وەزیر ژینگە وت: ئی ستراتیژە وەشیوەیگ دیزاین کریا کە ئاست بەرز پابەندبوین عراق نشان دەێد، کە لە ریخریاگەیل فەرمی و تایبەت و ناوخوەیی دیار دەێد، وە خشتەی کاروبار جەهانی ئەرا ئەوزەڵکردن وەردەوام لە کارکردن وەشیوەی گورجیگ لەناو بوونەیل ناودەوڵەتی و ڕێککەفتنەیل جەهانی، ئەرا وەجیهاوردن ئاست خوازیاگ لە مقیەتیکردن ژینگە و تیکەڵکردنی وەناو پلانەیل ناو سیستەم چارەسەریەیل وەردەوام.

وەزیر ژینگەی عراق سوپاس خوەی ئەرا بەرنامەی نەتەوە یەکگرتگەیل و ئازانس ئەمریکا پیشکەش کرد، ئەرا پشتگیریکردن دارایی و رێکخستنی و هونەری ئەرا ئامادەکردن ئی ستراتیژە.

 راپۆرتەگە لە زوان نوینەر بەرنامەی نەتەوە یەکگرتگەیل لە عراق، ئوکی لوتسما وت: بەرنامەی ئەوزەڵکردن پابەندە وە پشتگیریکردن ئەژیندای کەشوهەوا و ژینگە لە عراق، لەڕی هاوبەشی وەشیوەیگ گەورە لە وەزارەت ژینگە، ئەرا وەجیهاوردن ئامانجەیل هاوبەشمان، وتیش: ئیمە پابەندیمن وە مسۆگەرکردن چگن عراق وەرەو ئامانجەیل ژینگەی وەردەوام و نەرم، وهەس وە سوپاس کەیمن ئەرا ئەو پشتگیریکردنە کە ئاژانس ئەمریکی ئەرا ئەوزەڵکردن ناودەوڵەتی پیشکەشی کەێد، و دیاری کرد کە دەسمیەتیدانیان گرنگە ئەرا عراق تا ئامانجەیل گونجانن وەرد کەشوهەوا وەکەس بارێد، و سووکەوکردن کاریگەریی.

راپۆرتەگە لە زوان ئیرین مون مارکیز خانمە جیوەجیکار کاروبار شاند ئاژانس ئەمریکی ناودەوڵەتی لە عراق وت: ئاژانسەگە ئی ئافەرین لەو پیشکەفتنە کەید کە عراق لە مقیەتیکردن ژینگە وەجی هاورد، وەی ستراتیژی وەردەوامە، وتیش؛ یە گامیگ گرنگە ئەرا نواگیریکردن سەختیەیل ژینگە کە کاریگەری لەبان تەندروسی و ژیان و بانان گەل عراق دیرێد.

مارکیز دەسخوەشی لە هاوکاری وەردەوام وەرد حکومەت عراق و هاوبەشی وەرد بەرنامەی نەتەوە یەکگرتگەیل کرد، ئەرا قایمکردن ئەوزەڵکردن وەردەوام و مقیەتیکردن سامانەیل سروشتی، و خاسەوکردن کوالیتی ژیان اە گشت وڵاتەگە.

راپۆرتەگە لە کۆتایی وت: ئی ستراتیژی عراقە، ئەوەسا تەقەلایل مقیەتیکردن ژینگە لە عراق لە شەش ساڵ ئایندە وەڕیەو بەێد، کە گرنگی وەردەوامی لە ئامادەکردن سیاسەتەیل و یاسایل مسۆگەر کەێد، وەگەرد جیوەجیکردن هەڵمەتەیل سەرەکی.