گه‌شت سه‌رووك بارزانی ، گه‌شت گه‌ردين له‌شوون هه‌قه‌يل نه‌ته‌وه‌يی
سه‌رووك بارزانی له‌وه‌خت هه‌ر سه‌ردانيگی ئه‌را ده‌يشت هه‌ريم كوردستان ، يه‌يش له‌ديد كاريگه‌ری دبلۆماسيه‌ت سه‌رووك (مه‌سعود بارزانی)و ئه‌و ده‌ور خاسه ك له‌ناوچه‌گه ديريگه‌ی .
ئيسه ئه‌زموون سه‌رووك بارزانی له ريكخستن په‌يوه‌نديه‌يل ملله‌ت كورد وه‌ل ده‌وڵه‌ت و شوونه‌يل بڕيارده‌ر جه‌هانا له ئاسته ده‌رچيه ك ته‌نيا وه‌ك په‌يوه‌ندييگ ريككه‌فتن يا ئتفاقی و له‌چوارچيوه‌ی ئه‌ته‌كێت گه‌شته‌يل دبلۆماسی بووگ . سه‌رووك بارزانی ئيسه وه‌ك سه‌رووك نه‌ته‌وه‌يگ و سه‌ركرده‌ی ملله‌تيگ پيشوازی و مامڵه وه‌ليا كريه‌يگ و ئه‌وه‌ك له‌دويا گه‌شت سه‌رووك بارزانی كه‌فته وه‌رچه‌ومان له ئه‌مريكا ئه‌وه نيشاندا ك داناين نه‌خشه‌ی سياسی تازه له‌عراق و ناوچه‌ی رووژهه‌ڵات ناوڕاس وه‌بی دانايی و ئه‌زموون كورد و كه‌سيگ وه‌ك سه‌رووك بارزانی ئه‌گه‌ر مه‌حاڵ نه‌وگ ئه‌وه سه‌د له‌سه‌د ناته‌واو بووگ . سه‌رووك بارزانييش ئی گه‌شته كرده سه‌ره‌تای په‌يوه‌ندييگ ستراتيجی تازه وه‌ل گه‌وراترين ده‌وڵه‌ت و ملله‌ت جه‌هان ك له‌سه‌رانسه‌ر گووشه‌ی زه‌وی وه‌بی ئه‌مريكا هويچ پلانيگ سياسی سه‌ركه‌فتگ نه‌ويه .
سه‌رووك له‌ديدار (باراك ئۆباما)و گه‌ورا وه‌رپرسه‌يل ئه‌مريكا فره وه‌ئاشكرا واقع سياسی و ئه‌گه‌ره‌يل ئاينده‌ی سياسی عراق و ناوچه‌گه خسته وه‌رچه‌و سه‌رووك ئه‌مريكاو وت ( ئيمه وه‌رپرس نيمن له‌ئاينده‌ی عراق ئه‌گه‌ر دكتاتۆريه‌ت هاته‌وه ئه‌را به‌غدا) ، ك يه‌يش بته‌وترين په‌يام سه‌رووك بارزانی بوی ئه‌را ماڵ چه‌رمگ و گشت ده‌وڵه‌ته‌يل خاوه‌ن بڕيار له‌جه‌هان و ئه‌را ئه‌و لايه‌نه‌يل عراقييشه ك هيمان خه‌و وه‌هاتنه‌وه‌ی مه‌ركه‌زيه‌ت و ئه‌نفال و ته‌عريب و عرووبه‌ی عراقه‌وه دوينن .
سه‌رووك بارزانی له‌ی گه‌شتيه ديمه‌ن راسه‌قينه‌ی هاوكيشه‌يل سياسی خسته وه‌رچه‌و سه‌رووك ئه‌مريكاو له‌هه‌مان وه‌خت گرنگی يا ئه‌هميه‌ت ديداره‌گه‌ی (بارزانی و ئۆباما) له‌وه بوی ك (جۆ بايدن) جيگر سه‌رووك و خاوه‌ن فكره‌ی دابه‌شكردن عراق ئه‌را (٣) قه‌واره‌ی سياسی ئاماده بوی .
پيشوازيكردن سه‌رووك بارزانی ئه‌را چه‌نه‌ها جار له ماڵ چه‌رمگ و چه‌ن جاريگ دوباره‌بوينه‌وه‌ی دانيشتنه‌يل سه‌رووك كوردستان و سه‌رووك ئه‌مريكا وه‌بی ئه‌وه‌ك هويچ گه‌ره‌نتييگ ره‌سمی ناوده‌وڵه‌تی ئه‌را مقه‌يه‌تيكردن ئه‌زموون كورد له‌هه‌ريم كوردستان ئاشكرا كرياويگ ، خوه‌ی له‌خوه‌ی نامه‌يگه ئه‌را گشت ئه‌وانه‌ك ئامانجه‌يل ملله‌ته‌گه‌مان وه‌هويچ و خه‌ياڵ زانن . ئمجا سه‌رووك بارزانی هه‌رچه‌نی زويتر جه‌خت له‌بان ئه‌وه كرد ك جاريگتر كورد گشت خايه‌يلی نيه‌خه‌يگه ناو يه‌ك سه‌وه‌ته ، وه‌لی له‌سه‌ردان ئه‌مريكاو ديداری وه‌ل گه‌ورا وه‌رپرسه‌يل ئه‌و وڵاته ئشاره‌ت ئه‌را وه‌فاو ئاشتيخوازی ملله‌ت كورد كردگه‌و ئه‌مريكيه‌يليش شايه‌ت ئيسه زانستوين ك له‌و هه‌مگه قوربانيه‌يل له‌عراق دانه‌سه‌ی له‌جه‌نگ رزگاركردن عراقه‌وه تائيسه يه‌ك سه‌ربازيان له‌هه‌ريم كوردستان خوين له‌په‌نجه‌ی ناتگه ، له‌وه‌ر ئه‌وه تويه‌نيم بويشيم گه‌شت ئی جاره‌ی سه‌رووك بارزانی گه‌شت جيگيركردن هه‌قه‌يل نه‌ته‌وه‌يی ملله‌ت كورد و سه‌قامگيری ناوچه‌گه بوی .
