ڕیكخریایه‌یل كوومه‌ڵگاى شارسانى و نه‌خشیان له ژیان په‌رله‌مانى
شارسانى دیار دا، تا وه‌ل دیمه‌ن سیاسى و كوومه‌ڵایه‌تى نوو بگونجیه‌ید، ك بویه سه‌رده‌م ئازادى ڕا ، و ئه‌را ئى كاره چه‌ن كۆڕ و سیمینار و كۆنفرانس گریه‌دریا و هان مه‌ردم دریا ئه‌را دامه‌زرانن ڕیكخریاى و كوومه‌ڵه‌یلیگ تا بوونه بنه‌ڕه‌تیگ ئه‌را حاڵه‌تیگ نوو ك بایه‌ته وه‌ل قه‌واره‌ى ئه‌و گوێڕانكاریه بگونجیه‌ید ك له مه‌یدان ئازادى و دیموكراسى وه‌ل ڕمیان دیكتاتۆریه‌ت ڕوى دا، چوینكه ئى ڕیكخریایه‌یله یه‌كیگه له ستوینه‌گان ده‌سڵات (ده‌سڵات په‌نجم) له سستمه‌یل دیموكراتى.
وه‌ى دویاییشه هه‌ڵوێست جددى و كاریگه‌ریگ له لایه‌ن ڕیكخریایه‌یل كوومه‌ڵگاى مه‌ده‌نى نیشان دریا ، ئه‌ویش وه به‌رزه‌وكردن ده‌عوایگ دژ وه په‌رله‌مان عیراق له‌وه‌ر وه وازى هیشتن یه‌كم نیشتن خوه‌ى ئه‌را ماوه‌ى نادیاریگ ، و جوواو دادگا ئه‌وه بوى ك حوكم دا ك مه‌نین ئى نیشتن وازه كار ناده‌ستوورییگه... له‌ى باوه‌ته ماڵپه‌ڕ شه‌فه‌ق په‌یوه‌ندى كرده بڕیگ كه‌سایه‌تى په‌یوه‌ندیدار ئه‌را ڕووشنه‌و كردن ئى باوه‌ته و له سه‌ره‌تا هه‌نا ئیدوه‌ر سه‌رۆك ڕیكخریاى(امل) وه‌ى جووره باس ئى مه‌سه‌له كرد و وت:"بڕیاره‌گه‌ى دادگاى فیدرالى ئه‌و نیشتن واز په‌رله‌مانه وه چه‌واشه‌كارى ده‌ستوور شماره كرد و مه‌جبوور سه‌رۆك ساڵ ئه‌نجوومه‌نه‌گه كرد له ماوه‌ى 15 ڕووژ وه‌رده‌وامى بیه‌یده نیشتنه‌گان ئه‌نجوومه‌نه‌گه، وه‌لى فراكسیۆنه‌یل په‌رله‌مانى دوباره هاتن ئه‌و مه‌وقه‌ى دیاریكریایه له ڕووژ دوشه‌ممه 8 / 11 / 2010 دویاخستن ئه‌را ڕووژ په‌نجشه‌ممه‌ى هاتى و ئیمه‌یش له لاى خوه‌مانه‌و ده‌سپیشخه‌رى مه‌ده‌نییگ ئاشكراكردیمن ئه‌را پاراستن ده‌ستوور و ئه‌و دویاخستنه مه‌حكووم كردیمن و ئه‌گه‌ر ئه‌نجوومه‌ن نوێنه‌ره‌یل هه‌ر وه‌ى شیوه بمینیده‌ى، ئه‌وه ئیمه كار ئه‌را ئه‌وه كه‌یمن ك شه‌رعیه‌ت له‌لى بسینیمنه‌وه ئه‌گه‌ر بارووه‌زعه‌گه وه‌ى شیوه بمینیده‌وه‌ى".
هه‌نا ئیدوه‌ر زیاتریش وت :"ئیمه هیمان له لایه‌ن ده‌ستوورى و قانوونیه‌و خوه‌مان ئاماده‌كه‌یمن وه گووره‌ى مادده‌ى 27 ده‌ستوور، ك جه‌خت كه‌ید له بان حورمه‌ت دارایى عیراقى و پاراستنى و مه‌سه‌له‌ى شكانن قه‌سه‌م قانوونى له چاودێرى كردن به‌رژه‌وه‌ندیه‌یل ملله‌ت، ك ئه‌گه‌ر شكانن ده‌ستوور له بانیان سابت بكه‌یمن ، ئه‌وه ئیمه داوا كه‌یمن نوێنه‌ره‌یل له‌ى په‌نج مانگ گوزه‌یشته هه‌رچى پویل وه‌رگردنه له‌لیان بسینریه‌یده‌وه".
هه‌نا ئیدوه‌ر ئه‌وه‌یشه ئاشكراكرد ك :" هه‌ركه‌سى یا هه‌ر ڕیكخریاییگ مه‌عنه‌وى هه‌ق خوه‌یه شكات بكه‌ید له دادگاى فیدرالى ئه‌را دیفاع كردن له ده‌ستوور و پاراستنى، و یه‌یشه ئه‌رك ئه‌نجوومه‌ن نوێنه‌ره‌یله و ئیمه نیه‌توایمن شوون ئه‌وان بگریمن، وه‌لى داوا له‌لیان كه‌یمن ئه‌ركه‌یل خوه‌یان ئه‌نجام بیه‌ن له چاودیرى و وه‌رگرى كردن له مافه‌یل ده‌نگده‌ره‌یلیان".
منتصر الاماره سه‌رۆك یه‌كێتى په‌رله‌مانتاره‌یل عیراقى له‌لاى خوه‌یه‌و ئه‌وه دوینى ك :"نوێنه‌رایه‌تى كردن ملله‌ت ئه‌رك ئه‌نجوومه‌ن نوێنه‌ره‌یله، و هه‌ڵوێست ڕیكخریایه‌یل كوومه‌ڵگاى شارسانى له‌لایه‌ن یه‌كێتى په‌رله‌مانتاره‌یله‌و پشتگیرى له كریاس، ئى هه‌ڵوێستیشه مه‌عناى ئه‌وه‌سه ك هس ڕه‌سین و وه‌رپرسیارى هه‌س".
منتصر الاماره هابان ئه‌و باوه‌ڕه ك بایه‌سه نه‌خش و ده‌ور ڕیكخریایه‌یل كوومه‌ڵگاى شارسانى كاراوه بكریه‌ید، له خاتر كوومه‌ك كردن و پشتگیرى كردن و ڕه‌سانن ئه‌زموون په‌رله‌مانى ئه‌را قورتار بوین له زاڵه‌و بوین یا (هیمنه)ى سیاسى سه‌ركرده‌یل فراكسیۆنه‌یل و پارته‌یل له‌بان نوێنه‌ره‌یل و كوومه‌ك بكه‌ید ئه‌را دویره‌وكه‌فتن له به‌رژه‌وه‌ندیه‌یل شه‌خسى و حزبییان.
له‌باوه‌ت وه‌رده‌وامى دویاخستن و ئمڕوو و سووكردن كووتایى هاوردن وه نیشتن واز و دوباره ده‌سوه‌كاره‌وبوین په‌رله‌مان؛ منتصر الاماره وت:" ئاشكراو دیاره ك ئه‌وه‌گ ئمڕوو حوكم عیراق كه‌ید ده‌ستوور نیه و دادگاى فیدرالییش زووردار كاركردن په‌رله‌مان نیه، و دادگاى فیدرالى خوه‌ى خسته ناو ته‌نگه‌وه‌رى.. ئه‌وه‌گ ئمڕوو حوكم عیراق كه‌ید سه‌رۆكه‌یل فراكسیۆنه‌یل سیاسین، چوینكه ئه‌یانه خوه‌یان له ده‌ستوور باڵاتر زانن و بڕیاره‌یلیان ڕى كه‌ید، و له‌ى هه‌فت مانگه له عومر په‌رله‌مان چوار جار له ده‌ستوور دریاسه لا ، و نه‌دادگاى فیدرالى و نه هویچ لایه‌نیگتر حساو و كتاو وه‌ل چه‌واشه‌كاره‌یله‌و كردیه".
