پشتگیری له‌به‌عسیه‌یل وه‌یاد چه ؟
بڕیاریگ لوجنه‌ی داد و لیپرسینه‌وه ك وه‌گوره‌ی بڕگه‌یل ده‌ستوور
له كۆمیسیون باڵای هه‌ڵوژاردنه‌یل تواستگه ناو چه‌ن كه‌سیگ هاوجورم و شان ته‌كن سه‌ران رژیم به‌عس ڕمیاگ له لیست كاندیده‌یل هه‌ڵوژاردن بسڕیگه‌و . كار ڕه‌سیه‌سه ئه‌وره ك یه‌كیگ له‌و كاندیده‌یله هه‌ڕه‌شه له سه‌رجه‌م پرۆسه‌ی سیاسی ئه‌كا و یه‌كیگتریشیان وه‌بی كه‌مترین شه‌رم وحه‌یا وه‌شانازیه‌و باس هاوده‌سی خوه‌ی وه‌ل رژیم ڕمیاگ به‌عس ئه‌كا و وه‌شیوه‌ی ئاشكرا تاوانه‌یل ئه‌و رژیمه خه‌یگه دروو و چمانی ئه‌و گوڕه‌یل ده‌سه‌جه‌میه ك تائیسه په‌یا كریانه و ده‌یان هه‌زار هاووڵاتی عراقی وه كورد وعه‌ره‌ب و نه‌ته‌وه‌یلتر له‌تیان په‌یا كریاس. سیناریوییگ سینه‌مایی بویه و حاشا له‌وه ئه‌كا ك سه‌ران به‌عس چه‌ك كیمیاوی له ناوچه‌یل كوردستان وه‌تایبه‌ت له هه‌ڵه‌بجه‌و شێخ وه‌سانان وه‌كار بردویگ و یه‌یش له وه‌ختیگه ك داداگای باڵای تاوانه‌گان عراقی تا ئیسه چه‌ندین نه‌فه‌ر ك ئه‌و تومه‌ته‌یله له‌بانیان سابت كریاس وه‌مه‌رگ حوكم داس . له‌ی لایشه‌و بڕیگ له لایه‌نه‌یل پشتگیری له بڕیاره‌گه‌ی لوجنه‌ی داد و لیپرسینه‌وه كردن و بڕیگتریش له لایه‌نه‌یل ئه‌و بڕیاره وه‌نادادپه‌روه‌رانه له‌قه‌ڵه‌م دانه‌و و ڕه‌نگ وبووییگ تایفی دانه‌سه‌پی ك گوایه بڕیاره‌گه دژ كاندیدایل سوننه مه‌زه‌وه .
ئیمه كار وه‌هه‌ڵویست لایه‌نه‌یل غه‌یر كورد نه‌یریم وهه‌ركام له‌وانه هانه شوین به‌رژه‌وه‌ندی تایبه‌ت خوه‌یان ؛ وه‌لی گله‌ییمان له به‌عزی سه‌ركرده‌یل كورده ك وه‌ئه‌وپه‌ڕ هه‌س نه‌كردن وه وه‌رپرسياره‌تی دژایه‌تی خوه‌یان وه‌ل سڕینه‌وه‌ی ناو كاندیدا به‌عسیه‌گان ئعلان كردنه وه‌بی ئه‌وه‌گ شه‌رم له بنه‌ماڵه‌ی شه‌هیده‌یل پێشمه‌رگه و ژنه‌یل و مناڵه‌یل ئه‌نفال كریاگ و زیاترله په‌نج هه‌زار هاوزوان بی گونای خنكیاگ وه گازه‌يل كیمیاوی به‌عس بكه‌ن ؛ ئه‌گه‌ر بڕیگ له عه‌ره‌به‌یل شوفینی و كویه‌نه به‌عسی و دوژمن عراق تازه هه‌ر كام وه‌بیانگیگ پشتگیری له كاندیده‌یل به‌عس بكه‌ن حه‌ق خوه‌یانه چوین یادگاریه‌یل و رووژه‌یل خوه‌شیگ له‌وه‌خت ده‌سه‌ڵات به‌عس داشتنه‌و ئیسه‌یش هانه ته‌ما عراق مه‌یله‌یل سه‌عات بوه‌نه دویاوه ، وه‌لی كورد له‌ی پشتگیریه هاته‌مای چه ؟ هاته‌مای ئه‌وه‌گ ئه‌و ده‌سكه‌فته‌یله ك تائیسه وه‌خوین سه‌دان هه‌زار شه‌هید وه‌‌ده‌سی هاوردیمه وه‌پشتگیری كردن له‌ساڵح موتڵه‌گ و زافر عانی و ئوسامه نوجه‌یفی له‌ده‌سی بیه‌یم و بچیمنه‌و ئه‌را چوارگوشه‌ی یه‌كم ؟ یاتوایم وه‌ی پشتگیریه بویمنه شه‌ریك له ده‌سه‌ڵات وه‌ل ئه‌یژده‌های زه‌خمییگ ك چه‌ندین جار تواستگه ملله‌ت كورد و خاكه‌گه‌ی قویتا بیه‌یگ ؟ ئه‌رێ ئومه‌ته‌گه ئیوه بویشن پشتگیری له‌به‌عسیه‌یل وه‌یاد چه ؟
