وجوود به‌عس له‌عراق له كوورا سه‌رچه‌وه گرتگه ؟
وه‌رفراوان وه‌ل خوه‌يا هاورد له‌باوه‌ت وجوود راسه‌قينه‌ی به‌عس له‌عراق تازه‌و ئه‌و ده‌س و روخساره‌يل ئاشكرا ك كار ئه‌را به‌عس و هاوردنه‌وه‌ی كه‌ن .
شايه‌ت كه‌س له‌بان ئه‌و پرسياره قسه نه‌كه‌يگ و نه‌گه‌رديگه‌ی شوون جواوه‌گه‌يا ك ئايا به‌عس له‌عراق هه‌س يا نيه ؟ ئمجا له‌وه‌ر ئه‌وه‌ك جواوه‌گه‌ی پاك و ئاشكراس ، نه‌ك هه‌ر وجوود ديريگ ، به‌ڵكوو وه‌خته‌يل فره‌يگ وه‌دريژايی هه‌فت ساڵ گوزه‌يشت كاريگه‌ری خراو داشتنه له‌بان پرووسه‌ی سياسی و شيوانن وه‌زع ئه‌منی له‌عراق و فره‌جاريش له‌ژير په‌رده‌ی وه‌رگری يا دفاعكردن له‌به‌رژه‌وه‌نديه‌يل عه‌ره‌ب سونی توان دوشمنايه‌تی داواكاريه‌يل و هه‌ق ره‌وای پيكهاته‌يل تر عراق بكه‌ن و سياسه‌ت ( فرق تسد) جی وه‌جی بكه‌ن .
قه‌يريگ له‌نويسه‌ره‌يل عه‌ره‌ب باس له‌وه كه‌ن مه‌ندنه‌وه‌و هه‌ناسه‌داين به‌عس له‌عراق هووكار سه‌ره‌كی ئه‌را ئه‌وه به‌يگه‌وه ك رژيم به‌عس له‌لايه‌ن خه‌ڵك عراق و له‌ڕيگه‌ی شووڕش و راپه‌ڕين مه‌ردمه‌وه نه‌ڕميا ، به‌ڵكوو ده‌س و هيزيگ ده‌ره‌كی وه‌گووره‌ی به‌رنامه‌و قوناغه‌يليگ دياريكرياگ ئی وڵاته داگير كرد و به‌عس له عه‌رش ده‌سڵات هاورده خوار .
ئه‌وه‌سه به‌عس وه‌يارمه‌تی و هاوكاری چه‌ن وڵاتيگ هه‌ريمايه‌تی و عه‌ره‌بی له پايته‌خته‌يل ديمه‌شق و عه‌ممان و به‌يرووت و سه‌نعا و ده‌وحه سه‌رگه‌رم خود ريكخستن و په‌يوه‌نديكردن و سه‌رپه‌رشيكردن كاره‌يل سياسی و تيرۆرسيين له‌عراق . ئه‌وان له‌هويريان چی ئه‌گه‌ر ئه‌و ده‌س ده‌ره‌كيه نه‌وياتاگ ئه‌و به‌عس و پاشمه‌نده‌يلی ئيسه هه‌ناسه له‌لی بڕياو جوير نازيه‌يل ئيسه به‌شيگ بوين له گوزه‌يشت . ئمجا بيجگه ده‌ور خراو هه‌ريمايه‌تی له په‌ناداين سه‌ران به‌عس و پيشكه‌شكردن يارمه‌تی گشتلايه‌ن ئه‌ڕايان ، وه‌ل ئه‌وه‌يشا به‌شيگ له پارت و لايه‌نه‌يل سياسی عراقی وه هانداين به‌رژه‌وه‌نديه‌يل سياسی حزبی و كيشمه‌كيش زياتر له‌بان چه‌ن كورسييگ په‌رله‌مان و ئه‌را وه‌ده‌سهاوردن متمانه‌ی به‌عسی و ئه‌وانه‌ك وه هه‌وای ئه‌و رووژه ژيه‌ن ، چه‌نه‌ها كه‌سايه‌تی ناسرياگ به‌عسی له‌ناو پيكهاته‌ی سه‌ركردايه‌تی شوون خوه‌يان كردنه‌سه‌وه ، يه‌يش هووكاريگ سه‌ره‌كيه ئه‌را مه‌ندنه‌وه‌و ده‌ورداشتن به‌عسيه‌يل له پرووسه‌ی سياسی ك دژ وه‌ناوه‌ڕوك ده‌ستوور هه‌ميشه‌ييه .
هووكاريگ تر چووگه‌وه ئه‌را كزی ئه‌دای حكوومه‌ت مالكی له كاراكردن بنه‌مايه‌يل دووسی نيشتمانی و مه‌رزداركردن گه‌ناته‌كاری له حكوومه‌ته‌گه‌ی و ريگرتن له‌پاشيلكاريه‌يل هه‌ق ئاده‌ميزاد و نيشانداين عراقيگ روی گه‌ش و تازه . ئمجا نويسه‌ريگ وه‌ك تارق ئه‌لحه‌ميد له‌رووژنامه‌ی (الشرق الاوسط) باس له‌وه كه‌يگ ئی دويره‌وخستنه غه‌ڵه‌ت گه‌ورايگه عراقيه‌يل كه‌نه‌ی ، دی نيه‌زانيم له‌وه‌ر چه بايه‌سه غه‌ڵه‌ت بووگ و ئه‌ڕاچه بايه‌سه راسه‌وخۆ ريگه بدريه‌يگه ئه‌و كه‌سه‌يله ك ده‌س داشتنه له‌نه‌خشه‌ی تيه‌ريكترين قوناغه‌يل تاريخ سياسی عراق ؟ وه هه‌ر حاڵ ئيمه تويه‌نيم له‌و ريگه‌وه مسداقيه‌ت به‌يمنه پرووسه‌ی سياسی له‌عراق ك ريگه نه‌يه‌يم سياسه‌تمه‌داره‌يل ده‌مپووش بڕه‌سنه شوون بڕيارداين و قانوونداناين و له‌و شوونه‌يل هسيارو گرنگ ياموهمه چاره‌نويس و ئاراسته‌ی عراق نه‌شيونن و ئاينده‌ی عراق له ئه‌وسا تيه‌ريكتر نه‌كه‌ن .
