هونه‌ر گفتوگوو

وه‌رين قه‌يه‌غه‌ بوی وه‌پيان ئشاره‌تيگ بكريه‌يگ جوور فيدراڵيه‌ت و چه‌ن حزبايه‌تی و ئازادی ديدگا و ڕووشنهويری يه‌كتره‌ك وه‌خشين و ئازادی ڕووژنامه‌نويسی و ده‌يان وشه‌ی تره‌ك ك له‌ گوزه‌يشته‌ ملله‌ت عيراق هويچ ئاگاداريگ وه‌ليه‌و نه‌ياشتن بيجگه‌ چه‌ن كه‌سايه‌تی ڕووشنهويری و سياسی ، وه‌لی ئيسه‌ گشت ئه‌و وشه‌يله‌ له‌ وڵات په‌خشه‌و بوينه‌و هاووڵاتيگ نه‌مه‌نيه‌ ك نه‌ناسيگه‌يان و له‌ليان ئاگاداری نه‌ياشتوود وه‌لی ته‌نيا چشتيگ له‌ی ناوه‌ كه‌مه‌ نه‌بوين هونه‌ر گفتوگوويگه‌ ك وه‌گوره‌ی بنه‌وايل هويری و عه‌قلانی ئه‌نجام بگريگ وه‌ دوينيمن ك گفتوگووه‌يل له‌ دانيشتنيگ يا له‌ ديمانه‌يگ ته‌له‌فزيونی وه‌شيوه‌ی غه‌ڵه‌تيگ جيوه‌جی كريه‌ن و له‌كوتاييه‌و ده‌نگه‌يله‌ به‌رزه‌و بوون و ئه‌وانه‌يش وه‌پيان نوڕن ده‌سكه‌نه‌ خه‌نينه‌ پيان وه‌ته‌نيا سه‌به‌ب ئه‌ی ڕويداگه‌يله‌ يه‌سه‌ ك له‌ كۆمه‌ڵگه‌ی عيراقی ئه‌و ده‌رفه‌ته‌ وه‌دی نه‌هاتگه‌ باوه‌ڕه‌يل و ڕيه‌يل ديمۆكراتی جيوه‌جی بكريه‌ن و له‌ ديدگای يه‌كتره‌ك ڕێز بگرن هه‌وجوره‌گ له‌ وڵاته‌يل ديمۆكراتی ڕووژئاوا ئه‌ی كاره‌ وه‌ ڕاسی و وه‌شيوه‌ی گۆنجياگيگ جيوه‌جی كريه‌يگ. وه‌ هه‌ركه‌سيگ هه‌ر شكايه‌تيگ ديريگ وه‌ ئازادی شكايه‌ت خوه‌ی پێشكه‌ش ئه‌كا و هويچ جه‌نگ و ناكووكيگيش روی نيه‌ده‌يگ. ئه‌يه‌ ديمۆكراتی راسه‌قينه‌س ك له‌ ديدگای يه‌كتره‌ك ڕێز و ئحترام گرن.