هه‌یواین له گریه‌داین نیشتن په‌رله‌مان
په‌رله‌مانتاره‌یل نوو، سه‌ر مه‌ردم كه‌نه ناو گیژاوه‌یلیگ ك مه‌به‌سى ڕى گردنه له ئاسووده‌بوین مه‌ردم، وه‌ى جووره دوینیمن ك قسه‌كردن و ده‌موه‌شاننیان زیاتر و تونتره‌و بوود له كه‌ناڵه‌یل ڕه‌سانن، و دیاریشه ك هویچ هه‌وڵ و ته‌قه‌لاى ڕاسكانییگ له‌تى نیه تا ترویسكه‌ى ئومیدیگ بیه‌نه مه‌ردم، به‌ڵكوو زوورمى قسه‌گانیان شكاتكردنه له‌ى كه‌سایه‌تى یا ئه‌واكه‌ى تر و په‌لامارداین ئى فراكسیۆنه‌گه یا ئه‌واكه، یه‌یشه بویه مایه‌ى له‌ده‌سداین ته‌نانه‌ت به‌رنامه‌یل هه‌ڵوژاردنیان- ئه‌وه ئه‌گه‌ر به‌رنامه داشتوین- و له ئاكامیشا ئه‌و ئاده‌میزاده ك مینه‌ى خوراكیگ كه‌ید زگى تیر بكه‌ید و ماڵیگ ك له‌تى ئوقره بگرى تواناى ئه‌وه‌ى نه‌مه‌نیه ك جیاوازى ناوبه‌ین به‌رنامه‌گان بكه‌یده دى یا ده‌رفه‌تیگ بوینیده‌و ئه‌را ڕه‌سین وه ئامانجه‌یل ساده و سووكى.
له‌بان ئى هه‌مگه مه‌رگه‌سات په‌تیه و ئى شیوایشیو سیاسیه، ته‌ماشا كه‌ید بڕیگ له سیاسه‌تمه‌داره‌یل، وه‌تایبه‌تى ئه‌وانه‌گ له‌ى خول نووه هه‌ڵوژریانه، هویچ هه‌سیگ وه‌و وه‌رپرسیاریه نه‌یرن ك ملله‌ت كردیه‌سه‌ى خه‌ڵاتیان، و هه‌ڵه‌داوانیانه ئه‌را سه‌فه‌ركردن ئه‌را وڵاته‌یلیگتر، له‌ى وه‌خته ك بایه‌سه له ناو وڵات بوون چوینكه مه‌وقه‌ى گریه‌داین نیشتنه‌گه‌ى ئه‌نجوومه‌ن نوێنه‌ره‌یل نزیكه‌و بویه وه‌تایبه‌تى دویاى ئه‌وه‌گ دادگاى فیدرالى له 24 مانگ گوزه‌یشته بڕیاردا ك ئى نیشتنه له ماوه‌ى دو هه‌فته گریه بدریه‌ى، و نیشتن واز هه‌ڵوه‌شان، چمانى ئى نوێنه‌ره‌یله پیشوه‌خت زانستن ك ئى جووره بڕیاریگ ده‌رچوود، ئنجا هاتن ئه‌را ئه‌وه‌گ خوه‌یان له‌ى ئه‌ركه بیه‌نه‌لا ؛ وه هه‌ڵه‌په‌ڵه چل نوێنه‌ر له‌لیان بار نانه یه‌ك و وه‌ره‌و مه‌كه كه‌فتنه ڕى ئه‌را حه‌ج كردن، و یه‌یشه ئاشكرایه ك ماوه‌ى فره‌یگ وه‌پى چوود، و مه‌ردمیش ترسن ك ئى نیشتنه گریه نه‌دریه‌ى تا ئى حاجیه‌یله نانه دویاوه، و یه‌یشه شایه‌ت بكه‌فیده شوون عه‌ید قوربان و هاتنه‌وه‌ى حاجیه‌یل.
دیاره قسه‌ى بڕیگ له په‌رله‌مانتاره‌یل ڕاس ده‌رچوى ك له مانگ ڕه‌مه‌زان گوزه‌یشته وتن ك دامه‌زرانن حكوومه‌ت كه‌فیده شوون عه‌ید و مه‌ردمیش وتن مه‌به‌سیان عه‌ید قوربانه نه‌ك ڕه‌مه‌زان! ... ئه‌و په‌رله‌مانتاره‌یلیشه ك وتن حكوومه‌ت له شوون عه‌ید ڕه‌مه‌زان ئه‌نجام گرى ، به‌عزى ئایه‌م (مزویڕ) ئویشن یانه باس عه‌ید ڕه‌مه‌زان ساڵ ئاینده كه‌ن!! وه‌ى جووره دیاره ك حكوومه‌ته‌گه‌مان له شوون عه‌ید ڕه‌مه‌زان دامرزیه‌ید ، وه‌لى كام ڕه‌مه‌زان؟ئه‌وه دى كه‌س نیه‌زانى... حه‌ج كردن ئى چل په‌رله‌مانتاره كاروان وه‌عومره چوین بڕیگ له په‌رله‌مانتاره‌یل وه‌رین خه‌یده هویرمان ك له وه‌خت تاوتوێكردن یا مناقشه‌ى ڕیككه‌فتننامه‌ى دویاكیشان هێزه‌یل ئه‌مریكى ئه‌نجام گرت و له ئه‌رك نیشتمانى و ئه‌خلاقى خوه‌یان هه‌یواین ك مه‌جبووریان كردیاد هه‌ڵوێست نیشان بیه‌ن ك هان وه‌لیا یا دژین یا بى لایه‌ن بوون له باوه‌ت ئى ریككه‌فتننامه، یه‌یشه بویه مایه‌ى ئه‌وه ك ده‌نگده‌ر عیراقى متمانه وه‌پیان نه‌یاشتوود و دوباره نه‌هه‌ڵوژنیده‌یان ئه‌را خول نوو، چوینكه یانه جیى متمانه نه‌وین.
ئى چل نوێنه‌ره بایه‌ت بوى چه‌وه‌ڕى نیشتنه‌گه‌ى په‌رله‌مان و ته‌واوكردن دامه‌زرانن حكوومه‌ت بكردیان و ئنجا بڕیار سه‌فه‌ر بیاتان ئه‌را هه‌ر شوونیگ بتواستیان... دیاره ك ته‌گه‌ره‌یل فره‌یگ ها نواى گریه‌داین نیشتنه‌گه‌ى په‌رله‌مان و هه‌وڵه‌یلیگ هه‌س ئه‌را ئه‌وه‌گ ئى كاره هه‌ر دویا بكه‌فى... ئیمه‌ى مه‌ردم عیراقیش ئومیده‌واریمن ك سه‌فه‌ر ئى نوێنه‌ره‌یله ئه‌را حه‌ج و ئه‌را وڵاته‌یلیگتر، گریه‌داین نیشتنه چه‌وه‌ڕیكریایه‌گه‌ى ئه‌نجوومه‌ن نوێنه‌ره‌یل په‌ك نه‌خه‌ید.
ئه‌وه‌گ لاى مه‌ردممان گرنگه ئه‌وه‌سه ك نیشتنه‌گه‌ى ئه‌نجوومه‌ن نوێنه‌ره‌یل له مه‌وقه دیاریكریایه نووه‌گه‌ى ئه‌نجام بگرید و له‌و نیشتنه گشت نوێنه‌ره‌یل وه‌یه‌كه‌و – شماره‌یانیش هه‌رچه‌نى بوود- هه‌ڵه‌په‌ڵه بكه‌ن ئه‌را هه‌ڵوژاردن سه‌رۆك ئه‌نجوومه‌ن نوێنه‌ره‌یل و هه‌ردوگ جیگره‌گه‌ى، و ریگه خوه‌ش بكه‌ن ئه‌را هه‌ڵوژاردن ئه‌و دو سه‌رۆكایه‌تیه‌گه‌ى تر، تا كاره‌یل گشتى یه‌كلاوه بوون و كار بكریه‌ید ئه‌را دامه‌زرانن حكوومه‌ت نوو و وه‌زیره‌یلى. و ئومیده‌واریمن ك ئى كاره چه‌ن مانگیگ نه‌كیشى و قسه‌ى ڕه‌شبینه‌یل یا متشائمه‌یل گوڵ نه‌كه‌ى!.
