هه‌ڵوژاردنه‌يل و بنه‌وای ڕه‌سانن
تيه‌ريكيه‌يل مقه‌يه‌تی بكريه‌ێ و نه‌بايه‌د ڕه‌سانن وه‌كار بوه‌ن ئه‌را نيشان داين ديدگای خراويگ له‌لايه‌ن ڕ‌كابه‌ر و بايه‌د حه‌ق ده‌ستوووری ئه‌را ره‌كابه‌ری له‌ناونی كه‌سايه‌تيه‌يل و لايه‌نه‌يل سياسی له هێرشه‌يل هه‌ڵوژاردنی زامن بكريه‌ێ . له‌لايگتره‌و ده‌زگايل ڕه‌سانن ئه‌ی حه‌قه ديرن ك زانياريه‌يليگ وه‌پی هه‌وه‌جه ديرن وه‌ده‌س بارن و كاريان ئاسانه‌و بكريه‌ێ وه له‌هه‌مان وه‌ختيش بايه‌د له‌بان بی لايه‌نی و پاكی و مقه‌يه‌تی كردن له‌كاره‌يل ده‌زگايل ڕه‌سانن و چاوديری له به‌رژه‌وه‌نديه‌يل گشتی له كاره‌يليان جه‌خت بكريه‌ێ . كار ده‌زگايل ڕه‌سانن له‌كۆمه‌ڵگايليگ ك تازه له ده‌سه‌ڵاتيگ ئه‌را ده‌سه‌ڵات تره‌كيگ جيوه‌جی بوود و ده‌س كرديه‌سه ته‌جرۆبه‌ی تازه‌يگ تويش گه‌ناته‌كاريه‌يل و خراويه‌يل فره‌يگ ئه‌يه‌ی و جارجار ئه‌را به‌رژه‌وه‌نديه‌يل تايبه‌ت لايه‌ن يا كه‌سايه‌تیگ له وڵات وه‌كار بريه‌ێ . ڕه‌سانن ئازاد بايه‌د ته‌قالا بكا ك وه‌ل باوه‌ته‌يل وه ئازادی و راسی و دوير له لايه‌نگريه‌يل تايبه‌ت كار بكا و له مافه‌يل و كه‌رامه‌ت و به‌رژه‌وه‌نديه‌يل گشتی رێز و ئحترام بگرێ . وه‌لی گرنگی ڕه‌سانن له هه‌ڵوژاردنه‌يل فره‌س ك وه‌كار بريه‌ێ ئه‌را بانگه‌وازه‌‌يل هه‌ڵوژاردنی و ئاگادار كردن هاووڵاتی له ڕيگه‌ی چالاكيه‌يل لايه‌ن يا كه‌سايه‌تی تايبه‌تيگ وه ده‌زگايل ڕه‌سانن بنه‌وا ڕ‌كابه‌ری له‌ناونی كانديده‌يل له هه‌ڵوژاردنه‌يلن و وه‌كار بردن ئه‌ی ده‌زگايله وه‌شيوه‌ی خاسيگ له هه‌ڵوژاردنه‌يل نيشانه‌ی ئازادی به‌يان له وڵاته .
له‌لايگتره‌و وه‌گوره‌ی ده‌ستوور ده‌سه‌ی ڕه‌سانن و په‌يوه‌نديه‌يل بايه‌د وه‌شيوه‌ی راسه‌وخۆ له‌بان سه‌رپيچيه‌يل ئه‌نجام گرتگ له‌كار ئه‌ی ده‌زگايله چاوديری بكريه‌ی و شكايه‌ته‌يل پێشكه‌ش كرياگ له‌يه‌كه‌و بيه‌ن و سزايليگ ئه‌را ده‌زگايل ڕه‌سانن سه‌رپيچيكه‌ر دياری بكريه‌يگ وه ئاشكراس ك پشتگيری و هان داين تونوتيژی هاله‌سه‌ره‌تای سه‌رپيچيه‌يل ك جوور خه‌ت قرمزيگ ئه‌را ئاشتی له‌ناونی هاووڵاتيه‌يل عراقی .
