نویساننه‌یلمان له پیچ و په‌ناى تووڕ عه‌نكه‌بووتى
ڕه‌سانن، مه‌عریفه‌تى، په‌یوه‌ندى و ناوبانگى، و له‌لیمان هه‌س هه‌وڵ ده‌ید ئه‌را په‌یاكردن پێگه‌یگ تا زانیاریه‌یل دیاریكریاییگ له‌تى بچه‌سپنید ك خوه‌ى بایه‌خ داسه‌پى و حه‌ز كه‌ید مه‌ردمیگ تر له‌لى بزان، و له‌لیمانیش هه‌س هه‌وڵ ده‌ید ئه‌را په‌یاكردن وبلاگیگ دیاریكریاى تا ڕا و ئه‌راى چوینه‌یل خوه‌ى له‌تى بنویسنى و تواید نیشان مه‌ردمانیگ تر بیه‌یده‌ى تا له‌تى به‌شدارى بكه‌ن و ڕا و ئه‌راى چوینه‌یل وه‌لیانا ئاڵوگۆڕ بكه‌ن، له‌لیمانیش هه‌س چووده ناو مونته‌داگان تا هویره‌یل خوه‌ى له یه‌كیگ له به‌شه‌گانى بڵاو بكه‌ید ئه‌را خه‌ڵقكردن گفتوگوو و تاوتوێكردنیگ وه‌ل مه‌ردمانیگتره‌و له‌خاتر ڕه‌سین وه وه‌رگردن زیاتر له ڕایگ سه‌باره‌ت وه هویر دیاریكریاییگ، له‌لیمانیش هه‌س ئامانج و مه‌مه‌ره‌یلیگ دیرى هه‌وڵ ده‌ید تا شوون پاى خوه‌ى له تووڕ عه‌نكه‌بووتى په‌یا بكه‌ید.
له‌یوا دیاره ك گشتمان سوار ئه‌سپ چووڕاوگه‌ى كه‌هرۆموگناتیسى دیجیتاڵى بویمنه، و هه‌ریه‌ك له‌لیمان له خه‌ڵوه‌ت تایبه‌ت خوه‌ى نیشتیه و ئه‌را یار خوه‌ى گورانى چڕید، و خه‌ریك نویسانن و بڵاوكردن و داگردنه، هه‌ركه‌سى وه‌هه‌واى خوه‌ى، و كاروان خوه‌ى له شوونیگ دڵى بگرى وسنید، گشتمان نویسنیمن، و داگریمن و نویساننه‌گانمان بڵاوه‌و كه‌یمن، و دڵخوه‌شى خوه‌مان ده‌یمن ك بڕه‌سیمنه ئه‌وه‌گ هادڵمان له‌ى نویساننه‌یلمانه.. چه نویسنیمن ، چه داگریمن ؟ ئه‌را نویسنیمن ؟ و ئه‌را كى نویسنیمن؟ و كه‌ى نویسنیمن؟ و چوین نویسنیمن؟! ڕه‌شكه‌یگ پرسیاره ك ده‌یده وه‌رچه‌ومانا، و وه‌گشت هێز و جورئه‌تیگه‌و باوه‌تیانه ڕوى وه‌ڕویمان بوود، زوورممانیش له جوواو ئاشكراى ئى پرسیاره‌یله هه‌یوایمن!! له‌یرا له پیچ و په‌ناى تووڕ عه‌نكه‌بووتى، وه‌پیمان خوه‌شه وه‌گشت ئازادییگ و وه‌گشت قه‌بوولكردنیگه‌وه له‌ورا بمینیمن، و له‌یرا وه‌زوور بیه یا ڕازى خوه‌مان چه‌سپنیمنه قه‌ى یه‌كه‌ى كۆمپیوته‌ره‌گه‌وه ك بویه‌سه خاڵ په‌یوه‌ندى ناوبه‌ین ئیمه و ئه‌نته‌رنێت، و وه‌ڕیگه‌ى ئى مه‌وجه‌یل كه‌هرۆموگناتیسیه، ئیمه عه‌نته‌ریات خوه‌مان وه‌گشت شیوه‌و ڕیوڕه‌سمه‌گانى نیشان ده‌یمن، و نیشتیمنه‌سه پشت هێڵه‌یل وه‌رگریكردن خه‌یاڵى ك وگووره‌ى هه‌وه‌س خوه‌مان دروسیان كه‌یمن و ئه‌و نازناوه‌یله نه‌یمنه قه‌ى خوه‌مانه‌و ك وه‌دڵ خوه‌مانه و. نویسنیمن و داگریمن و بڵاوه‌و كه‌یمن، چوینكه له‌یرا نویسانن ئاسانه و داگردن هه‌ركه ئه‌را خوه‌یه و ڕه‌سینیشیان خێرا تره‌كه، و له‌یرا ریگه‌گه خاستره‌كه چوینكه هویچ سنوور و قه‌ید و شه‌رتیگ و هویچ چاودێریگ نه‌یرى و كه‌س حه‌ساوكتاو وه‌لدا نیه‌كه‌ید سه‌باره‌ت وه‌وه‌گ نویسانیده‌سه‌ى. به‌ڵكوو چه‌ن قانوون ئاسانیگه ك تویه‌نید وه گشت ئاسانییگ وه‌لیا مامه‌ڵه‌ت بكه‌ید. هه‌رچى بتوایمن نویسنیمن و داگریمن و بڵاوه‌و كه‌یمن وه هه‌ر شیوه‌یگ بتوایمن، مه‌ته‌ڵ نویسنیمن، په‌خشان داگریمن، وتار بڵاو كه‌یمن، جارجاریگ ڕه‌خنه‌یش گریمن، و فره‌جار ته‌علیقیش نویسنیمن و جوواویش ده‌یمن، و فره‌زیاى چیمن له تۆماركردن به‌شدارى كردن تاگه‌ر شماره‌ى گه‌ورایگ له خانه‌ى خوه‌مان مسۆگه‌ر بكه‌یمن، به‌شكه‌م به‌رهه‌میگى بكه‌فیده ده‌سمان و نازناو دیاریكریاییگ دره‌و بكه‌یمن و ئه‌ركه‌یل و پله و پایه‌یل به‌رزتر و خاستر گیر باریمن، وه‌ى جووره‌یشه مه‌یدان جموجویلمان گه‌وراتره‌كه‌و بوود ئه‌ویش وه‌ڕیگه‌ى ئه‌و ئاسانكاریه ك له‌و پله‌و پایه‌ى نووه كه‌فیده ده‌سمان. وه‌لى ئایا ئه‌یه‌سه ئامانجمان ك ته‌قه‌لا ئه‌راى ده‌یمن وه ئى نویسانن و بڵاوه‌و كردنمانه له ناو ئى تووڕ عه‌نكه‌بووتیه؟! تا یه‌ك په‌یامیگ ئه‌ده‌بى و ئه‌خلاقى و ئنسانى هه‌س ك ئه‌رك سه‌رشانمانه بتوایمن و نه‌توایمن بایه‌ته وه گشت وه‌رپرسیارییگه‌وه جیوه‌جیى بكه‌یمن؟! ئایا نویساننه‌گانمان په‌یامه‌یل ڕه‌سانن ئاساییگتره ك كه‌فتیه‌سه ژیر چاودێرى زیاتریگ و قانوونه‌یل په‌یڕه‌وكریاى له شوون ده‌رچوینیان حوكمیان كه‌ید؟! ئایا ڕى ده‌یمنه خوه‌مان له زیاتر له یه‌ك كه‌ناڵ ڕه‌سانن ئاسایى له شوونیگ دیاریكریاى بنویسیمن، تا له هه‌مان وه‌ختیش ماوه ده‌یمن وه كه‌یف خوه‌مان له چه‌ن شیوه‌یگ له شیوه‌گان ڕه‌سانن له تووڕ ئه‌نته‌رنێتى بنویسیمن؟! ئایا قانوونه‌یل وڵاته‌گه‌مان ماوه ده‌یده پیمان ك له زیاتر له یه‌ك شوون كار بكه‌یمن جوور فه‌رمانبه‌ر، جوور ئه‌وه‌گ له هه‌مان ه‌خت له چه‌ن ڕووژنامه‌یگ بنویسنیمن؟! و ئه‌را چه له وبلاگ و ماڵپه‌ره جیاجیاگان وه نازناوه‌یل ڕه‌مزى و درووكانى جیاجیایگ ئمزاى خوه‌مان داگریمن؟! و له‌هه‌مان وه‌خت له ڕووژنامه‌یل و كه‌ناڵه‌یل ڕه‌سمى ته‌نیا وه‌ناوه‌گه‌ى خوه‌مان زیاتر وه‌ناویگتر قه‌بوول نیه‌كه‌یمن بنویسنیمن و ڕه‌سمیگ جوان خوه‌مان وه‌لیا داگریمن و ئه‌گه‌ریش وه‌ى جووره نه‌ود تویڕه بویمن؟! پرسیاره‌یل فره‌یگن و له ناو خه‌یاڵ و فكرمان مینه‌ى جوواو باوه‌تیانه و ئازایانه كه‌ن! كیشه‌گه ها لاى خوه‌مان ك له پشت متمانه‌مان وه‌خوه‌مان خوه‌مان شاردیمنه‌سه‌وه و ئى كار نویسانن و داگردنه ئه‌را مه‌مه‌ر دڵ خوه‌مان كه‌یمنه‌ى ك شایه‌ت خه‌یر و شه‌ڕیش له‌تیان بوود، و ئه‌را چه‌ن وه‌ختیگیش ئه‌وه له هویر خوه‌مانه‌و به‌یمن ك خوداى مه‌زن یه‌كم و دویا چاودێره و خوه‌ى وه‌پیمان زانى ك نیازمان خه‌یره تا شه‌ڕ و وه‌گووره‌ى ئه‌وه حساو وكتاو وه‌لمانا كه‌ید.
