نه‌ريت قوربانيكردن له‌لای كورد
هه‌ر له‌رووژگاره‌يل كويه‌نه‌وه ك ئاده‌ميزاد له‌بان ئی گووشه‌ی زه‌ويه نيشته‌جی بويه قوربانيكردن په‌يا بويه . وه‌و مه‌عنا ك قوربانيكردن ئه‌را په‌رسگايه‌يل ئه‌نجام درياگه . ئه‌ويش وه‌مه‌به‌س وه‌خشين كووچكردگه‌يل بويه يا ئه‌را وه‌ديهاوردن دوعاو نزای زنگه‌يل . ئمجا له‌يرا وه‌گووره‌ی ئه‌وه‌ك تاريخ ژيان ئاده‌ميزاد له‌بان خاك كوردستان چووگه‌وه ئه‌را سه‌رده‌مه‌يليگ فره كويه‌ن ، هه‌ر له‌وه‌ر ئه‌وه تاريخ قوربانيكردنيش له‌شوون ده‌ركه‌فتن ئاده‌ميزاد و ئاشنابوين وه باوه‌ڕ و باوه‌ڕ دينی ده‌ركه‌فتگه ك تاريخه‌گه‌ی چووگه‌وه ئه‌را زياتر له سه‌د هه‌زار ساڵ .
له‌لايگ تره‌وه نزيكه‌ی چوار هه‌زار ساڵه عه‌يديگ دانرياگه ئه‌را قوربانيكردن و تاريخه‌گه‌ی چووگه‌وه ئه‌را هه‌ڵويست يا مه‌وقف (ئبراهيم كوڕ ئازه‌ر٢١٦٦ – ٢٠١٦)سڵام خودا له‌لی ، وه‌ئه‌وه‌ك ته‌نيا له‌وه‌ر خاتر خه‌ويگ بڕيار دا (ئسماعيل) كوڕی بكه‌يگه قوربانی ئه‌را خودا ، وه‌لی خودای په‌روه‌ردگار ره‌حمی وه‌پيا هات و له‌جيای ئسماعيل (وه‌ره‌ن)يگ كرده دياری ئبراهيم باوگی تا له‌جيای ئسماعيل كوڕی سه‌ری بووڕيگ . دی ئه‌و رويداگه بويه بوونه‌يگ ساڵانه‌و ناوی نريا (عه‌يد قوربان) . ك سه‌ره‌تا له‌لايه‌ن مه‌ردمان نيمه دويرگه ياجه‌زيره‌ی عه‌ره‌بيه‌وه سه‌رهه‌ڵدا ، دوياخريش وه‌ك ئه‌ركيگ دينی و كلتووريگ بويه نه‌ريتيگ دينی . ئمجا له‌شوون (٢٦) سه‌ده‌يش له‌و رويداگه ئه‌و نه‌ريته وه‌رجه (١٣) سه‌ده له‌چوارچيوه‌يگ ئسلامی ره‌سيه كوردستان و ئاشنا بوی وه كورد ، وه‌لی تائيسه‌يش نه عه‌ره‌به‌يل له‌مه‌عنای قوربانيكردن ره‌سينه‌سه‌وه نه‌يش كوردو نه‌ته‌وه‌يل موسڵمان تر .
جوير ئه‌وه‌ك له‌سه‌ره‌تاوه ئشاره‌ت وه‌پی كرديم ، نه‌ريت قوربانيكردن ته‌نيا نه‌وه‌سياسه دين ئسلامه‌وه ، به‌ڵكوو نه‌ريتيگ فره كويه‌نتره له‌ئسلام و له‌تاريخه‌گه‌ی (ئبراهيم كوڕ ئازه‌ر)سڵام خودا له‌لی ، چوينكه فره وه‌رجه ئه‌و تاريخه سۆمه‌ری و ئاشووری و ئه‌كه‌دی و چينی و هندی و ئيرانيه‌يل وه كورديشه‌وه قوربانيكردن كردنه نه‌ريت و ئه‌ركيگ دينی ئه‌را ئه‌و بت و په‌رسگايه‌يله ك كردوينه‌ی خودای خوه‌يان . ئمجا له‌يرا نه‌ريت قوربانيكردن لای كورد به‌سياسه قه‌يريگ ئه‌رك و بنه‌مای دينی و كوومه‌ڵايه‌تيه‌وه ، چوينكه جوير هه‌وه‌جه‌يگ هه‌ر تاك وخيزانيگ وه‌رجه هاتن عه‌يد قوربان بايه‌سه بڕيار قوربانيكردنيگ داوين وه نيه‌ت دڵه‌وه‌و نيه‌ته‌گه‌يش ئه‌را يه‌كيگ له‌كوچگردگه‌يل يا مردگه‌يل يا به‌عزه‌جاريگ ئه‌را زنگه‌يليش درياويگ تا خودای گه‌ورا له‌گه‌ناهه‌يلی خوه‌ش بووگ ، ئه‌ويش وه مه‌رجيگ ئه‌و حه‌يوانه ك كريه‌يگه قوربانی بايه‌سه (نه‌خوه‌ش و ئاوس و له‌ڕ و پير)يش نه‌وگ تا وه‌ختی به‌ش كريه‌يگ له‌ماڵه‌يل ده‌وروه‌ر دوعای پڕ وه‌دڵ بكه‌ن ئه‌را خاوه‌ن قوربانيه‌گه‌و تا په‌روه‌دگار ئه‌و قوربانيه قه‌بوول بكه‌يگ ، ك هه‌رچه‌نی خودا هه‌وه‌جه وه‌و قوربانيه نه‌يريگ ، وه‌لی ئامانجی ئه‌وه بويه ك ده‌وڵه‌مه‌نه‌يل وه‌و كاره كه‌ميگ له‌مه‌ينه‌تی فه‌قير و نه‌داره‌يل كه‌مه‌و بكه‌ن .
