گەنجەیل.. وزەی ئیرنگە و دروسکەرەیل بانان
فاتیمە سەڵاح ئەرکەوازی
گەنجی تەنیا قۆناغیگ لە تەمەن ئایەم نییە، بەڵم هاز بی پایانیگە و روح زینگیگە کە بزوێنەر سەرەکی ئاڵشتکاری ،و داهێنان، و وەنواچگن کۆمەڵگەی مرۆییە.
لەرووژ جیهانی گەنجەیل، جیهان رێز لە کوشان و داهێنان و هیوای نەوەیل نوو گرێد، نەوەیگ کە لەناوەین ئاڵنکاری پیچاوپیچەیل ئمڕوو تەقەلای دروسکردن ئایندەیگ رووشنتر و دادپەروەرانەتر دەێد.
رۆل گەنجەیل لە مقیەتیکردن و توونکردن فەرهەنگ و زوان و ناسنامەی نەتەوەیل جویر سەنگ بناغە و ئەوزەڵکردنە، گەنجەیل خاوەن هویرمان جیاواز و باوەڕ وە خوەی نەک تەنیا بوونە پاسەوان میرات رەسەن وەرین، بەڵکم وە ئامراز هاوچەرخ و دیدگای نوو دەنگ رەسەنایەتی رەسننە جیهان، لە مژارەیل زانست، ئەدەب، هونەر و تەکنەلۆژیا، هەر وەخت دەرفەت و پشتگیری شایستە دریابوود وە گەنجەیل ئەنجامەگەی شۆرش فکری و پیشکەفتن بی وینە بویە.
باوجی ئێ هازە گەپ و پۆلاییە هەوەجە وە دەرفەتیگ یەکسان و پەروەردەی سەردەمی و رەخسانن زەمینەی ئەوزەڵدان دیرێد، کۆمەڵگەیگ بڕوا وە توانای گەنجەیل بیاشتوود گوش لەلیان بگرێد، کۆمەڵگەیگ زینگە و وەرەو ئایندە گام نێد.
ئمڕوو (12 ئاب) رووژ گەنجەیل، رووژ دووپاتکردن بەڵێنەیلە ئەرا پشتگیری گەنجەیل و داننان وە مافەیلیان و رێزگردن لەو شەکەتیە ک رووژانە ئەرا بونیاتنان بانانیگ خاستر کیشن، گەنج نەک تەنیا ئایندە، بەڵکم ئیرنگە و زەمینەی سەرەکی ئاڵشتکاریە، با ئمڕوو بوودە رووژ وە هویرهاوردن باوەڕداشتن وە توان گەنجیگ باوەرداشتنە وە رووشنایی ئایندەی گشت مرۆڤایەتی، جویر ئەوەگ نێلسۆن ماندێلا ئوشێد:
"گەنجەیل ئمڕوو، بیناسازەیل ئایندەن. ئەگەر بانانیگ رووشن توایمن، بایەت ئمڕوو باوەڕ وە توانایەیلیان بیاشتویمن".
