مهبهس له(حوكم قهرهقوش)چهس؟
![مهبهس له(حوكم قهرهقوش)چهس؟](https://media.shafaq.com/media/archive/files/Archive.jpg)
(قهره) وهمهعناى سیه تیهیگ و (قوش)یش جوریگه لهباڵدار دهیشتهكى، ئمجا وشهى قهرهقوش لهلى دروس بویهو كریاسه نازناو (لقب) ئهرا یهكیگ له حاكمهیل مسر لهوهخت مهمالیك، بیجگه ئهوهیش ئى وشه بویهسه پهندیگ و ههمیشه لهزوان مهردم ژنهفیمنهى لهوهختیگ ئویشن(حوكمهگهى حوكم قهرهقوشه).
كهسهیلیگ ئویشن ئى پهنده لهبان ئهو حوكم زاڵمانه وتریهیگ ك دهسڵاتدار وهزوور و زوڵم چهسپنیگهى، ههر لهى باوهتیشهوه یهكیگ لهوهزیرهیل وهناو (ئهبولمهكارم ئهسعهد كوڕ موههزهب كوڕ مهماتى) ك كابرایگ نهسرانى بوى و ناكووكى داشتگه وهل قهرهقوشا، دى بوختان فرهیگ ئهڕا قهرهقوش دروسكردگه ك گوایا جیاوازى لهناونى زوڵملیكریاگ و زاڵم نهكردگهو ڕى شهیتان گرتهسهوهر و حوكم دڕندانه دهیگ وهجووریگ ك لهكتاوهگهى وهناو (فاشوش لهحوكم قهرهقوش) باس لهخراوى حوكم قهرهقوش كردگهو مهردمان فرهیگیش باوهڕ وهقسهیلى كردنه.
وهلى لهڕاسى قهرهقوش وه(بههائهدین كوڕ عهبدوڵڵا)ى ئهسهدى وتنهسهى ك جایهڵ جوانیگ بویه لهناوچهى ئاسیاى بویچگ و دویاخر چیهسهڕا دیمهشق و پهیوهندى كردهسه سوڵتان (ئهسهدهدین) مامهى (سهڵاحهدین ئهیووبى)و خزمهتى كردگه ، ئمجا لهشوون مردن ئهسهدهدین مامهى، كریاسه حاكم مسر و ماوهى زیاتر له(30) ساڵ لهخزمهت سهڵاحهدین بویهو دویاخریش وهختى سهڵاحهدین لهدهوروهر مسر دهرچیه كاروبار قهسرهگهى گشتى داسه دهسیهوهو ماوهیگیش لهجیاى ئهو لهمسر بویهو سهڵاحهدین متمانه وهپى داشتگهو لهیوا تاریف كریاگه ك قهرهقوش پیاویگ نیهتپاك و خاس بویهو ههر ئهویش دیوار چواردهور مسر دروسكردگهو خزمهت فرهیگ وه موسڵمانهیل ڕهسانگه، تا دویاخر مهردم رهسینهسه ئهو باوهڕه ك زانستنه قسهى كوڕ مهماتى راس نیهو گشتى بوختانه.
وهختى سهڵاحهدین شار (عهكا) گرت، دارهى دهس قهرهقوش، وهلى وهختى دوباره فرهنجهیل شارهگه گرتنهوه، قهرهقوش یهخسیر كریاو ناچار بوى وه(10)ههزار دینار لهساڵ (588ك)خوهى لهدهسیان قورتار بكا . ئمجا (بههائهدین كوڕ عهبدهڵڵا ئهسهدى) ك ناسریاگه وهقهرهقوش خاسى فرهیگ لهبان موسڵمانهیل داشتگهو ههر لهوهر ئهوهیش سهڵاحهدین ئهیووبى خوهشى تواسگهو متمانه وهپى داشتگهو فرهجاریش كردهسهى جینشین خوهى. وهلى لهوهر خاتر ئهوهك كابرایگ جویر كوڕ مهماتى ك لهوهخت خوهى وهزیر بویهو دهور داشتگه، ئهو نازناو یا لهقهبه ئهڕاى دهركردگهو ناوى ناگه قهرهقوش و ههر لهو سهردهمیشهوه تائیسه ناو قهرهقوش جویر پهندیگ كهفتهسه دهم مهردم.
سهرچهوه: ئهنتهرنێت: نور البدر