له نه‌ورووز به‌شيان بووده دويكه‌ڵ ئه‌كسووز
چه‌سپياگيگ له‌ناو كورده‌واری خوه‌مان ، ك له‌رووژ ٢١ ئادار گشت ساڵيگ رويده‌يگ ، ئی تاريخيشه ئاشكراو دياره له‌لای گشت كورديگ و ته‌نانه‌ت له‌لای فره‌يگ له‌مه‌ردمان بيگانه‌و غه‌يره كورديش ، ئی رووژه سه‌ره‌تای قورتاربوين كورده له‌ده‌س جه‌ور وسته‌م وئه‌وه بوی (كاوه‌ی ئاسنگه‌ر) رووژيگ پڕ له‌فه‌خر وشانازی ئه‌را ملله‌ته‌گه‌ی له‌ناو لاپه‌ڕه‌ی ته‌ڵايین تاريخ توومار كردو زوڵم (زوحاك) له‌ناوبرد .
له‌يرا مه‌به‌س باسه‌گه‌م ئه‌وه‌سه ك له‌ی رووژه وه‌تايبه‌ت پياگه‌يل پۆليس و هاتوچووكردن يا مرور و خاڵه‌يل وشكانن (سيطرات) زه‌حمه‌ت فره‌يگ كيشن و ئه‌رك خوه‌يان وه‌جی ره‌سنن و شه‌كه‌تی فره‌يگ دوينن له‌رووژه‌يل نه‌ورووز ، چوينكه له‌و رووژه‌يله قه‌ره‌باڵغی دروس بووگ و خيزانه‌يل فره‌يگيش ده‌رچن ئه‌را سه‌يران و خوه‌شی نه‌ورووز و روی كه‌نه هه‌رێمه‌گه‌مان ئه‌را وه‌سه‌ربردن خوه‌شی و ری و ره‌سم عه‌يد نه‌ورووز ، ئه‌وانيش ئه‌ركيان ئه‌وه‌سه ك مقه‌يه‌تی له سه‌ڵامه‌تی و كه‌مه‌وكردن ئه‌و قه‌ره‌باڵغيه بكه‌ن ك له‌ڕاسی شايسته‌ی ده‌سخوه‌شی كردنن ، وه‌لی فره وه داخه‌وه وه‌چه‌واشه‌ی جاده‌و ری وبانه‌يل تر ته‌ماشا كه‌يد قه‌ره‌باڵغترين ری وبان له‌گشت ساڵيگ له قه‌زای ( شاره‌بان ) رويده‌يگ ك كه‌فيگه ناونی شار باقووبه‌و خانه‌قيه‌وه ، ك بايه‌سه زياتر له‌نيمه‌ی رووژه‌گه له‌و خاڵه‌يل وشكانن يا سه‌يته‌ره‌يل شاره‌بانه بووه‌يده سه‌ر و به‌عزه‌جاريش خيزانه‌يل فه‌يگ له‌داخا گله‌و خوه‌ن و بيبه‌ش بوون له‌خوه‌شی نه‌ورووز ، يه‌يش وه‌خاتر ئه‌وه‌ك مه‌ردمانيگ بی وژدان وكينه‌ت له‌دڵ و نه‌يار ملله‌ت كورد له‌و (شاره‌بان)ه بوينه‌سه بايس شيوانن شادی نه‌ورووز له‌مه‌ردم و هه‌ر وه‌بی هووده ئه‌و مه‌ردم به‌سه‌زوانه گيرده‌ن و خوه‌يان زياتر سه‌به‌ب قه‌ره‌باڵغی و ناڕه‌حه‌تيه‌گه‌ن و دی ئه‌و مه‌ردم و خيزانه‌يليشه ك هاتنه ئه‌ڕا هه‌رێم كوردستان ناچار بايه‌سه زوورم وه‌خته‌گه‌يان له(نه‌ورووز به‌شيان بووگه دويكه‌ڵ ئه‌كسووز) سه‌ياره‌و له‌جيای كه‌يف وسه‌فاو هه‌ڵمژين هه‌وای ئازادی دويد ئه‌كسووز سه‌ياره‌يل هه‌ڵمژن تا وه‌ختيگ خودا فه‌ره‌جيگ ئه‌ڕايان دوينيگ و له‌و قه‌ره‌باڵغيه ك وه ئه‌نقه‌ز دروسی كريه‌يگ قورتاريان بووگ .
دياره ئه‌و ناحه‌زه‌يله ك له‌و خاڵه‌يل وشكانن يا سه‌يته‌ره‌يله وسيه‌ن ئه‌را ريكخستن و نه‌هيشتن كيشه‌ی قه‌ره‌باڵغی نه وژدان ونه‌يش مه‌عنای ئنسانيه‌ت زانن و هه‌ميشه حه‌ز كه‌ن وه ئه‌نقه‌ز تيه‌ڵی بيه‌نه خوه‌رد مه‌ردم و خوه‌يان قه‌يز بكه‌ن له‌وه‌رچه‌و مه‌ردم و ئاماده‌ن گشت ره‌خنه‌يگ بارنه بان خوه‌يان ته‌نيا له‌وه‌ر ئه‌وه‌ك عه‌يد نه‌ورووز وتام خوه‌شيگه‌ی له‌كورد بشيونن ، چوينكه مه‌ردمان فره‌يگ له‌كورد زوانه‌يل خوه‌مان نيشته‌جی شاره‌يل ناوڕاس وباشوور عراقن و مه‌گه‌ر رووژيگ جوير رووژ نه‌ورووز بتويه‌نن له‌ماڵ ده‌ربچن و روی بكه‌ن وڵات باوانيان ، وه‌ختيگيش ره‌سنه شاره‌بان خوسه‌ی فره‌يگ نريه‌يگه بان دڵيان و نائوميد كريه‌ن و زه‌وقيان شيويه‌يگ ئه‌را جاريگ تر له‌ی جووره رووژه‌يليگ بووگه ده‌رسيگ ئه‌ڕايان و نه‌ورووز خوه‌يان له‌ده‌س بيه‌ن و ده‌رنه‌چنه ده‌يشت . وه‌لی ئيمه وه‌گشت دڵنياييگه‌وه ئويشيم ئيراده‌ی مه‌ردم كورد فره له‌وه به‌رزتره‌و نه‌ك هه‌فت سه‌عات وهه‌يشت سه‌عات ، به‌ڵكوو رووژه‌گه گشتی گيريان بيه‌ن له‌و سه‌يته‌ره‌يله له نه‌ورووز دويريانه‌و نيه‌خه‌ن و له‌ماڵ خوه‌يانيش بوون هه‌ر نه‌ورووز له‌لايان پيرووزه‌و شانازی وه‌پيه‌وه كه‌ن . وه‌لی ئويشيم خودا ئه‌را ئه‌وه‌ك نه‌سازيگ بووگه ريگر له‌وه‌رده‌م هه‌ر خوه‌شييگ و ئوميده‌واريم ئه‌را نه‌ورووز ئاينده هويچ دڕگ و په‌يكوڵيگ له‌بان ريه‌يلمان نه‌مينيگ .
