عيراق له‌ناونی دجله و فورات
دريژه ده‌نه كه‌مه‌وكردن ئاو چه‌مه‌يل دجله و فورات ئه‌وه‌يش له‌وه‌ختيگ ئمساڵ واران يه‌خ فره‌يگ واريه ، له‌لايگتره‌و قه‌وڵه‌يل حكوومه‌ت توركيا ئه‌را زياتره‌و كردن ئاو چه‌مه‌يل دجله‌و فورات جيوه‌جی نه‌كريان وه له‌لايگتره‌و قه‌وڵه‌يل مه‌حموود ئه‌حمه‌دی نژاد سه‌رۆك ئيران له‌وه‌خت سه‌ردانی ئه‌را عيراق جيوه‌جی نه‌كريانه و جوور خوه‌يان مه‌ننه وه‌جووريگ بڕيار بوی ئاويگ وه‌ره‌و پارێزگای دياله و ده‌ريای عه‌ره‌ب تيه‌يگ زيايه‌و بكه‌ن. وه‌زاره‌ت سه‌رچاوه‌يل ئاو عيراقی جاری ديريگ توركيا و ئيران وه كه‌مه‌و كردن ئاو چه‌مه‌يل دجله‌و فورات تاوانبار كه‌يگ يه‌يش له‌وه‌ختيگه ك ئمساڵ واران و يه‌خ فره‌يگ له هه‌ردوو ئه‌ی وڵاته‌يله واريه. وه‌زاره‌ت سه‌رچاوه‌يل ئاوی هه‌ميش ئاشكرا كرد ك ئاو كل كرياگ له چه‌م فورات جاری كه‌مه‌و و ئاويگ له ناوچه‌ی حوسيبه تيه‌يگه ناو خاك عيراق فيشتر له 250 متر چوارگووشه نيه يه‌يش له‌وه‌ختيگ بايه‌د ئه‌ی ڕيژه نزيكه‌ی 500 متر چوارگووشه بوود . له‌لايگتره‌و ئمساڵ له ئيرانيش واران فره‌يگ واريه ك ده‌سمييه‌ت چه‌مه‌يل دياله ئه‌يا، وه‌لی حكوومه‌ت ئيرانی له‌ڕێگه‌ی دروس كردن به‌ندئاوه‌يليگ له‌بان ئه‌ی چه‌مه‌يله نيه‌يليگ ئاو فره‌يگ ئه‌را عيراق بايگ و وه‌له‌لايگتره‌و توركيايش به‌ندئاوه‌يل گه‌ورايگ دامه‌زرانگه ك فيشتر ئاو ئه‌و چه‌مه‌يله له‌ناو توركيا وسنيگ و نيه‌يليگ ئه‌راعيراق بايگ و زه‌ره‌ده‌يل فره‌يگ وه ژينگه و كشتوكاڵی وڵاتمان ره‌سانگه . عيراق هه‌وه‌جه ديريگ ك له‌ی باوه‌ته دادوه‌ری له‌هه‌قی بكريه‌يگ و به‌شيگ له ئاو ئه‌ی چه‌ميله ئه‌رای تايبه‌ت بكريه‌يگ. حكوومه‌ت ئايه‌نده‌ی عيراق بايه‌د ئاماده‌كاريه‌يل گرنگيگ وه‌ل توركيا و ئيران جيوه‌جی بكا تا بتويه‌نيگ وه هه‌قه‌يل ئاوی خوه‌ی به‌رسيگ .
