سيستم دكاتۆريه‌ت له‌سه‌رده‌م ديموكراسيه‌ت
له ديموكراسيه‌ت بوی و تا ئيسه‌يش سه‌ركرده‌يل ئی وڵاته قه‌سه‌م وه ديموكراسيه‌ت خوه‌ن ، وه‌لی ئه‌گه‌ر بايمنه پای راسی دوينيم چشته‌گه چه‌واشه‌وه بويه‌و دی نيه‌زانيم ئه‌گه‌ر له‌ئاينده‌يش كار له‌كار بترازيه‌يگ و له‌ی گه‌مه‌ی سياسيه سه‌ر ده‌رنه‌كه‌يم ك سه‌ره‌تا جووريگ بوی و ئيسه جووريگ تره .
زوورم ملله‌ته‌يل عراق و ئۆپزسيۆنه‌يل وه‌تايبه‌ت ساڵه‌يل دوير و دريژيگ وه حه‌سره‌ته‌وه چه‌وه‌ڕی ئه‌وه كردن رژيم سه‌دام نه‌مينيگ و خه‌ڵك عراق قورتار بووگ له زاڵم و خوينمژه‌يل و فره‌جار ژنه‌فتيايم له‌ده‌م ئه‌وانه‌ك له‌شوون ساڵ ٢٠٠٣ حوكمڕانی عراق گرتنه ده‌س ئه‌گه‌ر هات و عراق له‌ژير بار دكتاتۆريه‌ت ده‌رچی ئه‌وه بايه‌سه له‌ڕی ديموكراسيه‌ت و ديموكراسيخوازيه‌وه ساڕيژ زه‌خمه‌يل ملله‌ت بكه‌يم و بنيات عراق تازه‌يگ له‌بان په‌يڕه‌و ديموكراسيه‌ت بنه‌يم و جاريگ تر دكتاتۆريه‌ت نايگه‌وه ئه‌را ده‌سڵات ، ئه‌يه قسه‌و بانگه‌واز ئه‌و كه‌سه‌يله بوی ك ئيسه كليل ديموكراسيه‌ت گوم كردنه‌و نيه‌گه‌ردن ئه‌ڕای تا بوننه‌وه‌ی و ئی ملله‌ته له تيه‌ريكی دويره‌و بخه‌ن .
دكتاتۆر هه‌ر ئه‌وه نيه مه‌ردم بكوشيگ و قڕان بخه‌يگه ناو مه‌ردم ، نه‌خه‌ير ، دكتاتۆر وه كه‌سيگ ئويشنه‌ی ئه‌را سيفيگ داريگ له‌ڕيشه هه‌ڵكه‌نيگ يا له‌وه‌ر خاتر به‌رژه‌وه‌ندی و مه‌رام تايبه‌ت خوه‌ی مامڵه وه چاره‌نويس ملله‌ته‌يل بكه‌يگ ، چوينكه هه‌ر ئه‌وه‌نه بوی ده‌نگ وه‌پی درياو ده‌سی له كورسی گير كرد دی قسه‌ی ملله‌تيگ نه‌ژنه‌فت ك تا دويه‌كه چه‌وسياگ و ژيرده‌سه بويه‌و زوڵم و زوور فره‌يگ له‌لی كرياگه‌و هه‌ر وه‌ئاشكرا هه‌قی خورياگه ، دكتاتۆر وه‌و كه‌سه ئويشنه‌ی ده‌سه‌خڕه‌ی خاوه‌ن هه‌قه‌يل كردگه‌و نيه‌يليگ خاوه‌ن ماڵ بايگه ناو ماڵ خوه‌ی ، دكتاتۆر كه‌سيگه وه‌چه‌و خوه‌سه‌و كينه‌ته‌وه بنوڕيگه نه‌ته‌وه‌يل تر بيجگه نه‌ته‌وه‌گه‌ی خوه‌ی . گشت ئی سفه‌ته‌يله له‌ناو سستم حوكم ئيسه عراق ره‌نگه‌و دانه‌و شيوه‌يگ تر گرته‌سه خوه‌ی و سه‌رچه‌وه‌يشی چووگه‌وه ئه‌را وه‌خت دكتاتۆريه‌ت و رژيم به‌عس .
بيگومان ئيمه جوير ملله‌ت كورد ئاشتيخواز و ديموكراسيه‌تخواز بويمنه له‌گشت وه‌خت و سه‌عاتيگ و هه‌ميشه وه‌ی خاتره كار كرديمنه‌و سه‌ركرده‌يلمان هه‌وڵ ئه‌وه دانه ديموكراسيه‌ت بچه‌سپنن و ملله‌ت كوردمانيش وه ده‌نگ به‌رزه‌وه پيشوازی له‌ديموكراسيه‌ت كه‌ن ، وه‌لی له‌يوا دياره ئی دروشم يا شعاره وه‌مه‌يل ده‌سڵاتداره‌يل به‌غداو به‌رژه‌وه‌ندی ئه‌وان نيه‌و هيمان هه‌ر په‌يڕه‌و سستم دكتاتۆريه‌ت كه‌ن و دياره په‌يوه‌ندی بته‌ويگ ديرن وه‌ل ئه‌و سستمه‌و نيه‌توان دڵ له‌لی بنه‌ن و خوه‌يان له‌لی بڕه‌نجنن ، چوينكه ديموكراسيه‌ت فره چشت له‌ليان توايگ و بايه‌سه ئاماده بوون ئه‌را جی وه‌جی كردنی و ئه‌را جواوه‌وداين داواكاری ملله‌ت سته‌مديده‌و يه‌يش بوار يا مه‌جال ئه‌وه ئه‌ڕايان نيه‌يگ وه‌خواست و ئاره‌زوو خوه‌يان ره‌فتار بكه‌ن ، وه‌لی هيمان ئه‌قڵ دكتاتۆريه‌ت هه‌ر زاڵه‌و جاريگ فره‌ی مه‌ندگه پا له ڕكاو دكتاتۆريه‌ت بارنه خوار و سروشت ديموكراسيه‌ت بوينن و دويره‌و بكه‌فن له تايفه‌گه‌ری و ئه‌قڵيه‌ت تونڕه‌وی و شۆڤێنی . ئمجا ئايا كام له‌وانه‌ك حوكم ئی عراقه كردنه‌و حاشا له سستم دكتاتۆريه‌ت كردنه ؟ يه‌يش جواوه‌گه‌ی ئاشكراو دياره .
