سه‌ردانيگ گرنگ ياموهم له‌وه‌ختيگ گونجياگ
كوردستان كاك مه‌سعود بارزانی كرد ئه‌را سه‌ردان ئه‌مريكا ، ئه‌وه‌ك له‌گشتی زياتر مايه‌ی شانازيه ئه‌را ملله‌ت كورد ، ئه‌وه‌سه ك ئه داوه‌ت سه‌رووك بارزانيه ئه‌را سه‌ردان ئه‌مريكا وه‌زير وه‌رگری يادفاع ئه‌مريكی (رۆبه‌رت گێتس) هاورده‌ی له‌وه‌خت سه‌ردانه‌گه‌ی ئه‌را كوردستان و چه‌ن رووژيگ له‌دويای ئاشكراكردنه ره‌سميه‌گه‌ی ماڵ چه‌رمگ ئه‌را جی وه‌جيكردن مادده‌ی ١٤٠ ده‌ستوور ، يه‌يش گره‌نتی ئه‌مريكاس ئه‌را پشتگيری كورد له‌پرووسه‌ی سياسی عراق وه‌گووره‌ی ده‌ستوور عراقی ك له(٨٠%) مه‌ردم عراق ده‌نگ ئه‌ڕای دان و په‌سه‌نی كردن . له‌لايگ تره‌وه ئه‌گه‌ر بايگ و ته‌ماشای سه‌ردانه‌گه‌ی سه‌رووك كوردستان مه‌سعود بارزانی بكه‌يم ئه‌را ئه‌مريكا ، ئه‌يه تاقيكردن گه‌ورايگه‌ئه‌را كورد له‌عراق ك يه‌يش مه‌عنای ئه‌وه‌سه كورد پايه‌ی گرنگ ياموهميگ ديريگ له‌لای ئداره‌ی ماڵ چه‌رمگ و له‌هه‌مان وه‌خت وه‌ئه‌هميه‌ته‌وه ته‌ماشای پرووسه‌ی هه‌ريم كوردستان ئه‌كا ك نزيكه‌ی ١٩ ساڵه وه جوانی چووگه رييه‌وه‌و كورد له‌و ماوه ئسپات ئه‌وه كردگه ك ملله‌تيگ ئاشتيخوازن و نيه‌توان كيشه دروس بكه‌ن و ده‌سكردنه نه‌عره‌ته‌يگ ئازايانه‌ی خزمه‌تگوزاری و ئاوه‌دانی ، يه‌يش ره‌نگه‌وداين خوه‌ی ديريگ لای گشت دووسه‌يل ملله‌ته‌گه‌مان وه‌تايبه‌ت واشنتۆن ك رووژ وه رووژ په‌يوه‌نديه‌يل خوه‌ی خاستره‌و ئه‌كا وه‌ل هه‌ريم كوردستانا جوير ئه‌وه‌ك جه‌خت له‌بانی كريا له‌لايه‌ن ماڵ چه‌رمگه‌وه له ٦ / ١٢ / ٢٠٠٩ .
خاڵيگ تر گرنگ ياموهم هه‌س ، ك ئه‌ويش ئه‌وه‌سه عراق وه‌ره‌و هه‌ڵوژاردنيگ گشتی چووگ ، ئه‌را ئی كاريشه رووژ ٧ / ٣ / ٢٠١٠ ده‌سنيشان كرياگه‌و كورد بووگه‌لايه‌نيگ موهم ئه‌و هه‌ڵوژاردنه ، له‌شوون هه‌ڵوژاردنه‌گه‌يش وه‌دڵنياييه‌وه نه‌خشه‌ی عراق گويڕيه‌يگ و شيوازيگ تر گريگه خوه‌ی و سه‌رووك ئۆبامايش وه‌ی چشته خاس زانيگ ك ده‌ور كورد چه‌نيگ گرنگ ياموهمه له‌شوون هه‌ڵوژاردنه‌گه . له‌وه‌ر ئه‌وه حه‌ز كرد وه‌ل سه‌رووك بارزانيا دانيشتن و گفتوگوو بكا ، چوينكه ئه‌وه‌ك كورد داوای ئه‌كا له‌ده‌ستوور هه‌ميشه‌يی عراق نه‌چيه‌سه ده‌يشت وه‌تايبه‌ت له‌مه‌سه‌له‌ی كه‌ركووك و ئه‌و ناوچه‌يله ك كيشه ها له‌بانيان ، ك ئه‌ويش مادده‌ی ١٤٠ ده‌ستوور چاره‌سه‌ر گونجياگيگ ئه‌ڕای داناگه ، وه‌لی كاروه‌ده‌سه‌يل به‌غدا گرفت خه‌نه وه‌رده‌می و كيشه ئه‌ڕای دروس كه‌ن .
سه‌ركردايه‌تی كوردستان و خود سه‌رووك مه‌سعود بارزانی ئاماده نه‌وينه رووژيگ له رووژان واز له كوردستانيه‌ت كه‌ركووك بارن ، جوير ئه‌وه‌ك بارزانی نه‌مر له‌ساڵ ١٩٧٤ واز له‌كه‌ركووك ناوردو جه‌نگ له‌كوردستان ده‌سكرده‌پی ، بيگومان تويه‌نيم بويشيم ئداره‌ی ماڵ چه‌رمگ له‌ی خاڵه ره‌سيه‌سه‌وه ، هه‌ر له‌وه‌ر ئه‌وه‌يش له‌ئاشكراكردنه‌گه‌ی ماڵ چه‌رمگ جه‌خت له‌بان مادده‌ی ١٤٠ كرياگه‌و ئشاره‌ت وه جی وه‌جيكردنی كريه‌يگ ، چوينكه ئه‌مريكا ئه‌وه لای ئاشكراس هه‌ر گويڕانكارييگ له عراق په‌يا بووگ بايه‌سه ئاگادار كورد له‌لی بكريه‌يگ و بايه‌سه سه‌ركردايه‌تی كورديش له‌هه‌ر گويڕانكارييگ له‌عراق ره‌زامه‌نی نيشان به‌يگ ، چوينكه وه‌بی ره‌زامه‌نی سه‌ركردايه‌تی كوردستان پرووسه‌ی عراق روی وه‌ڕوی كيشه‌و گرفت بووگه‌وه .
