ركابهری شهرهفمهندانه
![ركابهری شهرهفمهندانه](https://arcellabucket.fra1.cdn.digitaloceanspaces.com/media/archive/files/Archive.jpg)
ئاموژگاريهيل و بانگهشهيل فرهيگ ك لهلايهن دهزگايل راگياندن جوور وهجوور پهخشهو كريهن ئهوهيش بيجگه ئهو منبهرهيل سياسی و رێكخراوهيل كۆمهڵگای مهدهنيهگ وجوود ديرن . كانديد چ لهچوارچيوهی ئێئتلافيگ يا كوتلهی سياسيگ يا چ وهشيوهی سهروهخۆيگ خوهی ئهرا ههڵوژاردن كانديد كردگه هيچ وهربهسيگ لهوهردهمی نيه ئهرا دعايه كردن و ئاشكرا كردن ديدگا و بهرنامهيل ههڵوژاردنی خوهی ئهرا دهنگدهرهيل عراقی ئهوهيش لهچوارچيوهی ئهو ياسايله ك لهلايهن كۆميسيۆن باڵای ههڵوژاردنهيل ئهرای دياری كرياس تا ههڵوژاردنهيل پاك و دادوهرانهيگ زامن بكريهيگ . ئهی دهرفهت يا فۆرسهتهيله ك ئهرا چالاكی سياسيه درياسه ههزارهها ههزار كانديد له گشت لای وڵات تهنيا وهخاتر وجوود دهسهڵات ديمۆكراتی ك وهگورهی دهستوور دامهزرياس زامن ئهكريهيگ وهجووريگ خهت قرمزيگ ئهرا بهشداری سياسی دياری نهكرياس وهلی وهی مهرجه ك وه عراق تازه ئيمان داشتوود و وه بنهوايل پرۆسهی سياسی و پرۆژهی نيشتمانی ئيمان داشتوود وچ له وهخت دهسهڵات دكتاتۆری وهرين و چ لهی وهختمانه دهسی وهخوين مللهت عراق قرمزهو نهويد .
گرنگ ئهوهسه ك كانديد عراقی له گرنگی وهكار بردن كهشوههوای ديمۆكراتی و ئهی دهرفهتهيله ك درياسهپی ئاگادار بوود وه ديمۆكراتی و ئازاديهيل وڵات وهشيوهی غهڵهتيگ وهكار نهوهيگ ك لهبان پرۆژهی نيشتمانی وڵات كاريگهری خراو بنهيگ و ياسايل بنهوايل دياری كرياگ له وڵات بشيونيگ و دهس بكهيگه گووڵ داين هاووڵاتی تا بتويهنيگ دهنگهيليان وهدهس باريگ .
كانديدهيل بايهد بزانن ك بانگهشهيل ههڵوژاردنيان وهل ههوهجهيگ و ديدگا و نگرانيهيل مللهت عراق بگۆنجيهيگ و درۆشمهيليگ نهيهيگ ك وهل بنهوايل راسی نهگۆنجيهيگ بهڵكهم بايهد گشت قسيهيلی راس بوود و ههر لهسهرهتاوه وهل هاووڵاتی لهبان بنهوای راسی و روشنی كار بكا . گشت كانديدهيل بايهد بزانن ك دهنگدهر عراقی وه تومهتواركردن و خراوكردن ديدگايل كانديدهيل ترهك و قهوڵهيل دروو ههوهجه نهيرن بهڵكهم ههوهجهيان ئهوهس ك كانديد عراقی لهسهرهتاوه وهليان راس بويشيگ و ركابهری يا مۆنافسهی شهريفيگ داشتوود .