ریگه‌ى ئه‌وریشم
تویه‌نیم بویشیم: له‌سه‌رده‌م كویه‌ن و له‌سه‌ده‌یل وه‌رین، كوردستان باشوور شوونیگ گرینگ بویه له‌ڕوى ستراتیجیه‌ت و بازرگانیه‌وه، ك بیگانه‌یل فره‌یگ وه‌رده‌وام گرینگى وه‌پى دانه‌و گه‌شتكه‌ره‌یلیان له‌بانى نویسانه‌و باسكردنه له‌ڕوى ده‌وڵه‌مه‌نى سامانه‌یل سروشتى بان زه‌وى و ژیر زه‌وى، ئمجا هه‌ر ئه‌وه‌یش بویه‌سه هووكار ئه‌وه‌ك بووگه كاروانسه‌راى دیارو ئاشكرایگ، ك وه‌دریژایى تاریخ ئۆرۆپیه‌یل چه‌و بڕینه‌سه بانى و خه‌ێ وه‌پى دانه، ئه‌یه بیجگه ئه‌وه‌ك گشت وه‌ختیگ ڕووژهه‌ڵاتناسه‌یل له‌وه‌ر خاتر ده‌سكه‌فت زانیارى، خاك كوردستان كردنه‌سه شوون گه‌شت و له‌یه‌كه‌وداین یا دراسه‌تكردنیان.
وه‌ل ئه‌وه‌یشا له‌ڕوى پیكهاته‌ى مه‌ردمه‌گه‌یه‌وه، كوردستان شوون ژیان ڕه‌گه‌زه‌یل و دینه‌یل جووراو جوور و بویه، ك یه‌یش یه‌كیگ تر بویه له‌هووكاره‌یل هاتوچووكردن بیگانه‌یل ئه‌را ناوچه‌گه، وه‌تایبه‌ت كاروانسه‌راى بازرگانه‌یل بویه، ك وه‌جووریگ له هه‌ر وڵات ولایگه‌وه هاتنه وه‌ناوچه‌یل كوردستانا په‌ڕینه‌سه‌وه.
ڕیگه‌ى ئه‌وریشم، ڕیگه‌یگ ستراتیجى بویه ئه‌را بازرگانه‌یل له‌وه‌خت هاتوچووكردنیان ك ئیسه ئویشنه‌پى(ده‌یشت هه‌ریر)و سه‌ر وه‌پاریزگاى هه‌ولێر هه‌ڵكه‌فتگه، ده‌یشت هه‌ریر ڕى كاروانسه‌راى بازرگانى یا توجاره‌ت ئه‌وریشم بویه‌و ئۆرپیه‌یل له‌وه‌خت گه‌شتكردن یا بازرگانیكردن گرینگى فره‌یگ وه‌ى ڕیگه دانه‌و هه‌ر له‌وه‌ر ئه‌وه‌یش وه‌پى وتنه (ڕیگه‌ى ئه‌وریشم).
بیگومان ئیسه‌یش ریگه‌ى ئه‌وریم(ده‌یشت هه‌ریر) له‌ڕوى كشتوكاڵییشه‌وه، زه‌وى پڕ له‌پیت و به‌ره‌كه‌ت وه‌رفراوانیگه‌و حكوومه‌ت كوردستان تویه‌نیگ بكه‌یگه‌ى سه‌رچه‌وه‌ى خاسیگ ئه‌را به‌رهه‌مه‌یل جووراو جوور له‌وه‌ر خاتر به‌رزه‌وكردن ژیرخان ئابوورى، وه ئه‌وه‌ك گرینگى یا ئه‌همیه‌ت وه‌ناوچه‌گه به‌یگ و پشتگیرى جفتیاره‌یل بكا له‌وه‌رخاتر كاڵین چشته‌یل جووراو جوور و به‌رزه‌وبوین ئابوورى هه‌رێمه‌گه، چوینگه ناوچه‌ى هه‌ریر له‌لایه‌ن ئاوداریه‌وه كانیاوه‌یل فره‌یگ دیریگ و بیجگه ئه‌وه‌یش ئه‌را كاڵین ته‌ماكوو شوون خاس و گونجیاگیگه‌و له‌هه‌مان وه‌خت حكوومه‌ت هه‌رێم كوردستان تویه‌نیگ نه‌ف له‌لى وه‌ربگریگ ئه‌را وه‌خاوه‌نكردن مه‌گه‌س هه‌سه‌ڵ و به‌رهه‌مه‌یل تر.
