دیموكراسى بى دیموكراتهیل
![دیموكراسى بى دیموكراتهیل](https://media.shafaq.com/media/archive/files/Archive.jpg)
( خوهر لهبان دونیا لاوریهیگ خاستره لهوهك ئازادى لهتاك بچهكیهیگ لهناو سستم كوومهڵگاى ئازاد) ، بگومان یهیش چشت تازهیگ نیه وهختى ئویشیم (وهبى ئازادى كاروان ژیار یا حزاره وسیهیگ و مللهتهیل نیهتویهنن ریگهى ژیان بگرنه وهر) ، ئیمه زانیم ك ئازادى وهبى دادپهروهرى خواردن بى تامیگه . (كهواكبى)یش ئویشیگ ( وهى ها لهورا ئازادى گوم بكهیم).
بهڵى بنهڕهت ئازادى جیاوازى هویرو ڕایهیله ، ئهگهر گشت مهردم لهبان یهك ئهقڵ بچنه ڕییهوه ، ئهوه ئازادى هویچ مهعنایگى نیهمینیگ ، وهلى چوینكه مهردم جیاوازن له سروشت پیكهاتهیان و ئهقڵیان جیاوازه ، دى ئازادییش ههر مینیگ جویر داواكارییگ لهلى مهردم . ئمجا لهیرا ئویشیم: دیموكراس ئهو ئادهمیزادهسه ك پا نیهسایگه بان ئازادیا ئهگهر هاته تویشیهوهو لهههمان وهخت بایهسه نواگیرى لهپهیابوینى نهكا . وهلى ئایا ئهیه چ دیموكراسییگه كهسهیل نهفام و نادیموكراسى بنهیگه بان تهخت وهرپرسیاریهتى و لهوهرچهو مهردم مایهى ناڕهزایهتى بووگ ؟ ئایا چ دیموكراسییگه گشت ئازادییگ دهیگه مهردم و لهبهعزیگ عهداڵهت بیبهشیان ئهكاو چ دیموكراسییگه گشت چشتیگ لهمهردم دزیگ ك وهناو ئازادییگ پڕ لهفهن وفیڵهوه دادپهروهرى (العداله) لهلیان دویرهو خهیگ و چ دیموكراسییگه نیشیگه سهنگهر تایفى و هووزایهتى و مهزهوى و نهتهوهیى و پویل و دارایى و پشت لهنیشتمان بكاو چ دیموكراسییگه ك پشت لهخود دیموكراسیهت بكا ك ریگهچارهس؟
لهیرا شیوهى دیموكراسیهت پهیوهس بووگ وهئاست هویر سیاسیهوه لهوهر خاتر هاوبهشى و دابینكردن ئهو ههقهیله ئهرا كهسهیل تر لهناو كوومهڵگا ك دیموكراتهیل دهس گرنه بانى . یهیش بیجگه ئهوهك هسكردن وه دریژهداین وهسیاسهت و ئامادهیى ئهرا بهشدارى سیاسى و پیكهاتهیلى جویر زانست و ئهخلاق و ئهو لایهنهیله ك پهیوهسن وه رهفتار سیاسیهوه ك پهیوهندى تهواویگ داشتوون وههویر دیموكراسى و مقهیهتى لهفامستنى لهگشت بهشدارییگ لهوهر خاتر بهرژهوهندى وڵات وهگشتى . یهیش وهتایبهت ئهگهر بایگ و داواكارى دیموكراسى ئامانجهگهى ئهوه نهوگ تهنیا وهپى بڕهسیده دهسڵات ، بهڵكوو داواكارى دیموكراسى بایهسه لهوهر خاتر مهشق كارهگهو فراوانكردن مهسهلهى هاووڵاتیبوین بووگ . ئمجا ئایا بخهیمنه هویر كهسهیل تر ك ئازادى وهگشت ناوهیلیهوه ههر له هویر و باوهڕ و ڕاى و كاركردنیهوه خزمهت وه كوومهڵگا رهسنیگ و مقهیهتى له نیشتمان ئهكاو ههق لهتى دیار دهیگ ؟ ئمجا ئهو ئازادى و دیموكراسیه ك گهردیمنه شوونیا ، ههر ههمان ئهو ئازادییهسه ك وهئاشكرا داوا كریهیگ لهلایهن هاووڵاتى و تاكهیلهوهو ئهگهر هات و كهفته دهسیان تویهنیم ناویان بنهیم وهمللهت ئازاو ئاشكراو ڕاسگوو ، ههر لهوهر ئهوه پهیوهندى خاسیگ ههس لهناونى ئهوئازادیه ك چهنیگهو ئهو مهشق دیموكراسیه ، ئمجا ههرچهنى ئهو ڕوى وهر یا مهساحه ئهو ئازادى و مهشقهیل دیموكراسیه زیاى بووگ ، ئهوه بیگومان جووریگ لهشهرعیهت و ڕاسگوویى خهیگه بان ئازادى ڕاى دهرخستن و گوزارش یا تهعبیر و مهشق رهسانن ئازاد لهگشت لایگهوه ، وهتایبهت ك پیشكهفتن تهكنۆلۆجى كاریگهرى خوهى دیریگ لهبان سروشت پهیوهندیهیل.
ئیمه تویهنیم بویشیم دیموكراسى وهبى دیموكراتهیل راسهقینه كهم و كوڕى دیریگ و ئهو دیموكراتهیل تازه ك هویچ چشتیگ لهدیموكراسى نیهزانن تهنیا ناوهگهى نهوگ ، ئهوانه پشت لهدیموكراسى كهن وه ڕهفتار ناپهسهنیان ، چوینكه ریڕهو دیموكراسى نیهزانن چهس.