ده‌نگ وه‌كی بيه‌يم ؟
ده‌نگداينه‌وه دياری كريه‌ن . هه‌ر له‌وه‌ر ئه‌وه‌يش بايه‌سه وه‌گشت توانايگمانه‌وه پشتگيری و هاوكاری سه‌رخستن ئی هه‌ڵوژاردنه بكه‌يم ك بڕيار يا قه‌راره وه‌ی نزيكه‌يله له‌ناوخود عراق و ١٦ وڵات هاوساو ئۆرپی و ئه‌مريكاو ئوستراليا ئه‌نجام بدريه‌يگ .
بيگومان وجوود فره ليستی و به‌رنامه‌ی جياواز و ديد و ئه‌ڕای چوين فره جوور ، بووگه مايه‌ی گه‌رمكردن پرووسه‌گه‌و جوانه‌وكردن سه‌ندووقه‌يل و زياتر متمانه‌يش ده‌يگه پرووسه‌گه . ئمجا له‌يرا گرنگ ياموهم ئه‌وه‌سه ك بايه‌سه ئه‌و كه‌سه‌يله هه‌ق ده‌نگداين ديرن هوير له‌وه بكه‌ن و بزانن ده‌نگ وه چ ليستيگ و چ كانديد يا موره‌شحيگ ده‌ن ، مه‌عنای ئه‌وه‌سه بايه‌سه بزانيم ده‌نگ وه‌كام له‌و كانديده‌يله به‌يم ك چنه ناو په‌رله‌مان ئاينده‌ی عراقه‌وه .
ئامانج له هه‌ڵواردن ، دياريكردن ئه‌و كه‌سه‌يله‌سه ك بوونه نوێنه‌ر هاووڵاتيه‌يل ده‌وڵه‌ت عراق ديموكراسی تازه ، ك وه‌دريژايی ده‌يه‌ها ساڵ دويای دروسبوينيه‌وه ، له‌ژير ده‌سڵات پاشايه‌تی و حوكم تاكه حزب دكتاتۆری جووراوجوور ناڵه‌و هاوار كردگه . مه‌عنای ئه‌وه‌سه شوون كار سه‌ره‌كی كانديده‌يل به‌غدای نائارامه له‌ڕوی وه‌زع و ئاسايش شيوياگه‌وه ، ئه‌و به‌غدای پايته‌خت عراقه ك بويه‌سه شوون ناكووكی و كيشمه‌كيش و مه‌سه‌له‌ی تايفی و جوير ئه‌وه‌ك باس كريه‌يگ و ژنه‌فيم له‌زوان وه‌رپرسه‌يل حكوومه‌ت به‌غداوه ك باڵاده‌سه‌يل له‌وزاره‌ت وه‌رگری يا دفاع و ناوخوه‌يی به‌شدارن له كاره‌يل تيرۆرسی و له‌گشتی ناخوه‌شتر ئه‌وه‌سه ك ئه‌ندام په‌رله‌مانيگ تاوانبار سه‌ره‌كی ته‌قينه‌وه‌ی خود په‌رله‌مان بويه‌و ئيسه سزای له‌سێداره‌داين ئه‌رای ده‌رچيه .
مه‌عنای ئه‌وه‌سه ئه‌و ريزداره‌يله ك خوه‌يان كانديد يا ته‌رشيح كردنه بايه‌سه بزانن شوون كاره‌گه‌ی خوه‌يان بناسن و له‌ورا چ مه‌ترسييگ ديرن . ئمجا له‌يرا مه‌به‌سمان رخه‌وبردن كانديده‌يل نيه ، وه‌لی بايه‌سه ئاماده بووگ و مه‌شق ته‌واويگ بياشتووگ وه‌رجه ئه‌وه‌ك بچووگه به‌ره يا جه‌بهه‌يل جه‌نگه‌وه ، وه‌نا ئه‌گه‌ر له‌يوا نه‌وگ ، ئه‌وه بيگومان ئه‌نجام كاره‌گه خراو له‌لی كه‌فيگه‌وه .
ئيمه گشتمان زانيم ئاماده‌بوين ئه‌ندامه‌يل و شماره‌ی ده‌نگه‌يل ئاماده‌بوی سه‌نگ مه‌حه‌ك ده‌رچگن بڕياره‌يل چاره‌نويسسازن ، ئه‌و كه‌سه‌يليشه ك گومان كه‌ن له گوزران و ژيان له‌و وه‌زع ناخوه‌ش پايته‌خته خاستر ئه‌وه‌سه خوه‌يان بكيشنه‌وه‌و ری بيه‌نه كه‌سه‌يل تر ئه‌را ئه‌وه‌ك ده‌نگه‌يل وه زای نه‌چن . وه هه‌ر حاڵ ئه‌و كانديده‌يله بايه‌سه زوان عه‌ره‌بييش وه‌ته‌واوی بزانن ، چوينكه فره‌جار له‌ڕی كه‌ناڵه‌يل ره‌سانن يا ئعلامه‌وه كه‌فيگه وه‌رچه‌ومان و دوينيم وه‌سه‌به‌ب نه‌زانين زوان عه‌ره‌بيه‌وه غه‌ڵه‌ت تاريخی له‌بان كانديده‌يل كورده‌وه په‌ڕيگه‌وه ، ئمجا له‌يرا راسه مايه‌ی خوه‌شحالی و سه‌ربه‌رزيه ك كانديد يا موره‌شح خاوه‌ن چه‌نه‌ها باوه‌ڕنامه‌و زوان بيگانه‌زان دوينيم ، وه‌لی ئه‌يه هه‌ڵوژاردن په‌رله‌مان ئۆرپا نيه ، ئه‌يه هه‌ڵوژاردن په‌رله‌مان عراق زوان عه‌ره‌بی و كلتوور خوه‌رهه‌ڵاتيه .
وه‌ل ئه‌وه‌يشا داواكاريم ده‌نگده‌ر كورد له‌ناو و له‌ده‌يشت نيشتمان ، له‌ده‌نگداين ئی جاره دريغی نه‌كه‌ن ، ئه‌ويش له‌ڕی ده‌نگداين وه كانديد خاوه‌ن به‌رنامه‌ی گونجياگ ئه‌را ئه‌و مه‌يدان تازه ، له‌هه‌مان وه‌خت مقه‌يه‌ت خوه‌يان بوون له دوباره‌كردنه‌وه‌ی غه‌ڵه‌ته‌يل گوزه‌يشت ، چوينكه گشت كه‌سيگ دوير نيه له غه‌ڵه‌ت ، وه‌لی گرنگ ياموهم ئه‌وه‌سه نه‌ف له‌غه‌ڵه‌ته‌يل گوزه‌يشته‌مان وه‌ربگريم .
