ده‌نگ له‌جیاى جه‌نگ...تفه‌نگ له‌ڕووژ ته‌نگ
گرینگى یا ئه‌همیه‌ت وه‌پى نه‌درویایگ جویر ڕووژگار ئیسه، ك ئه‌ویش وه سه‌به‌ب سه‌ركوتكردن و ژیرده‌سه‌یى و زوڵم و زوور دكتاتۆریه‌ت و داگیركردن خاك و نه‌وین پشت و په‌نا یا وه‌رگیریكه‌ر و خه‌مخوه‌ر دڵسووزیگ ك له‌وژدانه‌وه ته‌ماشاى به‌دبه‌ختى و ماڵویرانى كورد و كوردستان بكرداگ و له‌وه‌یش زیاتر شایه‌ت وه یاخى و خیانه‌تكاریش ناسریاویگ جویر ئه‌وه‌ك رژیم سه‌دام دكتاتۆر تاریفى كردیاگ و هه‌میشه وه‌خراوه‌كار(مخرب) كورد دیاگه قه‌ڵه‌م، ك هه‌رچه‌نى مه‌سڵه‌ته‌یگ كوردى خوه‌مانیش هه‌س ئویشیگ (كه‌سیگ هس وه‌ژان نه‌كردویگ ، نیه‌زانیگ ژان كه‌سه‌یل تر چوینه)، ئمجا له‌و وه‌خته‌یله ك ملله‌ت كورد ژانى ره‌سیاگه سقان، ده‌وڵه‌ته‌یل دونیا له‌خوه‌شى و سه‌رفرازى ژیان و ڕووژیگ له‌ڕووژان دڵ نه‌كردنه خه‌م ئه‌را كورد سته‌مدیده‌و هویچكام له‌میدیایه‌یلیش گرفت كورد جیواز نه‌كردن و ڕووژنامه‌و گووڤاره‌یلیش گووشه‌گیر كریاوین و له‌وه‌ر خاتر به‌رژه‌وه‌ندى زووردار و ده‌سڵاتدار كاره‌یلیان ئه‌نجام دیان و هه‌واڵ نادروس په‌خشه‌و كردیان.
كورد له‌سه‌رده‌م خه‌بات و چه‌كدارى، ناچار بوى وه لویله‌ى تفه‌نگ جواو دوشمنه‌یلى به‌یگه‌وه‌و وه‌رگیرى له‌خاك وئاو خوه‌ى بكا. وه‌لى وه‌هه‌وڵ وته‌قلاى ڕوڵه‌یلى په‌ڕیه‌وه له‌و ته‌نگى و به‌دبه‌ختى پڕ له‌ژانه‌و ڕوى كرده خوه‌شى و ئاوه‌دانى و سه‌رفرازى. ئمجا له‌وه‌ر خاتر مقه‌یه‌تیكردن له‌و ده‌سكه‌فته‌یله‌و هه‌وڵداین ئه‌را ده‌سكه‌فته‌یل تر، خاستر ئه‌وه‌سه ك كورد ده‌نگ بارنه‌كار نه‌ك جه‌نگ ، چوینكه سه‌رده‌م جه‌نگ وه‌ل خوه‌یا چى و دى چه‌وسیان و زوڵمكردن له‌كورد مه‌حاڵه.
كورد ئه‌را هه‌ر خواست و گامیگ هه‌وه‌جه وه‌یه‌كده‌نگى دیرن، ئمڕوو ئى سیاسه‌ت چه‌فتیشه ك له‌عراق په‌یڕه‌و كریه‌یگ مه‌گه‌ر ته‌نیا یه‌كده‌نگى كپ و كزى بكا، وه‌نا ئه‌گه‌ر بایگ و خودانه‌خواسته سه‌رله‌نوو زه‌فه‌ر له‌لیمان بارن، ئه‌وه بیگومان بڕیگ له‌هه‌قه‌یل ڕه‌وامان پاماڵ كریه‌یگ وخوریه‌یگ ، له‌هه‌مان وه‌خت سه‌ركردایه‌تى كوردیش بایه‌سه بزانیگ چوین مه‌ردم كورد بنه‌یگه یه‌كه‌وه‌و جیاوازى و ناكووكى نه‌یلیگ له‌ماڵ كوردو له‌هه‌مان وه‌خت ده‌سڵاتداره‌یل كوردستانیش ئه‌و راسیه بزانن ك كورد له‌هه‌ر شوونیگ بووگ هه‌ر كورده‌و هویچ فه‌رق و جیاوازییگ نیه له‌ناونى كورد، چوینكه گشت وه‌ختى هه‌وه‌جه وه‌ده‌نگ كورد كریه‌یگ ئه‌را ئه‌وه‌ك هه‌قه‌یلمان باریمنه‌وه، له‌وه‌یش گرینگتر ئه‌وه‌سه وشه‌و مسته‌ڵح (برا فڵانه‌كان) ئه‌را چینه‌یل كورد ناریه‌یگه كار، چوینكه ئى مسته‌ڵحه شوونى له‌فه‌رهه‌نگ ئه‌ده‌ب نیه‌وگه‌وه‌و كه‌سه‌یل وه‌رانوه‌ر وه‌پى زه‌خمدار كریه‌ن و بیجگه ئه‌وه‌یش ماوه‌ى ناونى و محه‌به‌تیان دویره‌و كه‌فیگ . دى له‌ئیسه‌وه با ده‌نگه‌یلمان یه‌كیگ بووگ و نه‌یلیم هه‌قه‌یلمان بچووگ، با گه‌ورایه‌یلمان دڵخوه‌شى بویچكه‌یلمان بیه‌ن و بزانن گرفتیان چه‌س؟ با هه‌ر جیاوازى یا خلافیگ هه‌س بكریه‌یگه قوربان خاك و نیشتمانه‌گه‌مان، با خوین شه‌هیده‌یل و قوربانیه‌یل كیمیاوارن و ڕووژه‌یل سیه‌ى ئه‌نفال و بى سه‌روشوونكردن ڕوڵه‌یل كورد فه‌یلى له‌هویره‌و نه‌وه‌یم، با نه‌یلیم هویچ كوردیگ له‌لیمان یاخى بووگ و بڕه‌نجیه‌یگ ، با له‌ته‌قه‌ى تفه‌نگ ڕووژگار ته‌نگ قورتارمان بووگ و له‌جیاى جه‌نگ ده‌نگ باریمنه كار.
