ده‌زگاى شه‌فه‌ق له‌لاى خوه‌نه‌واره‌یل و شنه‌ویاره‌یل
ئاده‌میزاد عراقى ، ئى ده‌زگا هه‌ر له‌سه‌ره‌تاى دامه‌زراننیه‌وه له‌ساڵ 2004 تا رووژ ئمڕوو حه‌ز كردگه له‌خه‌م و كیشه‌یل مه‌ردم نزیك بووگ وه‌تایبه‌ت كیشه‌ى كورده‌یل فه‌یلى ، ئه‌وانه‌ك ده‌نگیان نادیار بوى وه دریژایى ساڵه‌یل فره‌یگ ، ئه‌وه بوى شه‌فه‌ق هات تا له‌ڕى ئیزگه‌گه‌یه‌وه ده‌نگیان بڕه‌سنیگ وه هه‌ردوگ زوان عه‌ره‌بى و كوردى . بیجگه ئه‌وه‌یش چه‌نه‌ها گووڤار و رووژنامه‌یش خسته وه‌رده‌س خوه‌نه‌واره‌یل ، له‌وانه‌یش رووژنامه‌ى (افاق الكورد) و گووڤار (ارا‌و) و گووڤار (فه‌یلى)و (فه‌یلى بویچگ) و گووڤار (گوڵ سوو).
ده‌نگ ئێزگه‌گه‌ى له‌ڕووژ 15/ 6 / 2004 په‌خش بوى ، ك له‌و وه‌خته كادره‌یلى فره كه‌م بوى ، ك له‌په‌نجه‌یل ده‌س زیاتر نه‌وى ، ماوه‌ى په‌خشه‌گه‌یش (4) سه‌عات بوى و دى كه‌مه كه‌مه ره‌سیه (20) سه‌عات و تا له‌یوا له‌لى هات (13) سه‌عات له‌لى بویه به‌رنامه‌یل (راسه‌وخۆ – مباشر)و ریڕه‌و یا نه‌هج ده‌زگاگه‌یش لیبرالى و دیموكراتیه‌و گرینگى یا ئه‌همیه‌ت ده‌یگه لایه‌ن رووشنهویرى زیاتر له‌لایه‌ن سیاسى و له‌گشت كاریگى وژدان تیه‌ریگه كار و دژ تون وتیژیه‌و له‌هه‌مان وه‌خت وه‌رگرى یا دفاعیش له هه‌ق ئاده‌میزاد ئه‌كا . ئمجا شه‌فه‌ق تواس خوه‌ى له‌چه‌و خوه‌نه‌واره‌یل و له‌لاى شنه‌ویاره‌یلى بوینیگه‌وه‌و هه‌ر له‌وه‌ر ئه‌وه‌یش چه‌ن دیداریگ ئه‌نجامدا وه‌ل كه‌سه‌یلیگاو له‌وانه‌یش:
هاووڵاتى ئه‌بو حه‌سه‌ن ره‌ساننكار ، ك له‌باوه‌ت شه‌فه‌قه‌وه ئویشیگ (شه‌فه‌ق هه‌ر له‌وه‌ختى په‌یا بوى تا ئیسه له‌ئیزگه‌ى كه‌موینه بویه وه‌گووره‌ى په‌ویوه‌ندى له‌ناونى ئیزگه‌و شنه‌ویاره‌یلى ، وه‌ل ئه‌وه‌یش جیوازیه‌گه‌ى ها له‌وه ك وه‌هه‌ردوگ زوان كوردى و عه‌ره‌بى به‌رنامه‌یلى په‌خش ئه‌كاو زوورم به‌رنامه‌یلیشى نه‌فدار و خاسه ئه‌را شنه‌ویاره‌یلى .
شنه‌ویار (ئه‌مین ناسرى) ئویشیگ : من ئیزگه جوانه‌گه‌ى شه‌فه‌ق ژنه‌فم له‌بان ئه‌نته‌رنێت وه‌گووره‌ى ماڵپه‌ڕ شه‌فه‌ق ، ئمجا ئه‌و چشته ك هیلیگ هویر بخه‌مه لاى ، ئه‌ویش شعر مللى یا شه‌عبیه‌و زیاتر له‌وه‌یش هیلیگه‌م هس وه ئه‌و بكه‌م ك عراق ماڵ گشت كه‌سیگه هه‌ر له‌كوردستان تا باشوور . وه‌لى شنه‌ویار ( ره‌حیق) له‌باوه‌ت شه‌فه‌قه‌وه ئویشیگ : ڕووژیگ نیه شه‌فه‌ق نه‌ژنه‌فم و كه‌سیگ ئى ئیزگه نیشانم نه‌یاو هه‌ر خوه‌م ده‌سم چیه بان ته‌ره‌دوده‌گه‌ى و ده‌نگى چیه دڵمه‌وه‌و به‌شدارى له به‌رنامه‌یلى كردم و تا له‌یوا له‌لیم هات بووم ئاشق شه‌فه‌ق ، وه‌ل ئه‌وه‌یشا هه‌میشه چمه ناو ماڵپه‌ره‌گه‌ى و چه‌وم كه‌فیگه باوه‌ته‌یل جوان و جووراو جوور و گشت به‌شه‌یلى خوه‌نمه‌وه.
حسام شه‌مه‌رى ئویشیگ : ده‌زگاى شه‌فه‌ق تویه‌نست ختاب خوه‌ى بڕه‌سنیگه شماره‌ى گه‌ورایگ له هاووڵاتیه‌یل وه كورد و عه‌ره‌ب و نه‌ته‌وه‌یل تر ، یه‌یش سه‌ركه‌فتن خاسیگه ئه‌را ئى ده‌زگا وه‌گشت كادره‌یلیه‌وه ك ئسپات عراقیه‌ت خوه‌یان كردن وه‌بى جیاوازیكردن له‌ناونى ئه‌ى و ئه‌و.
دویاجاریش ئه‌ندازیار (سعه‌د هاشم قاسم) ئویشیگ : له‌یوا هس كه‌م ك هه‌میشه رادیۆى شه‌فه‌ق له منه‌وه نزیكه ، هه‌ر یه‌یش له‌یوا كرد بچمه بان ئه‌نته‌رنێت و شنه‌ویاره‌یل تازه ئه‌ڕاى په‌یا بكه‌م له ده‌یشت عراق . وه‌ل ئه‌وه‌یشا شه‌فه‌ق هه‌میشه گرینگى یا ئه‌همیه‌ت ده‌یگه كیشه‌و گرفته‌یل مه‌ردم.
