خوه‌نين كوردى له ده‌يشت هه‌رێم كوردستان له كۆڕيگ فراوان له ماڵ كورد
و وه دروشم يا شعار "گير و گرفت خوه‌نين كوردى له ده‌يشت هه‌رێم كوردستان" و له سه‌عات يانزه‌ى سه‌ر وه به‌يانى رووژ شه‌ممه 20 كانوون دويم ساڵ 2010، ڕيكخرياگ ماڵ كورد وه هاوكارى ده‌زگاى ڕووشنهويرى و ڕه‌سانن كورده‌يل فه‌يلى شه‌فه‌ق كۆڕ يا نه‌دوه‌يگ له‌ى باوه‌ته، ئه‌را مامۆستا حسێن جاف به‌ڕێوه‌به‌ر گشتى خوه‌نين كوردى و نه‌ته‌وه‌يل تره‌ك له وه‌زاره‌ت په‌روه‌رده‌ى عيراق فيدراڵ، ساز دا.
كۆڕه‌گه وه يه‌ك ده‌قه وسيان ئه‌را خوه‌نين سووره‌ت فاتحه ئه‌را گيان پاك شه‌هيده‌يل كوردستان وعيراق ده‌س وه‌پى كرد و ئينجا مامۆستا حسێن جاف ڕووشنايى خسته بان بارووه‌زع خوه‌نين وه زوان كوردى و ئيشاره‌ت ئه‌را ئه‌وه كرد ك زياتر له 655 مه‌درسه‌ى كوردى له ده‌يشت هه‌رێم كوردستان هه‌س ، بيجگ له 328 مه‌دره‌سه‌ى توركمانى و 102 مه‌دره‌سه‌ى سريانى.
مامۆستا جاف باس ئه‌وه‌يشه كرد ك ئى فه‌رمانگه له سه‌ره‌تا ته‌نيا 5 فه‌رمانبه‌ر له‌تى بوى و ئيمڕوو زياتر له 50 فه‌رمانبه‌ر گريده خوه‌يه‌و ، و وه هه‌وڵ و كووشش كارمه‌نده‌يلى تويه‌نستگه پيشكه‌فتن گه‌ورايگ بخه‌يگه ناو كار و فه‌رمان ئى به‌ڕێوه‌به‌رايه‌تيه ، ئه‌ويش وه دامه‌زرانن سه‌دان مامۆستا ئه‌را ده‌رس داين زووان كوردى و ئاڵشت كردن ئه‌و كتاوه ك له سه‌رده‌م رژيم وه‌رين ئه‌را خوه‌نين كوردى له سه‌ف چوار ئاماده‌يى دانريا و پڕ بوى له باوه‌ته‌يليگ وه سه‌ر پارت به‌عس و سه‌رۆك وه‌رين رژيم ديكتاتۆرى سه‌دام حوسه‌ين و ره‌سم ناشرينى له‌تى لاوريا و ره‌سم و باوه‌ته‌يل كوردييگ له تى داوه‌زيا وه باوه‌تيگ له بان مه‌لك محمود حه‌فيد مه‌لك كوردستان و ره‌سم و باوه‌تيگ له بان باوگ گيانى ملله‌ت كورد بارزانى نه‌مر و چه‌ن باوه‌ت و ڕه‌سمه‌يليگ ناوچه‌يل دڵگير كوردستان، ئه‌وه بيجگه واز كردن شماره‌ى فره‌يگ مه‌دره‌سه ك له سه‌ف چوار سه‌ره‌تاييه‌وه ده‌رس كوردى خوه‌نن.
له به‌شيگ تر له قسه‌گانى حسێن جاف وت: خوه‌نين كوردى له سه‌رده‌م ڕژيم وه‌رين له چوارچيوه‌ى ته‌كتيكيگ سياسى بوى ئه‌را خه‌ڵه‌تانن مه‌ردم ، وه‌لى له‌ى سه‌رده‌م حازريه خوه‌نين كوردى ئامانجيگ ستراتيژيه و حه‌ز كه‌يمن بكه‌يمنه‌ى پيه‌ڵيگ ئه‌را يه‌كتر ناسين و بيليمن ئه‌واكان تر هس وه وجوود كورد بكه‌ن وه‌ك به‌شيگ سه‌ره‌كى له ملله‌ت عيراق و ناساندن رووشنهويرى و زووان و كلتوور كوردى ئه‌را ئه‌و باقى پيكهاته‌گان ملله‌ت عيراق .
ناوبرياگ زياتر وت : له ماوه‌ى كاركردنمان تويه‌نستيمن كاره‌يل فره‌يگ ئه‌نجام بيه‌يمن له‌وانه‌يش دريژه‌داين وه خوه‌نين زووان كوردى تا سه‌ف په‌نج ئاماده‌يى يا ئعدادى و هايمنه ته‌ما بڕه‌سنيمنه‌ى ئه‌را پۆل يا سه‌ف شه‌ش ئاماده‌يى وه‌ل ساڵ 2011 دوياى ئه‌وه ك ته‌نيا له پۆل چوار ئاماده‌يى ده‌رس دريا. هه‌ر له‌يوا تويه‌نستيمن ناو چه‌ن كه‌سايه‌تى ناودار كورد بنه‌يمنه قه‌ى چه‌ن مه‌دره‌سه‌يگ له به‌غدا و پارێزگاگان عيراق جوور مه‌دره‌سه‌ى له‌يلا قاسم له مه‌دره‌سه‌ى ابن الجوزى له ناوچه‌ی نه‌هزه و مه‌دره‌سه‌ى دارى سارى له ناوچه‌ى قوشه‌ل و ناو محمد به‌درى له يه‌كى له مه‌دره‌سه‌گان شار به‌دره .
يه‌كيگ له‌و كاره‌يله ك حسێن جاف وه شانازى گه‌ورايگه‌و باسى كرد داناين فه‌رهه‌نگيگه وه سێ زووان كوردى و عه‌ره‌بى و ئنگليزى و كورديه‌گه‌يشى وه سێ زاراوه يا له‌هجه‌ى سۆرانى و بادينانى و كه‌ڵهوڕى يا كوردى جه‌نووب نويسرياگه، له هه‌مان وه‌خت باس له ده‌ركردن گۆڤار يا مجله‌يگ ئه‌را مناڵه‌يل وه ناو پاسارى كرد.
دوياى ته‌مام بوين قسه‌گان كۆڕگيڕه‌گه، رز هاته سه‌ر ئاماده‌بويه‌يل ئه‌را به‌شدارى كردن له له‌يه‌كه‌وداين ته‌وه‌ره‌گان كۆڕه‌گه و له سه‌ره‌تا دكتۆر جمال العتابى به‌ڕێوه‌به‌ر گشتى ده‌زگاى رووشنهويرى و بلاَوكردنه‌وه‌ى كوردى قسه‌كرد و پيشنيار كرده ماڵ كورد و ده‌زگاى شه‌فه‌ق ك رووژيگ ديارى بكه‌ن ئه‌را رووشنهويرى كوردى له ده‌يشت هه‌رێم كوردستان... ئينجا صادق العبوسى پيشنيار ئه‌وه كرد ك ئه‌را پڕه‌وكردن كه‌مى كادره‌يل ده‌رسداين وه زووان كوردى په‌نا بووه‌نه مامۆستايه‌يل خانه‌نشين و باسيش له‌وه‌كرد ك ئامانج خوه‌نين كوردى بايه‌سه په‌يام دووسى بوود.
له شوون ئه‌وانيش هه‌ريه‌ك له رياز جاسم فه‌يلى و له‌يلا هاشم و عه‌دنان ره‌زا و ميديا ئسماعيل و فائزه عبدالكريم سالم و فه‌ره‌يدوون كه‌ريم و عادل مه‌نده‌لاوى و احمد محمد عه‌لى چه‌ن قسه‌و پيشنياريگ پيشكه‌ش كردن و باس له چه‌ن گير وگرفتيگ كردن ك بوينه‌سه ته‌گه‌ره له نواى پيشكه‌فتن خوه‌نين كوردى له ده‌يشت هه‌رێم كوردستان و ريگه‌چاره‌يش ئه‌رايان پيشنياركردن.
 |
 |
 |
 |
 |
 |
 |
 |
 |
|
 |
 |
 |
|
 |
 |
 |
|
 |
 |
