خوه‌زگ(كاك مه‌سعود) كیشه‌ى كورده‌یل(فه‌یلى)یش چاره‌سه‌ر بكرداید
خاتر ئه‌وه‌ك دوشمنمان زه‌فه‌ر له‌لیمان ناریگ و ته‌رفوتوینه نه‌ویمن و هه‌قمان نه‌خوریه‌یگ .
له‌وه‌خت شووڕشه‌یل گه‌وراى بارزانى نه‌مر، گشت چینه‌یل كورد وه‌ڕاسى و دڵسووزیه‌وه هه‌وڵ سه‌ركه‌فتن هیز ئازادیخواز دانه‌و له‌وانه‌یش كورده‌یل فه‌یلى، ك ده‌ور فره‌یگ داشتن له‌ڕه‌سانن په‌یام كوردایه‌تى خوه‌یان وه‌حاڵ وماڵه‌وه. هه‌ر له‌وه‌ر ئه‌وه‌یش ئویشیم: سه‌نگه‌ره‌یل پێشمه‌رگه شایه‌تیده‌ر ڕووژه‌یل خه‌بات و قوربانیداین كورده‌یل فه‌یلین، جه‌وه‌ڵه‌یل(به‌مۆ - شمیران - زمناكۆ - شواڵدڕه - قه‌ره‌خانى - مه‌له‌خورد - كانى خیاران – گاڕى و.......هتد)هیمان خوین شه‌هیده‌یل فه‌یلى له‌قه‌یانه‌وه هشكه‌و نه‌ویه، دار گه‌ز و به‌ڕویه‌یل قه‌ى پاڵه‌گان هیمان نانه‌ڕه‌قه‌و ده‌فرو دووڵه‌ى كورده‌یل فه‌یلى له‌سیوه‌ریان مه‌ندگه‌و، تائیسه‌یش هیمان له‌ى به‌ر و له‌وبه‌ر ئاوه تافه‌گه‌ى (سیروان و قویره‌توى و دێسووتگ ) شوون پاى كوڕه‌یل بڕه‌نه‌و له‌شان كورده‌یل فه‌یلى لافاو نه‌گرده‌سه‌ى و، هیمان كوڵه‌باڵه‌گه‌ى شه‌هید حه‌ربى و ئه‌سه‌د له‌لاڕیه‌گه‌ى چۆمان مه‌نده‌سه‌جى و، هیمان ته‌رم(عه‌لیه‌كبه‌ر هدایه‌ت)جوانه‌مه‌رگ ناته‌سه‌وه‌و تكه‌ى ئه‌سر دایگه جه‌رگ سزیایه‌گه‌ى نه‌وسیاسه‌وه‌و، هیمان خوین پاك و قرمز قه‌ى (په‌ت سێداره)گه‌ى (له‌یلا قاسم و ملازم جوامیر)و هاوڕه‌یه‌یلیان لانه‌چیه‌و، هیمان داڵگ ڕووڵه‌یل بى سه‌روشوونكریاگ جنگ سیه له‌وه‌ر نه‌كه‌ندنه‌و چاینه وه‌ڕوڵه‌یلیانه ئویشن و خوه‌یشكه‌یل وه‌دیده‌ى ئه‌سرینه‌وه له‌ده‌ریاى خه‌م ژیه‌ن، هیمان قه‌ور جوانه‌مه‌رگه‌یل فره‌یگ له‌ى چین ئوخه‌ى نه‌كردگه گومه‌و دیداریان كه‌فته قیامه‌ت.
خوه‌زگ كاك مه‌سعود، جویر ئه‌وه‌ك لایه‌نه‌یل ناكووك عه‌ره‌ب نایده یه‌كه‌وه‌و كیشه‌و گرفته‌یلیان ره‌سانیده ئه‌نجام، وه‌و جووریشه كیشه‌ى كورده‌یل (فه‌یلى)یش چاره‌سه‌ر بكرداید، ك هه‌رچه‌نى له‌ى باوه‌ته‌وه هه‌وڵ و ته‌قلایگ فره‌یگ دایده‌و دریغى نه‌كردیده، وه‌لى خوه‌زگ ئى مه‌سه‌له‌یشه هه‌ر له‌بان ده‌س خوه‌د یه‌كلاوه بكریه‌یگ و نه‌یلید غه‌در له‌كورده‌یل فه‌یلى بكریه‌یگ ، چوینكه بارزانى نه‌مر وه‌ڕاسى خه‌مخوه‌ر ئى چین زوڵملیكریاگه بویه‌و تا له‌دونیا بوى هویچ فه‌رق و جیاوازییگ نه‌كرد له‌ناونى ڕوڵه‌یلى، ئیسه‌یش جه‌نابدان جینشین ئه‌و پیاو كوردپه‌روه‌ر و دڵسووزه‌ینه‌و هه‌ر هه‌مان هویر و هه‌مان ریِڕه‌و گرتنیه‌سه‌وه‌ر و ئاسانه ئه‌رادان گشت كریه‌كووره‌یگ واز بكه‌ین.
