(خانه‌قی) شايسته‌ی ئه‌وه‌سه بكريه‌يگه شوونيگ گه‌شتوگوزاری
ودارسانه‌يل فره‌يگ له‌تی بوينه‌سه شاڵ سه‌وز و ئاو ئه‌ڵوه‌ن و كنار چه‌مه‌يل مه‌يلكيشی تام ئاوه‌دانی و گه‌شت وگوزار به‌خشن ، خانه‌قی وه‌دويری (١٨٠كم) كه‌فيگه باكوور شار به‌غدای پايته‌خت و شماره‌ی مه‌ردمه‌گه‌ی ره‌سيگه نزيكه‌ی (١٠٠٠٠٠) ك زوورميان كوردن و ته‌نيا شماره‌ی كه‌ميگ نه‌وگ له توركمان و عه‌ره‌ب ، ك ئه‌وانيش ژيان هاوبه‌ش و خوه‌شيشگ ديرن وه‌ل كورده‌يل شاره‌گه‌يا هه‌ر له‌زويه‌وه .
شار خانه‌قی جوير ئه‌وه‌ك ئاشكراس له‌وه‌خت ده‌سڵات رژيم رمياگ به‌عس گشت جووره زوڵم زووريگ وه‌خوه‌يه‌وه ديه ، هه‌ر له كوشتن و بڕين و ده‌روه‌ده‌ركردن مه‌ردمه‌گه‌ی تا ره‌سيگه قه‌ور وه‌جه‌م له‌كووتاييه‌يل عومر ده‌سڵاته‌گه ك ده‌سكردنه ره‌شبگير و جايه‌ڵ جوانه‌يل فره‌يگ بوينه قوربانی و هه‌ر له‌هه‌مان شار خريانه قه‌ور وه‌جه‌م و دويای رميان به‌عس و ئازادی ناوچه‌يل كوردستان ته‌رم زنگ وه‌چاڵه‌يل دوينرياوه . ساڵه‌يل دويرو دريژيگ خاك پڕ پيت وبه‌ركه‌ت خانه‌قی وه‌ده‌س عه‌ره‌به‌يل هاورده‌وه بوی ك سه‌دام له‌شوونه‌يل جياجيای ناوڕاس و باشوور عراقه‌وه هاورده‌يان و له‌و وه‌خته هه‌ر خيزانيگ ١٠ هه‌زار دينار سويسری پيشكه‌ش وه‌پيان كردياگ و خاسترين زه‌وی كشتوكاڵی زه‌فتكرياگ مه‌ردم زوڵمليكرياگ دياگه پيان و ماڵ له‌خاوه‌ن ماڵ حه‌رام كرد و ئاواره‌ی په‌ڕ شاره‌يليان كرد . وه‌لی خوه‌شبه‌ختانه سياسه‌ت چه‌فت به‌عس دكتاتۆری كووتايی وه‌پی هات و خانه‌قی دوباره باوه‌ش وازكرد ئه‌را روڵه‌يلی و سه‌رله‌نوو باخ ئوميدی هاته به‌ر و خوه‌شيه‌گه‌ی جارانی هاته‌وه‌و چه‌وه‌ڕيه بخريه‌يگه بان هه‌رێم كوردستان .
خانه‌قی له‌ڕوی ئابووريه‌وه يه‌كيگه له‌شوونه‌يل گرينگ ياموهم ئابووری عراق ك چاڵه‌يل نه‌فتی فره‌يگ گريگه خوه‌ی و نه‌فته‌گه‌يشی خاسترين جووره نه‌فته له‌عراق وه‌گووره‌ی قسه‌ی شاره‌زايه‌يل مه‌يدان نه‌فتی ، ئه‌يه بيجگه له‌سه‌رچه‌وه‌يل تر و يه‌كه‌مين نه‌فتپاڵو يا مه‌سفايش وه‌ناو (مه‌سفای وه‌ند) له‌ساڵه‌يل بيس سه‌ده‌ی وه‌رين له‌نه‌فتخانه له‌سه‌ره‌تای دروسبوين ده‌وڵه‌ت عراقه‌وه له‌تی دامه‌زريا . وه‌لی ئيمه له‌يرا مه‌به‌س باوه‌ته‌گه‌مان ئه‌وه‌سه خانه‌قی له‌ڕوی گه‌شتياريه‌وه شوون گونجياگ و دڵگيريگه‌و بووگ بكريه‌يگه شوونيگ هه‌ميشه‌يی گه‌شتياری و ئه‌هميه‌ت وه‌پی بدريه‌يگ ، چوينكه خانه‌قی هه‌ر له‌خوداوه ديمه‌ن و جوانی وه‌پی به‌خشياگه‌و (كڵات و بانميل دڵڕفن وده‌وروه‌ر باوه‌مه‌حموی) شايه‌تی ئی جوانيه‌نه‌و ئه‌گه‌ر بايگ و ده‌س خزمه‌تگوزاری وه‌پی بڕه‌سيگ و حكوومه‌ت هه‌رێم بتوايگ ئی كاره ئه‌نجام به‌يگ ، ئه‌وه خانه‌قی بووگه خوه‌شترين ناوچه‌ی گه‌رمه‌سير و مه‌ردمان فره‌يگ له‌گشت پاريزگايه‌يل عراقه‌وه روی له‌لی كه‌ن جوير ئه‌وه‌ك له‌وه‌هار و ڕووژه‌يل عه‌يد نه‌ورووز دوينيم ك فره‌ترين مه‌ردم له‌كورد و عه‌ره‌ب ئه‌را گه‌شت و خوه‌شی روی له‌لی كه‌ن و قه‌ره‌باڵغی فره‌يگيش له‌تی دروس بووگ . هه‌ر له‌وه‌ر ئه‌وه‌يش شايسته‌ی ئه‌وه‌سه وزاره‌ت گه‌شتياری هه‌رێم كوردستان لايگ له‌ی مه‌سه‌له بكه‌يگه‌وه‌و بكه‌فيگه ريكه‌وخستن شوونه گه‌شتوگوزاريه‌گه‌ی بانميل و گشت هه‌وه‌جه‌و خزمه‌تگوزراييگ ئه‌ڕای باريگه كار و نه‌ف له‌و خاك سه‌وز و هه‌ميشه وه‌هار بانميله وه‌ربگريگ و كڵات زياتر بڕازنيگه‌وه‌و جاده‌و ڕی وبانه‌يل شاره‌گه فراوان و خاستره‌و بكريه‌يگ و ميوانخانه‌ی جوان ومۆدێرن له‌تی دروس بكريه‌يگ ، يه‌يش خوه‌ی له‌خوه‌ی خزمه‌تيگه ئه‌را مه‌ردم شاره‌گه‌و بيكاره‌يل فره‌يگيش نه‌ف له‌لی وه‌رگرن و داهات خاسيگيش له‌لی ده‌سه‌وه‌ر بووگ له‌ڕوی ئابووريه‌وه‌و هه‌مان وه‌خت شماره‌ی گه‌شتياره‌يليش زياتره‌و بووگ . دی ئوميده‌واريم خانه‌قی له ناوچه‌ی گه‌رمه‌سيريش بووگه شوونيگ گه‌شتوگوزاری له‌ئاينده‌ی نزيكيگ و وزاره‌ت گه‌شت وگوزار هه‌رێم ، خانه‌قی وه‌گرينگ ياموهم بزانيگ و هوير جددييگ له‌ی باوه‌ته‌وه بكريه‌يگ .
