خانه‌قى وه ته‌ماى سه‌ده‌قه‌ى كه‌س نییه!!
ئاشكراكرد، ك ئه‌نجوومه‌ن پارێزگاى دیاله بودجه‌ى شار خانه‌قى ئه‌را شه‌ش ملیار دینار زیاى كردیه، له‌و لایشه‌و حكوومه‌ت هه‌رێم كوردستان بڕیار یا قه‌رار دا هه‌فت ملیار دینار له بودجه‌ى هه‌رێم ئه‌را ئى شاره ته‌رخان بكه‌ید.
له دریژه‌ى قسه‌گانى، سه‌میر محمد سه‌رۆك شاره‌وانى خانه‌قى ئه‌وه ئاشكراكرد ك دویاى ئه‌وه‌گ ئه‌نجوومه‌نه‌گه وه كوو ده‌نگ بودجه‌گه‌ى ساڵ 2010 ى خانه‌قى له وه‌ر كه‌میى ڕه‌ته‌و كرد، ئه‌نجوومه‌نه‌گه‌ى دیاله له دو ملیار و 750 ملیۆن دینار، كرده‌ى شه‌ش ملیار دینار.
شایه‌ت ڕیزدار سه‌میر محمد شانازى وه‌وه بكه‌ید ك ئه‌نجوومه‌نه‌گه‌ى تویه‌نستیه ئى بڕ پویله وه سه‌ده‌قه‌ى سه‌ر هه‌ریه‌ك له ئه‌نجوومه‌ن دیاله و حكوومه‌ت هه‌رێم ئه‌را شار خانه‌قى وه گشت یه‌كه ئیدارییه‌گانیه‌و گرده‌و بكه‌ید ك هه‌ریه‌ك له قه‌زاى ناو شار خانه‌قى و ناحیه‌یل جه‌له‌ولا(قه‌ره‌غان) و سه‌عدییه (قزره‌بات) و مه‌یدان و مه‌نه‌لى و قووره‌توى گریده‌وه؛ وه‌لى ئیمه بایه‌سه ئه‌وه بخه‌یمنه هویر هه‌رچى لایه‌ن په‌یوه‌ندیداره ك خانه‌قى، ئه‌گه‌ر باید وه‌چه‌و ئنسافه‌و بنووڕیده گوزه‌یشته‌ى پڕ سه‌روه‌ریى و ئه‌و داهات گه‌ورا ك ئى شاره وه دریژایى ساڵه‌هاى ساڵ پیشكه‌شى وه عیراق وه گشتى و كوردستان وه تایبه‌تى كردیه، هه‌ر له داهات نه‌فتى و به‌رهه‌مه‌یل كشتوكاڵى و داهاته‌یل به‌شه‌رى و مه‌ردم ڕووشنهویر و كارزان و خاوه‌ن به‌هره‌یلى له گشت مه‌یدانه‌یل ژیان له كه‌سایه‌تیه‌یل سیاسى و كوومه‌ڵایه‌تى و زانستى و هونه‌رى و ئه‌و پێشمه‌رگه‌و شووڕشگێره‌یله ك له ته‌مام چالاكیه‌یل سیاسى و مه‌یدانه‌یل تر پیشكه‌شیان كرد و وه سه‌دان شه‌هید خوین خوه‌یان كردنه قوربانى ئه‌را ڕه‌سین وه ئازادى و ئینجا ئه‌و هه‌مكه زوڵم و زوور و كوشتن و بڕین و كووچوه‌پیكردن وه‌زوور مه‌ردمه‌گه‌ى و هه‌رله ساڵه‌یل هه‌فتاى سه‌ده‌ى وه‌رینه‌و ك سه‌دان ئاوایى چووڵكریا و مه‌ردمه‌گه‌ى وه‌ره‌و بیاوانه‌یل ناوڕاس و باشوور عیراق باركریان و ئه‌و زه‌ویه‌یل نه‌ختینه‌یه وه‌ل ئه‌و باخه‌یل پڕ سه‌مه‌ریه ك به‌رهه‌میان ڕه‌سیاده شار به‌غدایش وشك كریان و سزیان و ته‌نیا نه‌فتپاڵوو یا مه‌سفاى نه‌فتى ك یه‌كم مه‌سفا بوى له عیراق ڕمانن و وه خورده فرووشتنه‌ى و سه‌دان كارمه‌ندى له بژیوو ژیانیان بیبه‌ش كردن و ئینجا ئه‌و گه‌مارۆ یا حساره ك چه‌سپاننه‌ى بان مه‌ردمه‌گه‌ى وه شیوه‌یگ ك نه‌ك هه‌ر نه‌یشتن كه‌سیگ خشتیگ بنه‌یده بان خشتیگتر له شاره‌گه وه‌لى ته‌نانه‌ت نه‌یشتن كه‌سیگ كه‌لوكووم ماڵه‌گه‌ى خاس بكه‌ید یا دیواریگى سبووغ بكه‌ید و وه هه‌زار و یه‌ك مه‌هانه مه‌ردمه‌گه‌ى، خیزان له دویاى خیزان، شاروه‌ده‌ر كریان و له زێد و ماواى خوه‌یان بیبه‌ش كریان، تا ڕه‌سیه ئه‌و ڕووژه ك خوه‌ر ئازادى له عیراق وه گشتى هه‌ڵات و مه‌ردمیش نه‌فه‌سیگ پاك هه‌ڵمژین، وه‌لى له جیاتى ئه‌وه ك ئى شاره وه شاریگ له‌لى قومیاى یا (مه‌نكووب) بشماریه‌ید و هه‌ڵمه‌تیگ گه‌ورا ئه‌را ئاوه‌دانكردن و زینیه‌وكردنى ئه‌نجام بدریه‌ید؛ وه تایبه‌تى له لایه‌ن حكوومه‌ت عیراق ك خوه‌ى وه‌خاوه‌ن گشت ملله‌ت عیراق زانێد ؛ خانه‌قى كه‌فته ژیر باریگ سه‌ختتر ك ئه‌ویش كیشمه‌كیش سیاسییه له ناونى حكوومه‌ت هه‌رێم كوردستان ك هه‌وڵ ده‌ید ئى شاره بارێده‌وه ئه‌را باوش هه‌رێم داڵگى ك كوردستانه و حكوومه‌ت به‌غدا ك وه به‌شیگ له پارێزگاى دیاله شماریده‌ى و ململانى وه‌ل حكوومه‌ت هه‌رێما كه‌ید و ڕیگر و ته‌گه‌ره خه‌یده نوواى هاتنه‌وه‌ى ئه‌را باوه‌ش داڵگى و دویاى هه‌فت ساڵ ئازادى و دیموكراسى هیمان وه هه‌مان دید شۆفینى ته‌ماشاى مه‌ردم و خاك ئى شاره كه‌ید و وه هه‌زار حاڵ و وه هه‌زار باره‌ى و بووه‌ره‌ى تا به‌ش كه‌میگ له بودجه‌گه‌ى ئه‌راى كل كه‌ید، له جیاتى ئه‌وه ك قه‌ره‌بوو ساڵه‌یل وشكه ساڵى سیاسى و زوڵم زوور و ناهمێرى مه‌ردمه‌گه‌ى بكه‌ید، ئیسه هاتیه دویاى ئى هه‌فت ساڵه، نیه‌زام وه‌سه‌ده‌قه‌ى سه‌ر كى بوودجه‌گه‌ى له دو ملیار و 750 ملیۆن كه‌یده شه‌ش ملیار دینار، وه‌گووره‌ى قسه‌گان ڕیزدار سه‌رۆك ئه‌نجوومه‌ن شاره‌گه، له‌و لایشه‌وه حكوومه‌ت هه‌رێم له به‌ش مناڵه‌یل یه‌تیم هه‌ڵه‌بجه‌ى شه‌هید و دووڵ جافایه‌تى كاولكریاى و 4500 ئاوایى ڕمیاى و شاره‌یل ناهمیكریاى كوردستان، هه‌فت ملیار دینار بڕید و وه سه‌ده‌قه‌ى سه‌ر ده‌یده‌ى شار خانه‌قى.. ئیمه ئویشیم له جیاتى ئه‌وه‌گ خانه‌قى وه‌ى جووره هه‌میشه چه‌وى وه ده‌س یه‌ى و ئه‌و بوود؛ بایه‌سه هه‌وڵ جددى بدریه‌ید له لایه‌ن گشت لایه‌نه‌گان و دویر له مزایه‌ده‌ى سیاسى و مننه‌تكردن وه‌سه‌ر مه‌ردم وه‌شه‌ره‌ف شار خانه‌قى و داواكارییه‌گان مه‌ردم خانه‌قى جیوه‌جى بكه‌ن و وه‌رج له گشت چشتى نه‌فتپاڵوو یا مه‌سفاى وه‌ند زینیه‌و بكه‌ن و پشتگیرى له مه‌ردمه‌گه‌ى بكه‌ن تا له شاره‌یل ده‌روه‌ده‌رى و غه‌ریبى بانه‌و تا ئاوه‌دان شاره‌گه‌یان بكه‌ن وه تایبه‌تى جفتیاره‌یل ئه‌و ئاواییه‌له ك زوورمییان هیمان ئاواره‌ن و ئه‌وانه‌یش هاتنه‌سه‌و له‌وه‌ر كه‌م ئاوى و كه‌مدرامه‌تى وه ئه‌مر لایه‌نه‌یل حكوومه‌تى په‌یوه‌ندیدار كار كشت و كاڵ نیه‌كه‌ن و جایڵ جوانه‌یلیان یا له په‌ڕ شاره‌یل سه‌رگه‌ردان مینه‌كردن ڕووژانه‌كاریین یا له ساى دیواره‌یل وه ناهمێرى دانیشتنه... به‌ڵى وه‌ختى ئى داواكارییه‌یله ك هه‌ق ڕه‌واى خوه‌مانه جیوه‌جیكریان، دى هه‌وه‌جه‌مان وه سه‌ده‌قه‌ى سه‌ر كه‌س نییه و بگره ئیمه خوه‌مان له خه‌یر وبه‌یر شاره‌گه‌مان و ئاواییه‌گانمان ده‌س یارمه‌تى ئه‌را فه‌قیر وداماوه‌یل دریژه‌و كه‌یمن!!
