حكومه‌ت كوردستان وه‌بى حزبه‌يل ئايينى!
كفاح مه‌حمود كه‌ريم/ حزبه‌يل ئسلامى سياسى تويش واين گه‌ورايگ هات له هه‌ڵوژاردنه‌يل 2018 ك ئه‌نجام ديا له هه‌رێم كوردستان، ك وه‌شوه‌يگ سه‌ير له خوله‌يل وه‌رين جه‌ماوه‌رييان شيوياو له‌يوا وه‌پى هات خوه‌ى له به‌شدارێ له حكومه‌ت تازه بيبه‌ش بكا، ك هه‌رچه‌نى حزب گه‌ورا ك پارت ديموكرات كوردستانه هه‌وڵه‌يل فريه‌يگ دا ك سه‌ركردايه‌تى پرووسه‌ى راپرسى كرد له 25 ئه‌يلول 2017 و له‌ئه‌نجاميشى زوورم ده‌نگه‌يل له په‌رله‌مان كوردستان وه‌ده‌س هاورد، ك هه‌وڵ دا قه‌ناعه‌ت وه‌پى بارێد ئه‌را به‌شداريكردن ك هه‌رچه‌نى كورسيه‌يليشى له په‌رله‌مان كه‌م بوێ، وه‌لێ ئه‌وه هه‌ڵوژان له ده‌يشت دامه‌زرانن حكومه‌ت بدێ، به‌ڵكوو هه‌مواركردنه‌وه‌ى ياساى سه‌رۆكايه‌تى هه‌رێم ره‌ته‌و كرد و ده‌نگ وه كانديد زوورمينه نه‌يا له سه‌رۆكايه‌تى هه‌رێم و نه‌يش ئه‌را سه‌رۆك وه‌زيره‌يل له هه‌وڵيگ ئه‌را دروسكردن كائنيگ تر وه‌ناو ئۆپۆزسيۆن، وه‌تايبه‌ت ك تويش ئه‌زموونيگ تيه‌ڵ هات له به‌شداريكردنى له كابينه‌يل وه‌رين و دعايه‌ى ئه‌وه كرد ك دژايه‌تى گه‌نده‌ڵى ئه‌كاو تومه‌تبار حكومه‌ت كرد وه ئه‌وه‌گ به‌شيگه له‌لى و ئه‌ويش به‌شيگه له‌لێ!
ئى ره‌فتاره ناوه‌جيه ئه‌را دروسكردن ئۆپۆزسيۆن له‌ناونى به‌شدارى له حكومه‌ت و ناڕه‌زايه‌تيى له په‌رله‌مان بزووتنه‌وه‌ى گۆڕان هاورده‌ى كار له خول يه‌كه‌مى دوياى جيابوينه‌وه‌ى له يه‌كێتى نيشتمانى كوردستان و هويچ به‌ريگ له‌لى نه‌چنيه‌و، به‌ڵكوو فريه‌يگيش له ده‌نگه‌يلى له‌ده‌سدا له دويا هه‌ڵوژاردنه‌يل, ئمجا دياره حزبه‌يل ئايينى هه‌وڵ كۆپيكردن ئه‌و كاره‌يل ته‌هجينه دان له هه‌ردوگ خول وه‌رين، ك ئيسه‌يش دوباره هه‌وڵ رازيكردن جاده‌ێ ئه‌ياد وه ئه‌وه‌گ ئه‌كه‌فێده ده‌يشت ده‌سڵات جيوه‌جيكار تا ئۆپۆزسيۆنى وه‌كار بارێد، ك هه‌رچه‌نى ئه‌نجامه‌يل دوياجارى بى ئوميدى بوێ له دانيشتن له‌بان كورسيه‌يل په‌رله‌مانى ك گوايا هه‌ژموون زياتر وه‌پى ئه‌وه‌خشێد، وه‌لێ وه‌چه‌واشه‌وه ئاماژه‌يگ وه‌پيدا جه‌خت له‌وه كرد ك جه‌ماوريه‌گه‌ى جارانى له خوله‌يل وه‌رين له هه‌ڵوژاردنه‌يل وه‌بوونه‌ى ناكووكيه‌يل هه‌ردوگ حزبه‌يل سه‌ره‌كى پارتى و يه‌كێتى بويه‌و دعايه‌يل ئه‌وه ئه‌كرد ك دژ ديارده‌ى گه‌نده‌ڵيه،ك يه‌يش له‌يوا وه‌پى كرد په‌نام ده‌ربكا وه‌بوونه‌ى ناڕه‌حه‌تيه‌يليگ له چاره‌سه‌ر و ئى په‌ناميشه له‌ى هه‌ڵوژاردنه‌يل دوياخره وه ته‌واوى ده‌ركه‌فت و قه‌واره راسكانيه‌گه‌ى ئاشكرا بوێ نه‌ك هه‌ر ته‌نيا له جاده‌ى هه‌ڵوژاردن، به‌ڵكوو له‌لاى جه‌ماوه‌ر فريه‌يگ له‌وانه‌گ ئه‌زانن ك دين په‌يوه‌ندى وه سياسه‌ته‌و نه‌يرێد و دين په‌يوه‌ندييگ روحى چه‌سپياگه له‌ناونى تاك و باوه‌ڕه‌يلێ ك نه‌بايه‌د وازى وه‌پى بكريه‌ێد و بخريه‌ێده ناو جه‌هان ئاڵشت وئولشت سياسه‌ته‌و.
ئمجا وه‌گوورى ئه‌و ئه‌نجامه‌يله ئى حزبه‌يله حوه‌يان له به‌شداريكردن له حكومه‌ت بيبه‌ش كردن وه ئه‌وه‌گ ئه‌تويه‌نن باقى لايه‌نگره‌يليان رازى بكه‌ن و لايه‌نگره‌يل تازه‌يگ له ئاينده گرده‌و بكه‌ن، وه ئه‌وه‌يش ئه‌را يه‌كه‌مجاره له‌وه‌ختيگ هه‌رێم سه‌روه‌خوه‌يى و حكومه‌ت يه‌كه‌مى له 1992 دامه‌زران كابينه حكومه‌ت كوردستان به‌تاڵه له حزبه‌يل ئسلام سياسى، يه‌يش ره‌نگدانه‌وه‌يگ ئه‌وه‌لى ئه‌ياد ئه‌را فراوانكردن روێوه‌ر رووشنهويرى مه‌ده‌نى و وه‌كاربردن سيستم علمانى و حورمه‌تى له ئايينه‌يل، وه‌لێ دويره‌و ئه‌خا له كه‌ش سياسه‌ت و ئداره‌ى ده‌وڵه‌ت، جوور پيشه‌كيه‌يل گرنگ ئه‌را داناين ده‌ستوور هه‌ميشه‌يى هه‌رێم ك هه‌ردوگ ده‌سڵات ته‌شريعى و جيوه‌جيكار كار له‌بان جيوه‌جيكردنى ئه‌كه‌ن له‌ماوه‌ى خول ئيسه‌ى.
