جه‌نگ هه‌ڵوژاردن يا هه‌ڵوژاردن جه‌نگ ؟
ملله‌ت ، ئمجا خاسترين تاريف ديموكراسی ك له‌ئه‌نجام هه‌ڵوژاردنه‌وه تيه‌يگه ده‌س پيكهاتگه له‌ده‌سڵات ملله‌ته‌وه ئه‌را ملله‌ت .
ئه‌و جه‌نگ ده‌سڵاته له‌ڕی هه‌ڵوژاردنه‌وه تيه‌يگه ده‌س و ئه‌و هه‌ڵوژاردنه جه‌نگ دعايه‌و جه‌نگ ركابه‌ری يا مونافسه ئه‌كا له‌وه‌ر خاتر ره‌سين وه ده‌سڵات له‌ڕی هه‌ڵوژاردنه‌وه ئه‌وه بيگومان جه‌نگيگ شه‌رعيه‌و گشت كه‌س ئازاده له‌ده‌نگداين و خود كانديد كردن يا ته‌رشيح و ئازادی رای و ئازادی هوير وئه‌ڕای چوين ، وه‌لی هه‌ڵوژاردن جه‌نگ وه‌ك هووكاريگ و ئاليه‌تيگ و ريگه‌يگ ئه‌را ره‌سين وه ده‌سڵات و نوێنه‌رايه‌تيكردن ملله‌ت ، ئه‌وه شه‌رعی نيه ، ئمجا له‌يرا ره‌سيمنه ناو گفتوگوو شه‌رعيه‌ت هه‌ڵوژاردن و مه‌شرووعيه‌ت جه‌نگ ، وه‌و مه‌عنا ك جه‌نگ هه‌ڵوژاردن شه‌رعيه‌ت سياسيه‌و هه‌ڵوژاردن جه‌نگ نامه‌شرووعيه‌ت قانوونيه ، چوينكه دعايه‌ی هه‌ڵوژاردن و مونافسه‌ی حزبی و كيشمه‌كيش ئه‌را خود كانديدكردن بنه‌مايگ شه‌رعی سياسی ديريگ ، وه‌لی چه‌مك هه‌ڵوژاردن ئه‌را ره‌سين وه ده‌سڵات مه‌ركه‌زيه‌ت و ئه‌نجامداين جه‌نگ ناشه‌ريفانه‌ی دويای هه‌ڵوژاردن و دگان نه‌ناين وه ئه‌نجام هه‌ڵوژاردنه‌يل بنه‌مايگ نا مه‌شرووعيه‌و بووگه سه‌به‌ب سزانن وشك و ته‌ڕ وه‌يه‌كه‌وه ، چوينكه وه‌ختی كار له‌وه‌رخاتر هه‌ڵوژاردن كريه‌يگ وه ئوميد مقه‌يه‌تيكردن گشت چشتيگ له‌كوومه‌ڵگا كريه‌يگ ك ئه‌ويش له‌وه‌ر مقه‌يه‌تيكردن ئه‌من و ئاسايش و دارايی و سامان ملله‌ت و نوێنه‌رايه‌تيكردن زوورم تاكه‌يل كوومه‌ڵگاس له‌بان ئاست ناوخوه‌يی و ناوده‌وڵه‌تی و جه‌نگكردن له‌وه‌رخاتر شه‌رعيه‌ت و قانوونی و دادپه‌روه‌ری و يه‌كسانی له‌ه‌رده‌م دادگاو له‌هه‌مان وه‌خت له‌وه‌رخاتر وه‌ديهاوردن كوومه‌ڵگايگ مه‌ده‌نی هاوچه‌رخه ، وه‌ل ئه‌وه‌يشا جه‌نگكردن له‌وه‌رخاتر هه‌ڵوژاردنيگ ئازاد و گشتی و راسه‌وخۆ يه‌كيگه له‌هه‌قه‌يل سه‌ره‌تايی تاك ئه‌را ره‌سين وه‌ده‌سڵات راسه‌قينه‌ی ملله‌ت و نوێنه‌رايه‌تی زوورمينه‌ی ملله‌ت ئه‌را وه‌ديهاوردن خه‌و سه‌ده‌ها ساڵه‌ی گوزه‌يشت و راوكردن به‌خت هه‌يوای نه‌ته‌وه‌گه‌مان ك ئه‌ويش جه‌نگيگ ديموكراسی توايگ له‌هه‌ڵوژاردنيگ شه‌ريفانه ك هه‌رچه‌نی وه‌رانوه‌ر يا لايه‌ن و پارته‌يل سياسی تر جه‌نگ راسه‌قينه‌و تيروارانمان كه‌ن ، وه‌لی ئه‌وه‌يش نه له‌به‌رژه‌وه‌ندی عراقه‌و نه‌يش له‌به‌رژه‌وه‌ندی كورده ، به‌ڵكوو ته‌نيا له‌به‌رژه‌وه‌ندی دوشمنه‌يل عراقه ئه‌را وه‌رده‌وامبوين ناكووكی و سه‌ختی و نه‌گونجيان ناونی هه‌ريم كوردستان و حكوومه‌ت به‌غدا ، به‌ڵكوو له‌وه‌يش زياتر بردنه‌وه‌ی عراقه ئه‌را سه‌رده‌م چه‌نگ بی هه‌ڵوژاردن نه‌ك ئه‌را هه‌ڵوژاردن بی جه‌نگ ، چوينكه جه‌نگ بی هه‌ڵوژاردن جياوازه له جه‌نگ هه‌ڵوژاردن له‌وه‌ك يه‌كميان جه‌نگ شوون ئيراده‌و خواست وداواكاری هاووڵاتی و ده‌نگده‌ره‌يل گريگه‌وه‌و ده‌نگده‌ر له‌جيای چگن وه‌ره‌و پيری هه‌ڵوژاردن بايه‌سه بچووگه پيری جه‌نگ و به‌دبه‌ختی و كاولكاری ، بايه‌سه له‌جيای ئه‌وه‌ك بچنه پيری پڕكردن سه‌ندووقه‌يل ده‌نگداين بچنه پيری سه‌ندووقه فيشه‌ك و گوله پڕبكه‌ن و له‌جيای هه‌ڵوژاردن نوێنه‌ره‌يل ملله‌ت بايه‌سه مقه‌يه‌تی له دڕنده‌و ره‌گه‌زپه‌رس و دوشمن په‌رده‌پووش بكه‌ن ، له‌جيای جه‌نگ وه‌يه‌كه‌وه ژيان و گونجيان و هاونيشتمانی جه‌نگ له‌يه‌كبڕيان كه‌ن .
