تارا و تارمایی وەفر
فاتیمە سەڵاح/ هات و هاوارە، خوەشیە، یە وەفر واریە، تارای سۊیر چەرمگ خوەی وەبان گشت وڵات کیشایە، وڵاتیش لە رووژەیلتر فرە رەنگینترەو بۊیە، یەکتر کیشانە، شەڕە وەفرە، قاقای خەنستن گەورەو و مناڵ خوەی تا بان ئەورەیل بەرزە رەسانیە، دڵەیلە گەرمن پڕ لە خوەشی و جۊش و خروشن چمان وەفر وەگەرد خوەی پەیام خوەشی ئەڵگردیە، شار و ئاوای، دار و کۊیە، تەلار و جادە و کوچەیلە گشتی لە ژیر رەنگ چەرمگ حەشار خوەیان دانە.
لە خود وەختز لە سۊک و قوژبنەیل ئی وڵاتە سەدان ماڵەیل نەدار هەس مینەی چووڕی نەفت کەن ئەرا گەرمەوکردن خوەیان و ماڵ و مناڵیان و سەدان چادر هەڵکریای هەس ک خێزانیەیلیگ ئاوارە و دۊیر لە میلکانەیلیان خوەیان لە ژیری حەشاردانە، چەوەڕی تاویان وەفرەگە کەن تا بتۊنن ژیانە سەختەگەی رووژانەیان گوزەران بکەن ک ئی وەفرە سەختری کردیە ئەرایان، مناڵەیلەیگ هانە ناو ئی ماڵە نەدارەیلە و خیوەت نشینەیلە ک جۊر گشت مناڵەیتر ئارەزوو بازیکردن دیرێن باوجی رخیان چوود بچنەدەر وازی وە وەفرەگە بکەن، نەگا دەس و پایەل بۊچگیان دی گەرمەو نەود، لە جیای سۆپایگ گەرمیان بکەێد، ئەسرەیل گەرمیان لەتاو تەزین دەسەیلیان وەبان رومەتەیل نەرمیان بتکێد.
هەرچەن وەفر جۊر سۆزو میهرەبانیە، هەر شۊنیگ داپووشێد رەنگینی کەێد، باوجی مەوقەی وەفر خوەشە، لەدۊیای بازیکردن ماڵیگ خاس و گەرم و گوڕ و پڕ و تیر بیاشتوەد، یا لەو دیم شیشەی پەنجەرەیلە وەدیار دیمەن و وارین وەفر و نیشتنی وە رۊی دار و درەخت دیوارو جادەیلە و ری و بانەیلە بڕوانید دڵخوەشی لە دیمەنەیلە وەربگرید.
وەفر چەنی لە رووکەش رەنگینە، جۊر تارایگ چەرمگیگە وە رۊی دەشت و کۊیە و دەروەنەیل، باوجی لەو دیم رۊیەگەیتر ئی رەنگە چەرمگیگە، تارمایی سیایگ هەڵگردیە، خوەی خەێدەبل بان چادرەیل سارد و سڕ ئاوارەیلە رمنێدەی گیان کورپەیل پەپولە ئاسا لە داوان داڵگیان سینێد، ئیجا تارما سیاگەی خەێدە بان کابرایگ تەقەڵای پاکەوکردن تارا چەرمگەی وەفر لەبان رێیەیلەی ئاوای دەێد ک هەفتەیگەی نوای هامچوکردنیان گردێە، وەفر تۊڕەس لە کار ئی پیاوە، چۊنکە تارا رەنگینەگەی خەراو کەێد وە لاوردن بەشیگ لەلی، وەفر لەهێوەت خەراوبۊین تاراگەی گیان ئەو کابرایەش سینێد، گیان ئەو مەل و ئاژەڵەیلەش سینێد ک ژیر و بان تاراگەی کەن، مینەی دو دەنگ گەنم و کوتی خواردن کەن، ئەویش هەم دووارە تۊرە بوود، وە سەردی خوەی کەێدەیانە یەخیگ ک گیانیان سینێد، وەفر لەژیر چەرمگی و رەنگینی رۊی دەیان چیرۆک سیا و نەنگ شاردیە، ک گشت کەسیگ توان دۊینین و خوەنستن ئی چیرۆکە نێرن تەنیا رۊیە رەنگینەگەی و چیرۆکەیل خوەشی دۊنن.
وەفر ئەرا بڕیگ مەردم رۊی چەرمگە و تارای سۊیری چەرمگ پووشیە پرە لە رەنگینی و خوەشی بی کۆتایی و یادگاریەیل خوەش ئەرایان توومار کەێد ، ئەرا بڕیگ مەردمەیش تارمایی سیایگە ئەرا گیانیان پرە لە تۊرەیی و رق و کینە، مینەی کیشان گیانیان کەێد و یادگاری ناخوەش لە کاغەز یادگاریەگەیان توومار کەێد.
