بیلا (خەڵات فەیلی‌دووسی) جەهانییەو بکرێ
شەفەق نیوز- مووسا ئومیدی، بەرپرس لق ئیلام بەرەێ یەکگرتووی کورد (جبهەی متحد کورد) ، دە وتارێ ک ئەڕا شەفەق‌نیوز، ماڵگەێ کوردەێل فەیلی کل کردگە، پێشتەوانی و داخواز خوه‌ێ ک یەکێ لە چالاکەێل مەدەنی و سیاسی دە ئیلامە وەێجوورە وتگە: کارێ بکەن تا خەڵات فەیلی‌دووسی جەهانییەو بکرێ.
لە یەو لا وتارەگەێ ئەوییە.
مووسا ئومیدی- کوردمانا وە بان یەوە ک گەلێگن دێرین و ریشگ دە میژوو و ژیار دنیا دیرن باوجی وەداخەوە هەمیشان هە تاوانەێل فرەیێگ ئەڕا ژیان و زینگ ماین خوەیان دانە.
ئەوان لە هەر هووز و ئائینێ، فرە گیچەڵ دە دریژاێ میژوو وە چەم خوەیان دینە. یەکێ لە سەیین‌ترینەێلەیان (ژینووساید کورد فەیلی) بییە. دەو بەینە ک چل ساڵ دریژە داشتگە، ئەوبان بیس و دو هزار نمام و نوونمام کورد فەیلی وە دەس ئستخبارات سەددامی دزریانە و بێ‌شوون و نوون کوشریانە و هێمانیش شوون‌گوم و گووڕخەریو مانە.
وەداخەوە ئیمەی کورد، خوەمانیش وە قەێڕانەێلێ ک وە سەرمان هاتگە ک گشتێ وە خاتر کورد بیینمان و بێ‌خاونی و بێ‌دەم و زوانیمان وبێ‌دهسی و بێ‌کەسیمان بینە، هێمانیش ک هێمانە، زەینییەت فرە وازا و دیاری لەو هەمگە ستەمە نەدیریمن و ئێقەرەێش ک بایەسە و شایەسەسە دە دنیا واژا و شیێیان نەکردیمنە. یە فرە عەیوە ئەڕامان ک چەن دەهەسە سەددام کوشریاگە و هە وەوجوورە ک ئەوسا دیکتاتورەێلێ جوور سەددام دە نق‌بڕین سەرسامەوهارێ ک رووژنامەێلە و میدیاێل عراقی و عەراوی و ناوچەئی و حەتتا ئێرانی و جەهانی ئەوسا داشتنە، سوود خوەیان بردنەو کار خوەیان کردنە، هالیمانیش هە وەوچوونە بێ‌دەنگ و مەێماق دیریمن دنووڕیمنە ئەو تراژدیێەێلە. یە هیچ خاس نییە ئەڕا کورد ک چەنە تاریخ گشتێ بنچینە دیرێ. وەێ خاترە وەختێ دوماژمارەێلەێ گوڵ‌سوو کوردی‌زوان و فەیلی عەراوی‌زوان ک گوڤارەێل لفانگ ماڵگەێ شەفەقن دیم ئوو باس فرە مودڕنێ ک خستنەسە رێ وە نام (خەڵات ڤەیلی‌دووسی) ک بنیاتێگە ئەڕا بانان و هەمیشە دمینێگە، وە داهاتوومان دڵنیاترەو بیم ئوو وە راسی و لە قوڕن دڵەو فرە خوەشی کردم چوون دیم هووز ماڵگەێ شەفەق کوردەێل فەیلی خیرەتێیان جمیاگە و ویر و هرزێ تازە گرتنەسە وەر تا ئەوانەێ ک هەر جوورێ وە قەزییەێ کورد فەیلی یارمەتی دانە بکرنە ویر ئوو لە گشت کوردەێل و هونەرمەندەێل و حزبەێل و کەسایەتییەێل و سیاسی‌ئایمەێل کورد، منیش دخوازم ک فرە دە بان ئی کار بهەرزە قسە بکەن و هانا بدەن تا یە جەهانییەو ببێ چوون ک ئی کارەساتە وەڕاسی کەمتر لە هوڵوکاست نییە و گەنە ک لەێ‌وا پاسا بکرێ و بەش ئەو شەهیدەێلە نادیار بمینێ و خوێنێیان بچووگە ژێر پا، گشتمان، ها ملمان ک وە خزمەتکارەێل جەریان کورد فەیلی ک یەکێ لە جمێشتەێل بەرامبەری‌خوازییە و لە دەس‌دە‌ناوەێلێ و پێشتەوانی‌کارەێلێ دە سەرانسەر میژوو، رێزداری لەیان بکرێ ئوو فرەتر لە ئەوەیش ئەوانەێ ک وە هەر فرمێ وە زوان و فەرهەنگ ، ئەدەب و رووژنامەوانی کورد فەیلی، خزمەت کردنە، کارەێلەیان لە لایەن کورد فەیلی خوەێ، ئوو گشت لایینگرەێل کەمهووزەێل دە دنیا، وەر چەم بگیردرێ.
کورد فەیلی، بەش گەپگن دە عراق ک نەخش خاس و راسێ دە شکڵ و شێوە داین وە عراق نووی و جەریان کوردی و حەتتا ناسیوونالیست عراقی داشتنە ئوو هەمجا دە راوسیان دە نواێ ماین دیکتاتووری دە عراق باوجی ئاخین و داخینە ک هێمانیش ئەو دەێن و دەێیەتە ک دە مل عراق گەورا دیرن، نەدریاگەسە و بڕێ هە جوور دایە‌بێگانە و لائیە دنووڕن وەیان. خاس ها ویرم ک ساڵ 1980 ک بڕێ لە کوردەێل فەیلی ک ماڵ و مینێیان وە تاڵان کریابی، چەنێ ژار و هەژار و وە دەس پەتی و وە پای پەتی لە سوور مێهرانەو هاتنە ئیلام، ئوو هەرچەن ک وە دروو بوختانبار کریابین و هەقێیان ئەوە نەبی ک عراق، ک دایەێ نێشتمانگەیان هساو دبی جوور باوەژنێگ گەنەکار و گەنداڵ لە ماڵ باوانی خوەیان بتاڕنێگەیان.
ئاخ و داخە ئەڕا نام‌دوئاوان (خاوەرمیانە/ شرق‌الاوسط) ک وە بان یە ک گافارەێ ژیار و تەمەدون بەشەری بییە، هەمیشە هە ناوەێ خەێلێ یەکجار، دیکتاتورێ دەێ زهیر کردگە و هەر چێ ژیار و فەرهەنگ و دووسایەتی و سەرمایەێ ئێجتماعی و سیاسی و میرات فەرهەنگی داشتگە گشتێ وە چەپاو بردگە. دە عراقیش، چوون کوردەێل فەیلی، تەل گرتنە و دە عراق عەراوی دانیشتگن و دە دەورەی سەددام بەدتر لە ئەوسا چۆچێیان دان و پەرکەنەیان کردن دە پەڕ و کەمار عراق ئوو لە زێد و ماواێ خوەیان تاڕاننەیان، هێمانیش فرەتر لە گشتێ هانە نواێ هێڵ زووردارەێل و دیکتاتورەێل و یەمە ک جگێ ئاسایێشت و دڵنیایی گرتنە و هیوادارم ک بەردەوام بمینێ، خاسە تا خوەیان، وەر ژە گشتێ، ویر بکەنە تەجروبەێل جاران و وەر بکەن وەر ئەو بانانێ ک هێمانیش هەم هە لێخنە، بەشکەم کرێ بکرێ تا دوارە، جارێ تر و جارانێ تر نەکەفنە وەرلەفەێ تاڵان‌کارەێل و نکێیان ناهێمێ نەمینێ.
دە ئی هنازە، وەڕاسی (خەڵات فەیلی‌دووسی) کارێگە گەپ و خاس ک داخواز م یەسە؛ گشت چالاکەێل کورد و دوفێشتر چالاکەێل کورد فەیلی خوەیان، فرەتر بەشداری بکەن دە وازا کردن و گەشە داین وەێ کارە و گشتمان وە یەکا کارێ بکەیمن ک ئی خەڵاتە هە بەردەوام بمینێگ و جەهانییەو ببێ و هەر کەسێ و هەر بنگە و دەوڵەتێ و کەسایەتیێگ سیاسی و وەرزێشتی و هونەری و فەرهەنگی و هەر چشتێگ تر، دە هەر شوونێ لە دنیا، دە هەر وەختێگ، وە ئی هووزە خزمەت کردنە لە گشتێ رێزداری بکرێ تا وە سنگ ئی کار خاسە، نام کورد فەیلی خوەێ، دە عراق و دە گشت ناوچەگە و دە دنیا وە گشتی بەرزترەو بکرێ.
تاریخ عوزرخوازی فرە فرە گەپێ وە کورد فەیلی بدێهکارە و وەێ خاترە کوردەێل فەیلی هەم ئی حەقە دە مل دەوڵەت هەرێم و حزبەێل کوردی دیرن، هەم دە مل حوکوومەت عراق ک سەرۆکەگەێ هەمیشە کورد بییە و دەوڵەتەگەێ ئوو فرەتر پارڵمانەگەێ دە دەس شیعەێل بییە و کورد فەیلی ک دە لای عەشیرەێل عەراو عراق، چەن‌چەنە ئەوانەسە و خوەێ شیعەسەیش، بایەد لایینداری لەێ بکرێگ و بێ‌ژە ئەوانە هەر چەن ئیمە دزانیمن ک کورد فه‌یلی یەکێ لە کوانەترین هووزه‌ێل و قەومەێل عراقییە ک وەر ژە فرە لە عەشیرەێلە عەراویش، هەم بەغدا و هەم لارووژهەڵات دەجڵە وەگرد زێد و ماواگەێ بییە، ئمجا چوون بڕێ بوخت وەیان دکەن ک ئەیانە عراقی نیین و ئێرانیین، ئوو دزانیمن ک ئێرانیش فرە پەل و وەچ دە عراق، دوفێشتر عراق عەراوی وەشانگە حەیفە ک ئێران لە کورد فەیلی، لائەڵبکەێگ و نەنووڕێ وە کارەساتەێل و هەق‌خوەرییەێلێ ک دە حەق ئی خەڵک بن و ریشگ‌دارە وە بوونەێ ئێرانی بیینێیان کریاگە یان دکرێگ و پان‌عەراوەێلە هالی هەم ، وە چەواشەێل عەراوەێل عراق‌دووس ک هەمیشە لاییندار کورد فەیلی جوور شاروەند عراقی بینە، هە بوخت ئێرانی بیین وەیان دکەن و هە دخوازن ک هەر وەختێ دەسهەڵات کەفتە دەسێیان، لە نوو کورد فەیلی شوون‌بڕ و تاڵان بکەن، ئەڕا خاتر ئی هەڕەشەێ بەردەوام ک وە نام ئێران دە مل ئی فەقیرەێلە دکرێگ خاسە ئێرانیش بجمێگەو.
لە وڵاتە یەکگرتووەێلە‌یش ک دە عراق ریشگ وه‌راننە ئوو لە وڵاتەێلێ ک دە عراق جا و لایێگ ئەڕا خوەیان دیرن و دەسە و بەسەیێگ، دخوازم ک لایین ئی خەڵکە بەش‌خوریاگە بگرێگ و وە نام ئنسانییەت و رێزداری لە مافی مرۆڤ چۆچشتێ (تەبعیز موسبەتێ) بنرێ دە بەشێیان بەشکەم جوبران جگێ لە سەختییەێلێ ک ئەڕا شکڵ گرتن عراق نووی، بکرێگ.
گشتێ خووە ک بزانن؛ یە حەق کورد فەیلییە ک ئەڕا یە ک نەکەفێگە نواێ تاڵان و بەشێ نەخورێگەو؛ دە شەرق دەجڵە یا لا‌وەکەمێ دە شەرق عراق خوەێ، ئەڕا خوەێ هەرێمێ سەر وە خوەێ بداشتووبێ. واجووە ک هەر عراقیێگ و هەر حزب عراقیێگ؛ وە نیگایێگ ئینسانی بنووڕێ وە تاریخ عراق ئوو وە حەق ئەو هەمگەێ خوێنە ک دە رێ ئازادی عراق لە نمامەێل و نوونمامەێل کورد فەیلی رشیاگه و ئەو بێ‌کەس کوشیاگەێلە ک داگە ئەڕا ئازادی عراق، ئوو هە وەوجوورە ک قانوون ئەساسی عراق وتگە، وەێ حەق خوەیانە بڕەسێ و هەرێمێ ئەڕا خوەێ بداشتووبی و ئەحزاب عراقییش دە بەغدا و هەولێریش دە کورسییەێل پارلمانەێل ئوستانی خوەیان بەشێ جوور هنەیکووت و واست ئەڕایان دیاری‌ترەو بکەن. هیوادارم.
