بوود ڕووڵه‌یل فه‌یلى له(حه‌مرین) زینگ وه‌چاڵ كریاوین؟
ده‌نگدو قه‌وریگ وه‌جه‌م ڕوڵه‌یلمان بژنه‌فیم و بزانیم له‌چ خاكیگ له‌ى عراقه وه‌رفراوانه زنگ وه‌چاڵ كریانه ، داڵگه‌یل جه‌رگ سزیاگ و له‌ڕوڵه بڕیاگ كورد هه‌میشه وه‌ئاه و حه‌سره‌ت كاڵه‌وه ژیان به‌نه سه‌ر و هه‌ر چه‌وه‌ڕى ئه‌وه كه‌ن هه‌واڵ جایه‌ڵ جوانه‌یلیان بایگه ده‌سیان و دڵنیا بوون له‌وه‌ك ئه‌زیزه‌یلیان چه وه‌سه‌ریان هاتگه‌و له‌كوورا كوشیانه‌و زنگ وه‌چاڵ كریانه وه‌ده‌س جه‌لاده‌یل و خوینمژه‌یل ملله‌ت .
له‌شوون رمیان رژیم حكوومه‌ت سه‌دام دكتاتۆر له ساڵ 2003 وه‌دویاوه ، ئه‌وه بوى له‌ناوچه‌یل جیاجیاى عراق و له‌گشت گووشه‌یگ ئى وڵاته قه‌وره‌یل وه‌جه‌م دوینریاسه‌وه‌و فره‌یگیش له‌وانه‌ك ڕوڵه‌یلیان نادیار و بى سه‌روشوون بویه ته‌رم ڕوڵه‌یلیان دینه‌سه‌وه‌و دى زانستنه له چ شوونیگ ژیرخاك كریانه‌و له‌ى لایه‌نه‌وه دڵنیا بوینه‌و له چه‌وه‌ڕیكردن روڵه‌یلیان قورتاریان بویه‌و دى وه‌لاى كه‌مه‌وه زه‌خمیگ له‌زه‌خمه‌یلیان چاره‌سه‌ر بویه ، وه‌لى كورده‌یل فه‌یلى بیجگه به‌دبه‌ختى و كیشه‌ى شوناسنامه‌و مه‌سه‌له‌ى ماڵ و موڵكه‌یلیان ك وه‌ناهه‌ق زه‌فت كریاگه‌و بریاگه ، وه‌ل ئه‌وه‌یشا گه‌وراترین خه‌م دیرن ، ك ئه‌ویش ئه‌وه‌سه رووژ وه‌ڕووژ چه‌وڕى كه‌ن جویر مه‌ردمان تر ئى وڵاته ته‌رم نازار ڕوڵه‌یلیان بویننه‌وه ، یا وه‌لاى كه‌مه‌وه بزانن (15)هه‌زار جایه‌ڵ جوانه‌یل ده‌سگیركریاگیان له‌كام خاك و كام قه‌ور وه‌جه‌م سه‌ره‌و نان .
وه‌رپرسیگ له‌وزاره‌ت كاروبار شه‌هیده‌یل وتگه : گوایا وه‌ى نزیكه‌یله قه‌وره‌یل وه‌جه‌م باوه‌ش زنجیره جه‌وه‌ڵ (حه‌مرین) هه‌ڵه‌و دریه‌ن ك شماره‌یگ له‌لیان له قوربانیه‌یل نه‌عره‌ته‌ى ئه‌نفالن و هه‌ر له‌وه‌ر ئه‌وه‌یش وزاره‌ت هه‌ق ئاده‌میزاد عراقى و ڕیكخریاگ (ICMP) وه‌ل كۆمسیۆن ناوده‌وڵه‌تى بى سه‌روشوونه‌یلیش له‌ڕوى لوجستیه‌وه بوونه هاوكاریان له هه‌ڵه‌وداین ئه‌و قه‌وره‌یله جویر قه‌وره‌یل تر ك له‌شوونه‌یل جیاجیاى عراق له‌ناونى ماوه‌یگ و ماوه‌یگ تر دوینریانه‌وه‌و زانستیم خه‌ڵك كام ناوچه‌و سه‌ر وه‌چ ئێڵ و ئه‌شره‌تیگن ، وه‌لى ئایا بووگ ڕوڵه‌یل جایه‌ڵ جوان كورده‌یل فه‌یلیمانیش له باوه‌ش زه‌نجیره جه‌وه‌ڵ (حه‌مرین) خریاوینه قه‌وره‌یل وه‌جه‌م و هه‌ر نه‌وگ بویشیم له‌ناو خاك پڕ له‌مسك وعه‌مبه‌رین كوردستان زنگ وه‌چاڵ كریانه ؟؟؟
ئیمه ئویشیم : به‌شكه‌م ئى ڕوڵه‌یل بى تاوان بى سه‌روشوون ئیمه‌یشه ك ته‌نیا تاوانیان ئه‌وه بوى كورد بوین و دویاى ئازار و شكه‌نجه‌داین فره‌یگ و دویاى زندانیكردن فره‌یگ له (نوگره سه‌ڵمان و ئه‌بوغرێب) له‌باوه‌ش زنجیره جه‌وه‌ڵ حه‌مرین داڵگ و باوگ و براو خوه‌یشك و كه‌س وكاریان وه‌هه‌واڵ وه‌دیكردن و دوینستنه‌وه‌ى ته‌رمه‌یلیان كه‌میگ له‌ئازار و خه‌م و خفه‌تیان كه‌مه‌و بووگ !! چوینكه جویر ئه‌وه‌ك مه‌سه‌له كوردیه‌گه‌ى خوه‌مان ئویشیگ (دى سقان هات و پووس دڕى) ، ئیمه‌ى كورده‌یل فه‌یلییش دویاى هه‌مگه ساڵه‌یلیگ له سه‌بركردن توایم بزانیم قه‌ور ڕوڵه‌یلیمان ها له‌كووراو چه‌نیگ له‌و شماره‌ى قوربانیه‌یل فره كه‌فیگه ده‌سمان ك وه‌به‌دبه‌ختى و رویداگ دڵته‌زن گیان خوه‌یان له‌ده‌سدان و بوینه مایه‌ى فه‌خر وشانازى ئه‌را ملله‌ت كورد و مه‌سه‌له ره‌واگه‌ى.
