(بن لادن) قه‌وقاز و ته‌قينه‌وه‌يل مۆسكۆ
ئاشكرا كردويگ ، دو په‌لامار خودكوش ميترۆيی ناوڕاس مۆسكۆ هاوردنه له‌رزه‌و ده‌يه‌ها كوشياگ و زه‌خمدار له‌لی كه‌فته‌وه . دوياخريش په‌لاماريگ تر له داغستان رويداو شماره‌يگ قوربانی له‌لی كه‌فته‌وه‌و له‌ی دوياخريشه خودكوشيگ له‌وه‌رده‌م ده‌زگايگ پۆليس له‌كوومار ئه‌نگۆشيا خوه‌ی ته‌قانه‌وه‌و چه‌ن پۆليسيگ وه سه‌به‌بيه‌وه كوشيان و زه‌خمدار بوين . وه‌و شيوه‌يشه جاريگ تر مه‌سه‌له‌ی تيرۆر و تون وتيژی هاته‌وه ئه‌را رووسيا ، وه‌لی له‌يوا دياره ئی جاره مه‌سه‌له‌گه مه‌ترسيدارتر بووگ .
ناكووكی و كيشمه‌كيش ناونی ده‌سڵاتداره‌يل مۆسكۆ و ئسلاميه‌يل باكوور قه‌وقاز ريشگ تاريخی قويليگ ديريگ و چووگه‌وه ئه‌را سه‌رده‌م وه‌رجه يه‌كێتی سۆڤێت ، وه‌لی له‌سه‌رده‌م ده‌سڵات سۆڤێت كيشه‌گه وه‌شيوه‌يگ وه‌ختی و له‌ژير سايه‌ی دروشم يا شعاره‌يل سستم تۆتاليتارانه‌ی كۆمۆنيسته‌يل كپه‌و كرياويگ . خاسترين به‌ڵگه‌يش ئه‌را ئه‌و راسيه ، ئه‌وه بوی هه‌ر له‌شوون شكه‌سهاوردن يه‌كێتی سۆڤێت داواكاريه‌يل تايبه‌ت وه جيابوينه‌وه‌ی چيچان و داغستان و ناوچه‌يل تر باكوور قه‌وقاز سه‌رهه‌ڵدا ك زياتر له (١٥) مليۆن موسڵمان له‌تيان ژيه‌يگ و چه‌نه‌ها جه‌نگ خويناوی ناونی سوپاو چه‌كداره‌يل ئسلامی چيچان و داغستان رويدان و ده‌سڵات چيچانی له‌ناو برياو هه‌زاران كه‌سيش بوينه قوربانی ، وه‌لی جاريگ تر رووسيا وه‌سه‌به‌ب باڵاده‌سی سه‌ربازه‌يل سوپاگه‌يه‌وه تويه‌نست ئسلاميه‌يل و جياخوازه‌يل ناوچه‌گه ئه‌را ماوه‌يگ نه‌يليگ ده‌نگيان بايگه بان .
هه‌رچه‌نی كاره‌يل تون وتيژ ئسلاميه‌يل تونڕه‌و باكوور قه‌وقاز وه‌تايبه‌ت هه‌ڕه‌شه‌يل (دۆكۆ عومه‌رۆڤ) سه‌ركرده‌يان ك خوه‌ی وه مير (ميرنشينی ئسلامی قه‌وقاز)ئاشنا كردگه‌و مه‌ردميش وه(ئوسامه بن لادن) رووسيا ناوی به‌ن ، چنه خانه‌ی تيرۆر ناوده‌وڵه‌تيه‌وه ، وه‌تايبه‌ت له‌شوون په‌خشه‌وبوين كاسێته ڤيديۆيی و به‌ياننامه‌يل هه‌ڕه‌شه ئاسا ك له‌تی هه‌ڕه‌شه‌ی جيوازكردن جه‌نگ كردگه له قه‌وقازه‌وه ئه‌را جاده‌يل مۆسكۆ و دامه‌زرياگه‌يل ئه‌منی رووسيا ك وه‌شيوه‌يگ دوير له‌شارستانيه‌ت هه‌قه‌يل ئاده‌ميزاد پاشيل كردگه‌و شماره‌ی فره‌يگ له‌مه‌ردم بيتاوان په‌لكيش زندانه‌يل كردگه‌و ناڵه‌يان تيه‌يگ له‌ژير شكه‌نجه‌و سزاو گشت ئه‌و ره‌فتاره‌يليشه ده‌ور ديرن له‌دريژه‌داين و سه‌خته‌وكردن تون وتيژی له ناوچه‌گه . يه‌يش له‌وه‌ختيگ ك ده‌سڵاتداره‌يل مۆسكۆ وه‌سه‌به‌ب گرژی وخراوی وه‌زع ئابووری و په‌خشه‌وبوين گه‌ناته‌كاريه‌وه توانای چاره‌سه‌ركردن كيشه‌يل تريان نه‌مه‌ندگه ك په‌يوه‌سه وه وه‌زع گشتی وڵاته‌گه‌يانه‌وه .
