ئایا دویای سەردانەگەی هەرێم چارەسەری هەس؟
خالد دبونی/ چەودیری سەردانەگەی بەڕێز کازمی کردیمن، ئەرا چەن رووژیگ گەردێدە شوونەیل باکوور خوەشەویستمان، ک خوەی یەکەم سەردانە ئەرا سەرۆک وەزیرانیگ وەی شیوەی فەرمی و جەماوەریە، و لەی ماوە ک هەمیشە لە یەک رووژ یا چەن ساعەتیگ زیاتر نەویاد.
سەردانیگە ک هەڵبەت وە ناو بەڕێز کازمی نریەێد. بەڵکم ئەوە ریگری نیەکەێد لە پرسیارکردن، ئایا ئامانج سەردانەگە خوەی دانووستانە لەباوەت گرفتە هاوچه‌رخەگان؟ یا ئەرا باسکردن لە خود گرفتەگان بان زەویە؟
چەودیر رەوش سیاسی لەناوبەین بەغداد وهەرێم کوردستان وە ئاشکرا نووڕێد ک قەیرانەگان وەشیوەی فرەیگ زیایەوبوون وەگەرد تەمەندریژی گشت حکومەتیگ، و وەقەیرانیگ گەوراتر تەواوبوود وەگەرد کۆتایی گشت خول پەرلەمانییگ، ئیجا سەردان ودانووستانەگان دەسکەنەپی وەگەرد دروس کردن ئی حکومەتە نووەگە.
هەڵبەت بەڕێز کازمی هەنای هویرەو کەێد لە گرفت و چارەسەریەگان، گشت کارەیل وەرین نەێدە هویرمانی، وهەمیش خاس زانێد ک بڕیار کوردستانی لە هەولێر و سلێمانی وەل یەکەو دروس بوود و وەبی واژوو کردن هەردوگ حزبەگە لەولا سەرنێکەفێد، و وەسەردانەگی هەردوگلاگە پەیام ئاشکرایگ رەسان ک وەگەرد هیچ لایەنیگیان وەته‌نیا رێک نێکەفێد.
سەردانەگەی ئەرا مەرزە سنووریەگان، مەزەنە کەم تەنیا سەردانیگ چەودیری بوی وەپی گرنگیداین حکومەت نشاندا وە کۆنترۆڵ کردن داهاتەیل دەوڵەت لە باکوور وەشیوەی باشوور، ئایا دەسەڵات دەوڵەت توانای ئەوە دیرێد؟
ئەوەیگ سەرسام کەێد چوون سەردان ئەو قەزای فرەترین ئاڵوزه لە عراق نەکرد لە روی سیاسی وئەمنی ک خوەی شەنگالە!. هەرچەن رووژ لە دویای رووژ دووکەڵەگە بەرزەو بوود.
نێزانم ئایا ئەوە وەنیاز رەسانن پەیامیگ بوی ک شەنگال سەروە بەغدادە وکوردستانی نیە! یا هەست کەێد ک ئی باوەتە ئیسە لە باوه‌ته گرنگەگانی نیە.
ئەگەر راوێژکارەگانی هووشداریی کردنە لە سەردان شەنگال لەوەر وه‌زعه ئەمنیەگەی خو ئەوە نەهامەتیگە، وەختا سەرۆک گشتی هێزە چەکدارەگان سەردان شاریگ نەکەێد لەترس باڵەیلیگ چەکدار بیگانە داگیر ئەو شارە کردنە!، لەیرا وەڕاسی ئەنوەگان رشیەن.
باوەت نەفتیش وگرفتە ئاڵوزەگانی لەلام لیواس ک سەرۆک نێتوێنێد سەرکەفتن دیاریگ وەدەس بارێد لە چارەسەریی، چوونکە خوەی زانێد ک لایەنە ناوخۆیەگان ودەیشتیەگان دەسمیەت ئەوە نیەن.
وە دریژایی ئەو سەردەمە نەفت بنەمای گرفت وناکۆکیەگان بوی، هەرچەن چارەسەریەگە وەدەس بوی و توانای جیوەجی کردنی لە ری یاسای نەفت وگاز بوی، ک هیچ لایەنیگ نێخوازێد جیوەجیی بکەێد، وەتایبەت حزبەیل دەسەڵات ک زاڵن لەبان بووریەیل هەناردە لە بەندەر ومەرزەگان.
ئایا سەرۆکەگە سەرکەفێد لە نزیکەوبوین ئەو یاسا لە دویای ئی سەردانە؟
فرە گومان لەوە دیرم، ئومێد خوازیمن ده‌ستهاته‌یل خاسیگ لەی سەردانە بوینیمن لەبان زەوی، هەرچەن راسیەگە ری وە گەشبینی نیەێد.
