ئاوای پەڵکانە سومبل خۆڕاگری و وەرخودان
![ئاوای پەڵکانە سومبل خۆڕاگری و وەرخودان](https://media.shafaq.com/media/arcella/1608373733277.jpg)
یونس حەمەد/ تەعریب باوەتیگ مێژوویە لەناوبەین حکومەت کوردستان و عراق، لە سەرەتای شەسەگان لە سەدەی گوزەیشتە، حکومەت عراق سزایل سەختیگ چەسپانە بان ئاوایەیل کوردستان و مەدەنیە بی دەسەڵاتەگان، وەتایبەت لە ناوچەیل کەرکوک و دەورگردی، ک لە سەرەتاوە دەسکردە بارکردن خیزانە کوردەگان، و خیزانەیل عەرەو لە باشوور عراق ئەرا ئەو ناوچەبلە هاورد، ئەگەر ئەرا مێژوو بچیمنەو نووڕیمن ک تەعریب لە دویادویای شەسەگان لە سەدەی گوزەیشتە زیایەو بوی، هەنای بەعس دەسنابان دەسەڵاتەگەی عراق، و کەرکوک سومبل تەعریبکردن بوی و بەش شیریگ لەو تەعریب زوورکاریە داشت، ک بەعس وە دەسپیچگەیل دروکانییگ فەرمان وە ویرانکردن ئاوایەگان دا، و خەڵکەگەی وەرەو ناوچەیلیگ تر لە هەرێم کوردستان ئاوارە کرد، و دانیشتوە رەسنەگانی لە شوونەیل خوەیان بارکرد.
دویای جەنگ دوویەم خەلیج، کورد ئی دەرفەت مێژوویە وەکارهاوردن، و تەقەلای هاوردنەوەی کەرکوک و ئەو ناوچە دابڕیایەگان ئەرا هەرێم کوردستان وە شیوە یاساییەگان دان، لە ساڵ ٢٠٠٤ بڕیار وەڕێۆبردن دەوڵەت جوور دەستووریگ وەختانەیگ ئەرا عراق بوی، و مادەی ٥٨ و لە پشتی مادەی ١٤٠ دەستووری ک تایبەتن وە ناوچە دابڕیایەگان، بەڵکم حکومەت بەغداد کار و هەسی لەو مادەیلە خستە پشت گووش، و لەو رووژەو تا ئمڕوو لەبان هیچ مادەیگ پەیوەندی وە تەعریب و بارکردن کار نەکریا.
لە ماوەیل دویایین، بەشیگ لە ناوچەیل سەروە ناحیەی سەرکران لە شار کەرکوک تەعریبکردنیگ ئاشکرا وەخوەیان دین، و وەهاندانیگ وەردەوام لەلایەن پارێزگارە نا شەرعیەگە و هێزە عراقیەگان.
ئەرا ماوەیگە تەعریبیەگان ک بەڵگەیلیگ درووکانی و نا یاسایی لە سەردەم رژیم بەعس هاوە پیان، پەلامار ئاوای پەڵکانە دەن، بەڵکم هەمیشە خەڵک ئاواییەگە لە روییان وسیان، ک ئاوای پەڵکانە بویە سومبلیگ ئەرا وەرخودان و خۆڕاگری و بوێری لەنوای تەعریب ئی سەردەم نووە.
پرسیاریگ گەوهەری و گرنگ هەس، ئایا ئەرا حکومەتەیل لە شوون یەک سزای گەل کورد دەن، و تەعریب ناوچەیل مێژووییان کەن؟، ئایا ئەرا حکومەت ئیسە سوود لە گوزەیشتەی نزیک نێگرێد؟، ئایا تەعریبکردن ناوچە کوردیەگان ئەرزشیگ دیرێد؟.