ئێداره‌ی سه‌ركه‌فتگ يه‌عنی ديمۆكراتی سه‌ركه‌فتگ

رووژ له‌ دويای رووژ له‌وه‌راوه‌ر كه‌رت تايبه‌ت دويا كه‌فتياد . كاروه‌ده‌سيل حكوومه‌ت و نزيكه‌يل ده‌وڵه‌ت وه‌ره‌و كه‌رت تايبه‌ت روی هاوردن و تويه‌نستن ده‌زگايل و ناوه‌نده‌يل و كارخانه‌يل ك رووژيگ دارايه‌يل ده‌وڵه‌ت بوين بسينن . دوياكه‌فتنه‌يل ده‌زگای ئيداری له‌وڵات له‌ وه‌خت جه‌نگ عێراق وه‌ل ئيران وه‌ردوام بوی و له‌شوونيش گه‌ماروو يا حسار نريا بان عێراق ك له‌ی وه‌خته‌ ئاست ژيان و كۆمه‌ڵايه‌تی كارمه‌نده‌يل ده‌وڵه‌ت شيويا . كارمه‌نده‌يل ده‌وڵه‌ت له‌و وه‌خته‌ تويش سه‌ختيه‌يل فره‌يگ هاتن و نه‌تويه‌نستن وه‌ شيوه‌ی راسيگ كاره‌يل و ئه‌ركيل خوه‌يان جيوه‌جی بكه‌ن و به‌شيگ له‌لايه‌نه‌يل ئه‌ی ده‌ره‌فه‌ته‌ وه‌كاربردن و پۆسته‌يل خوه‌يان ئه‌را به‌رژه‌وه‌نديه‌يل تايبه‌ت وه‌كاربردن و كه‌مه‌كه‌مه‌ پۆست ئيداری له‌شوون ئه‌وه‌گ ئه‌را خزمه‌ت وه‌ كۆمه‌ڵگا و نيشتمان وه‌كار بوريه‌يگ بويه‌ ئامێريگ ئه‌را وه‌ده‌س هاوردن به‌رژوه‌نديه‌يل تايبه‌ت . له‌شوون رميان ده‌سه‌ڵات سه‌دام ك غه‌ڵه‌ته‌يل فره‌يگ وه‌جی هيشت توانايه‌يل ده‌زگای ئيداری خراوتره‌و بوی ك نه‌تويه‌نست له‌ نيسان ساڵ 2003 وه‌ شيوه‌ی پاك و پسپۆرانه‌ و خاسيگ ئيداره‌ی وڵات بگريگه‌ ده‌س و وه‌ چه‌واشه‌ی ئيداره‌یل و توانای جه‌هانی ك ده‌سمه‌يه‌ت وڵاتيان دان ئه‌را پيشكه‌فتن جوور ئيداره‌ی وڵات يابان ك بويه‌ بايس پيشكه‌فتن ئه‌و وڵاته‌ و په‌ياكردن سون به‌رزيگ له‌ناونی وڵاته‌يل پيش كه‌فتگ . وه‌لی ئيداره‌ی عێراقی بويه‌ سه‌نگيگ له‌بان ده‌وڵه‌ت و حكوومه‌ت وه‌جوريگ شماره‌ی كارمه‌نده‌يل وڵات فره‌ن وه‌لی توانايه‌يل كه‌متره‌و بوی ، ته‌دريب خاسيگ ئه‌را كارمه‌نده‌يل ئه‌نجام نه‌گرت و ئه‌و كه‌سه‌يله‌ ك له‌ كاريان پسپۆر بوين دويره‌و خريان و ئه‌و كه‌سه‌يله‌ ك ئه‌را پارتيگ گله‌و خوه‌ن له‌شوونيان جيگير كريان و رێكخراوه‌يليگ له‌ناو ده‌زگايل حكوومه‌تی دياری كريان ك ته‌قالا كه‌ن ئه‌را به‌رژوه‌نديه‌يل تره‌كيگ وه‌تايبه‌ت له‌ ده‌زگايليگ ك وه‌ به‌رژه‌وه‌نديه‌يل گشتی په‌يوه‌ندی ديرن جوور وه‌زاره‌ته‌يل بازه‌رگانی و كاره‌با و نه‌فت و ده‌زگايل تره‌ك له‌ حكوومه‌ت .

له‌ نه‌تيجه‌يل ته‌حويل ديمۆكراتی ئه‌وه‌ بوی  ك ئيداره‌ی عێراق له‌ بارودوخ سه‌خت خوه‌ی ئاڵشته‌و بوی و وه‌ره‌و نه‌رمی كيشيا وه‌لی ئه‌ی نه‌رمی ديمۆكراتی عێراقه‌ بويه‌ بايس شيويان بارودوخ وڵات وه‌جووريگ كارمه‌نده‌يل عادی ره‌سينه‌ پۆسته‌يل وه‌زير يا وه‌كيل وه‌زير ئه‌وه‌يش له‌وه‌ختيگ نيه‌تويه‌نن جوور سياسيگ ره‌فتار بكه‌ن . گشت بايه‌د بزانيم ك وڵاته‌يليگ ته‌قالا كه‌ن ئه‌را سه‌رخستن زياترين ئه‌ندازه‌ی ديمۆكراتی و ئازادی له‌لايگتره‌و ته‌قالا كه‌ن ئه‌را دامه‌زرانن ده‌زگای ئيداری رێككه‌فتگ تريگ تا توانايی و تاقه‌ت زياتريگ داشتوود و وه‌گوره‌ی ياسا كار بكه‌يگ و ژينگه‌ی سياسی و كۆمه‌ڵايه‌تی خاسيگ ئه‌را جيوه‌جی كردن ديمۆكراتی و ئازادی دياری بكه‌يگ .