ئایا ڕووژنامه‌نویسه‌یل خانه‌قین جوور هاوكاره‌یلیان له به‌غدا وه‌پیان تیه‌ى؟
ه‌وه دریژایى تاریخ، پیاوه‌یل و ژنه‌یل ئى شاره مایه‌ى شانازى بوینه له وه‌رگرى كردن له كێشه‌ى كورد، وه خوین و گیان و وه قه‌ڵه‌م و ده‌فته‌ر خوه‌یان، ئمڕوویش هه‌وه‌جه‌مان ها ئاماده‌كردن نه‌وه‌یگ هوشیار تاگه‌ر بتویه‌نى ئه‌رك وه‌رپرسیارى خوه‌یان بووه‌نه ڕى ك له‌و كه‌سه‌یله ئه‌رایان مه‌نیه‌سه‌جى ك قوربانیه‌یل فره‌یگ دان له خاتر پاراستن شناسنامه‌ى نه‌ته‌وه‌یى، و وه‌رده‌وام بوین له كاروان پیرووز وشه‌ى ڕاسگوو له مه‌نبه‌ره‌یل میدیاى ئازاد و شه‌رافه‌تمه‌ند... و ئه‌را وه‌قه‌درزانین وپاداشت كه‌میگ ئه‌را ئه‌وه‌گ شار خانه‌قین پیشكه‌شى كرد، سه‌ندیكاى ڕووژنامه‌نویسه‌یل كوردستان نویسینگه یا مه‌كته‌بیگ خوه‌ى له خانه‌قین واز كرد، له‌ى باوه‌ته نویسه‌ر و ڕووژنامه‌نویس ئبراهیم باجه‌ڵان به‌رپرس نویسینگه‌گه له په‌یوه‌ندییگى وه‌ل ماڵپه‌ڕ شه‌فه‌ق ئویشى:"ئیمه هه‌ر له وه‌خت گریه‌داین یه‌كم كۆنفرانس سه‌ندیكاى ڕووژنامه‌نویسه‌یل كوردستان له هه‌ولێر له ساڵ 2003، داواكردیمن نویسینگه‌یگ له شار خانه‌قین واز بكریه‌ید، ئى داواكاریمانه ئه‌را كۆنفرانس دویم دویاخریا وئنجا قه‌وبوولى كریا، دویاى ئه‌وه ده‌سكردیمنه دامه‌زرانن ده‌سته‌ى ئاماده‌كار له 100 ڕووژنامه‌نویس، ئه‌را هه‌ڵوژاردن و ناوناین 4 ئه‌ندام و به‌رپرس نویسینگه، ئه‌ویش وه ڕیگه‌ى لیستیگ ك گشت پارت و لایه‌نه‌گان خانه‌قین گریده‌وه، و تایبه‌تمه‌ندى شاره‌گه نایمنه وه‌رچه‌و خوه‌مان ك یه‌كم سه‌نگه‌ر كوردایه‌تیه، وه‌ى جووره له ڕووژ 12 / 10 / 2010 و وه‌ئاماده‌بوین نه‌قیب ڕووژنامه‌نویسه‌یل كوردستان و جیگره‌گه‌ى هه‌ڵوژاردنه‌گه ئه‌نجام گرت وه ئاماده بوین 76 ڕووژنامه‌نویس ك 59 كه‌س له لیان ده‌نگ دا لیسته‌گه‌مان".
له‌باوه‌ت ئه‌و ده‌سكه‌فته‌یله ك سه‌ندیكاى ڕووژنامه‌نویسه‌یل ئه‌را ئه‌ندامه‌یلى ته‌رخانى كردیه، ئایا ڕووژنامه‌نویسه‌یل خانه‌قین گریده‌وه یا ئه‌وانیش هه چوى هاوكاره‌یلیان له به‌غدا بى به‌ش مینن؟ ئبراهیم باجه‌ڵان ئویشى:"من له‌بان ئه‌و باوه‌ڕه نیم چوینكه خانه‌قین له لایه‌ن حكوومه‌ت هه‌رێم كوردستانه‌وه بریه‌یده ڕیه‌وه، و هه‌ر ده‌سكه‌فتیگ ئه‌را ڕووژنامه‌نویسه‌یل كوردستان ته‌رخان بكریه‌ید هاوكاره‌یلیان له خانه‌قینیش گریده‌وه".
زیاتریش وت :" لق به‌غداى سه‌ندیكاى ڕووژنامه‌نویسه‌یل كوردستان تویه‌نى داواكاریه‌یل خوه‌ى له كۆنفرانس هاتى ك له مانگ شوبات هاتى بخه‌یده ڕوى و، ئه‌گه‌ر نه‌تویه‌نست ده‌سكه‌فته‌گان گیر بارید تویه‌نید یاداشتنامه‌یگ ئاراسته‌ى حكوومه‌ت فیدرالى بكه‌ید له ڕیگه‌ى كۆنفرانسه‌گه‌وه و داواكاریه‌گانى ده‌سنیشان بكه‌ید".
له‌لاى خوه‌یه‌و ڕووژنامه‌نویس زه‌ینه‌ب ئه‌ركه‌وازى له په‌یوه‌ندییگى وه‌ل ماڵپه‌ڕ شه‌فه‌ق ئویشى:" شار خانه‌قین تاریخ چڕوپڕیگ دیرى و ڕووشنهویره‌یل فره‌یگ هاتى، ئاره‌زوومانیش ئه‌وه‌سه ك ئى به‌ش داوڕیایه له كوردستان وه ڕیگه‌ى مادده‌ى 140ه‌و بایده‌و ئه‌را باوه‌ش كوردستان".
زیاتریش وت:"وازكردن نویسینگه‌یگ سه‌ندیكاى ڕووژنامه‌نویسه‌یل كوردستان له شار خانه‌قین له سه‌ر داواكارى ئیمه بوى له خاتر ئه‌وه ك ڕووژنامه‌نویسه‌یل زیاتر په‌یوه‌س بوون وه سه‌ندیكا، بیجگه ئه‌وه‌یش ك شاره‌گه بارووه‌زع تایبه‌تمه‌ندیگ دیرى، چوینكه ئیسه زیاتر له 90 ڕووژنامه‌نویس دیرید، و له شوون ساڵ 2003 ئازادى هویر و ڕا دیار دا و قه‌ڵه‌مه‌یل كه‌فتنه كار و بڕیگیان یه زیاتر له 40 ساڵه نویسه‌رن".
ئاماژه‌یش وه‌وه دا ك :" وازكردن نویسینگه‌ى سه‌ندیكاى ڕووژنامه‌نویسه‌یل كوردستان له شار خانه‌قین وه شیوه‌ى ڕیككه‌فتن یا ته‌وافقى بوى له‌وه‌ر بارووه‌زع تایبه‌تمه‌ند شاره‌گه، و ئیمه ئیسه ئاماده‌یمن ئه‌را به‌شدارى كردن له گریه‌داین كۆنفرانس سه‌ندیكاى ڕووژنامه‌نویسه‌یل كوردستان ك له مانگ شوبات هاتى گریه دریه‌ید".
